គណៈកម្មាធិការជាតិរៀបចំការបោះឆ្នោត ស្នើឲ្យស្ថានទូតខ្មែរជួយផ្សព្វផ្សាយឲ្យប្រជាពលរដ្ឋខ្មែរដែលកំពុងបំពេញការងារ ឬ រស់នៅក្រៅប្រទេសឲ្យដឹងពីព័ត៌មាននៃការបោះឆ្នោតជ្រើសរើសក្រុមប្រឹក្សាឃុំសង្កាត់ដែលនឹងប្រព្រឹត្តទៅថ្ងៃទី៤ខែមិថុនា ខែក្រោយនេះ។
សេចក្តីជូនដំណឹងរបស់ គ.ជ.ប ចេញផ្សាយកាលពីថ្ងៃអង្គារម្សិលមិញ បានឲ្យបញ្ជាក់ថា ដំណើរបោះឆ្នោតគឺចាប់ផ្តើមនៅថ្ងៃទី៤ខែមិថុនា ឆ្នាំ២០១៧ ចាប់ពីម៉ោង៧ព្រឹកដល់ម៉ោង៣រសៀល។
គ ជ ប ក៏បានរំឭកឲ្យពលរដ្ឋដែលមានឈ្មោះក្នុងបញ្ជីឈ្មោះបោះឆ្នោតត្រូវ យកអត្តសញ្ញាណប័ណ្ណ ឬ ឯកសារបញ្ជាក់អត្តសញ្ញាណបម្រើឲ្យការបោះឆ្នោតទៅ បើអ្នកនោះមិនមានអត្តសញ្ញាណប័ណ្ណ។ ទន្ទឹមការស្នើឲ្យស្ថានទូតជួយផ្សព្វផ្សាយព័ត៌មានទាំងនេះ គ ជ ប ក៏បានអំពាវនាវឲ្យប្រជាពលរដ្ឋខ្មែរនៅក្រៅប្រទេស ដែលមានឈ្មោះ ក្នុងបញ្ជីឈ្មោះបោះឆ្នោតមកបោះឆ្នោតនៅថ្ងៃទី៤ខែមិថុនាតាមការកំណត់៕