គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. គ្រោងនឹងប្រកាសលទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាឃុំសង្កាត់ នៅថ្ងៃស្អែកនេះ ដូចទៅនឹងការគ្រោងទុករបស់ខ្លួន។
ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤នេះ ត្រូវបានរៀបចំធ្វើឡើងកាលពីថ្ងៃអាទិត្យ ទី០៤ ខែមិថុនា ប៉ុន្តែ លទ្ធផលផ្លូវការនៃការបោះឆ្នោតនេះ ត្រូវបាន គ.ជ.ប. ពន្យាររហូតដល់ថ្ងៃទី២៥ ខែមិថុនា ដោយ គ.ជ.ប. ថា ដើម្បីទុកពេលផ្ទៀងផ្ទាត់ និងដោះស្រាយបណ្ដឹង។
ក្នុងសេចក្ដីប្រកាសព័ត៌មាននៅព្រឹកថ្ងៃនេះ គ.ជ.ប. បានឲ្យដឹងថា ការប្រកាសលទ្ធផលផ្លូវការនេះ នឹងចាក់ផ្សាយនៅលើទូរទស្សន៍ជាតិកម្ពុជា ព្រមទាំងផ្សាយតាមវិទ្យុជាតិផងដែរ។
លទ្ធផលផ្លូវការដែលគ្រោងនឹងប្រកាសនៅថ្ងៃស្អែកនេះ ត្រូវបានគេរំពឹងថា នឹងមិនមានអ្វីប្រែប្រួលខ្លាំង ខុសពីលទ្ធផលបឋម ឬលទ្ធផលបណ្ដោះអាសន្នដែលត្រូវបានប្រកាសឲ្យដឹងតែប៉ុន្មានម៉ោងក្រោយការបោះឆ្នោតនោះទេ។
លទ្ធផលបណ្ដោះអាសន្នបង្ហាញថា គណបក្សប្រជាជនកម្ពុជា បន្តឈ្នះឃុំសង្កាត់ភាគច្រើននៅទូទាំងប្រទេស ដោយឈ្នះបានឃុំសង្កាត់សរុប ១១៥៦ ខណៈគណបក្សសង្គ្រោះជាតិឈ្នះបានឃុំសង្កាត់ ៤៨៩៕