តុលាការជាន់ខ្ពស់បានប្រកាសសាលដីកាច្រានចោលបណ្តឹងសាទុក្ខរបស់មេធាវីការពារក្តីឲ្យមន្ត្រីជាន់ខ្ពស់បក្សប្រឆំាងមួយនាក់និងសកម្មជន៤នាក់ ដែលបានប្តឹងបដិសេធការសម្រេចរបស់សាលាដំបូងកាលពីឆ្នាំ២០១៥ លើសំណុំរឿងការតវ៉ានៅជិតទីលានប្រជាធិបតេយ្យ។
អ្នកទំាង៥នាក់នោះ រួមមាន លោក មាជ សុវណ្ណារ៉ា លោក អ៊ុក ពេជ្យសំណាង លោក ទេព ណារិន លោក សាន សីហាក់ និងលោក អាន បឋម។
ប្រធានក្រុមប្រឹក្សាជំនុំជម្រះតុលាការកំពូល លោក សឹង បញ្ញាវុឌ្ឈ នៅព្រឹកថ្ងៃទី២៥ ខែមករា ឆ្នាំ២០១៧ បានប្រកាសសាលដីកាដោយច្រានចោលបណ្តឹងរបស់មេធាវីការពារក្តីឲ្យមន្ត្រីជាន់ខ្ពស់បក្សប្រឆំាង និងសកម្មជន ដែលបានប្តឹងបដិសេធការសម្រេចរបស់សាលាដំបូង(បណ្តឹងសាលាទុក្ខសុំមោឃភាពនីតិវិធីសាលាដំបូង)កាលពីថ្ងៃទី២១ ខែកក្កដា ឆ្នាំ២០១៥ ខណៈសំណុំរឿងនេះកំពុងស្ថិតក្នុងចំណាត់ការរបស់សាលាឧទ្ធរណ៍។
ការប្រកាសសាលដីកានេះ ធ្វើឡើងតែចំពោះមុខជនជាប់ចោទ ឈ្មោះ អ៊ុក ពេជ្រសំណាង តែម្នាក់ប៉ុណ្ណោះ។ ដោយឡែកជនជាប់ចោទ៤នាក់ទៀត ពុំត្រូវបានបញ្ជូនមកស្តាប់ការប្រកាសនោះទេ ខណៈមេធាវីការពារក្តីលោក ជួង ជូងី ក៏អវត្តមានផងដែរ។
លោក ជួង ជូងី មេធាវីការពារក្តីឲ្យអ្នកទំាង៥នាក់នោះបានពន្យល់ប្រាប់VODតាមទូរសព្ទថា អំពីពាក្យបណ្តឹងសាទុក្ខដែលបដិសេធនឹងការសម្រេចរបស់សាលាដំបូងរាជធានីភ្នំពេញដូចនេះថា៖ «មោឃភាពនីតិវិធីមានន័យថា បដិសេធចំណាត់ការតុលាការថ្ងៃទី២១ ខែកក្កដា ឆ្នាំ២០១៥របស់សាលាដំបូង ដែលគាត់កាត់ថ្ងៃនោះអត់មានមេធាវីការពារក្តីទំាង៥រូបទេ។ ផ្អែកទៅលើពាក្យបណ្តឹងរបស់យើងទំាងពីរ តុលាការក្រុងបានបញ្ជូនសំណុំឯកសារមកសាលាឧទ្ធរណ៍ គឺសាលាឧទ្ធរណ៍បានបំបែកសំណុំរឿងជាពីរ សំណុំរឿងទីមួយពាក់ព័ន្ធសុំមោឃភាពនីតិវិធី ឯទីពីរពាក់ព័ន្ធនឹងអង្គសេចក្តី ហើយនៅក្នុងសំណុំរឿងទីមួយ ពាក់ព័ន្ធនឹងមោឃភាពនីតិវីធីសាលាឧទ្ធរណ៍អត់បានបញ្ចូលឈ្មោះគាត់ទំាងប្រំានាក់នេះទៅក្នុងសំណុំរឿងមោឃភាពនីតិវិធីទេ ដែលកាលពីនៅក្រុង ប្រាំនាក់នោះអត់មានមេធាវីការពារក្តី ថ្ងៃសវនាការចេញសាលក្រមដាក់គុកគាត់៧ឆ្នាំនិង២០ឆ្នាំ ហើយដល់ពេលមកដល់សាលាឧទ្ធរណ៍គាត់បំបែកសំណុំរឿងទីមួយដែលនិយាយពីមោឃភាពនីតិវិធី ឬក៏កម្មវត្ថុនៃសំណុំរឿងទីមួយមោឃភាពនីតិវិធី សាលាឧទ្ធរណ៍អត់បញ្ចូលឈ្មោះគាត់ទំាង៥នាក់ចូលទៅក្នុងសំណុំរឿងហ្នឹង បានគាត់ប្រគល់សិទ្ធិឲ្យខ្ញុំជាមេធាវីប្តឹងសាទុក្ខទៅកំពូល ទាមទារឲ្យតុលាការកំពូលសម្រេចបញ្ចូលឈ្មោះគាត់ទំាងប្រាំនាក់ទៅក្នុងសំណុំរឿងមោឃភាពនីតិវិធី ប៉ុន្តែខ្ញុំមានការសោកស្តាយខាងសារព័ត៌មានបានប្រាក់ខ្ញុំថា ព្រឹកមិញនេះកំពូលបានច្រានចោលបណ្តឹងសាទុក្ខរបស់ខ្ញុំចោល ដោយមិនបញ្ចូលឈ្មោះកូនក្តីខ្ញុំទំាងប្រាំនាក់ទៅក្នុងសំណុំរឿងមោឃភាពនីតិវិធីទេ»។
មេធាវីរូបនោះ មានប្រសាសន៍បន្តថា ការសម្រេចរបស់តុលាការកំពូលធ្វើឡើងដោយអយុត្តិធម៌ចំពោះកូនក្តីលោក ដោយលោកថា តុលាការកំពូលព្យាយាមការពារកំហុសរបស់តុលាការថ្នាក់ក្រោម និងធ្វើឲ្យពលរដ្ឋអស់ជំនឿលើប្រព័ន្ធយុត្តិធម៌នៅកម្ពុជា។លោកលើកឡើងដូចនេះថា៖ «ខ្ញុំយល់ឃើញថា សេចក្តីសម្រេចរបស់ថ្នាក់ទាបខុស ដ៏ពេលតុលាការជាន់ខ្ពស់[តុលាការកំពូល]ព្យាយាមការពារដែលធ្វើដោយតុលាការជាន់ទាប ហើយនៅតែព្យាយាមអះអាងថាធ្វើត្រូវ ដែលជាកត្តាអវិជ្ជមាន ធ្វើឲ្យយុត្តិធម៌ស្រុកខ្មែរអត់បានធានា ហើយមិនទទួលបានការទុកចិត្តពីពលរដ្ឋខ្មែរទេ»។
យ៉ាងណាក៏ដោយVOD មិនអាចសុំការបំភ្លឺបន្ថែមពីប្រធានក្រុមប្រឹក្សាជំម្រះក្តី លោក សឹង បញ្ញាវុឌ្ឈ បានទេ។
អ្នកវិភាគនយោបាយលោក ឡៅ ម៉ុង ហៃ ដែលចូលស្តាប់ការប្រកាសសាលដីកានៅព្រឹកនេះ យល់ថា ការសម្រេចរបស់តុលាការកំពូលធ្វើឡើងក្រោមសម្ពាធអ្នកនយោបាយ ដោយលោកថា អ្នកដែលត្រូវបានតុលាការចោទប្រកាន់ពាក់ព័ន្ធនឹងរឿងនយោបាយ។ លោកមានប្រសាសន៍ថា៖ «តុលាការស្ថិតនៅក្រោមអំណាចរបស់បក្ស[គណបក្សប្រជាជនកម្ពុជា] ច្បាប់ជាឧបករណ៍ អំណាច ដើម្បីបង្ក្រាប កំទេចខ្មំាង ហើយចៅក្រម ព្រះរាជអាជ្ញាគឺនៅក្រោមឥទ្ធិពលរបស់បក្ស ជាសមាជិកបក្ស ម្លោះហើយត្រូវ ស្តាប់បង្គាប់បក្ស»។
គួរបញ្ជាក់ថា កាលពីខែកក្កដា ឆ្នាំ២០១៥ ចៅក្រមសាលាដំបូងរាជធានីភ្នំពេញបានសម្រេចផ្តន្ទាទោសសកម្មជនទាំង១១នាក់របស់គណបក្សសង្គ្រោះជាតិឲ្យជាប់ពន្ធនាគារម្នាក់ៗពី៧ទៅ២០ឆ្នាំក្រោមបទចោទចូលរួមនិងដឹកនាំកុប្បកម្មនៅក្បែរទីលានប្រជាធិបតេយ្យកាលពីខែកក្កដា ឆ្នាំ២០១៤។ ក្រោយមកមេធាវីការពារក្តី បានប្តឹងទៅសាលាឧទ្ធរណ៍ និងតុលាការកំពូល ដើម្បីបដិសេធការសម្រេចរបស់សាលាដំបូង ឬហៅថាស្នើសុំមោឃភាពនីតិវិធីរបស់សាលាដំបូងរាជធានីភ្នំពេញដោយថាការសម្រេចរបស់សាលាដំបូងធ្វើខុសនីតិវិធីច្បាប់៕