លោកនាយករដ្ឋមន្ត្រី ហ៊ុន សែន បានធ្វើដំណើរទៅជួបប្រជាពលរដ្ឋ និងសិស្សានុសិស្សនៅឯស្រុកវាលរេញ ខេត្តព្រះសីហនុ នៅថ្ងៃនេះ។
ដំណឹងស្ដីពីដំណើរចុះមូលដ្ឋានរបស់លោកនាយករដ្ឋមន្ត្រី ហ៊ុន សែន ត្រូវបានផ្សព្វផ្សាយដោយផ្ទាល់នៅលើទំព័រហ្វេសប៊ុកផ្លូវការរបស់លោក នៅម៉ោង ១០ព្រឹកថ្ងៃនេះ។
រូបភាពផ្សាយផ្ទាល់នោះ បានបង្ហាញលោកនាយករដ្ឋមន្ត្រី ហ៊ុន សែន ស្ថិតក្នុងបរិវេណនៃសាលាបឋមសិក្សា ហ៊ុន សែន ព្រៃនប់ និងកាន់ម៉ាក្រូហ្វូនថ្លែងទៅកាន់ក្រុមសិស្សានុសិស្សជាច្រើននាក់។
លោកនាយករដ្ឋមន្ត្រី ហ៊ុន សែន បានចាប់ផ្ដើមធ្វើដំណើរចុះតាមបណ្ដាខេត្តនានា ចាប់តាំងពីចុងខែកក្កដាកន្លងមក នៅក្នុងយុទ្ធនាការចុះមើលសមិទ្ធផលជាតិ នៅទូទាំងប្រទេស។
ដំណើរចុះមូលដ្ឋានរបស់លោកនាយករដ្ឋមន្ត្រី ហ៊ុន សែន ត្រូវបានធ្វើឡើងនៅមុនការបោះឆ្នោតក្រុមប្រឹក្សាឃុំសង្កាត់នៅឆ្នាំ២០១៧ និងការបោះឆ្នោតជាតិនៅឆ្នាំ២០១៨ខាងមុខ។
លោកនាយករដ្ឋមន្ត្រី ហ៊ុន សែន បានបញ្ជាក់កាលពីថ្ងៃទី២២ ខែសីហាកន្លងមកថា ដំណើរចុះតាមមូលដ្ឋានរបស់លោក គឺដើម្បីស្វែងរកការគាំទ្រពីប្រជាពលរដ្ឋ៕