ក្មេងៗសិស្សសាលាចំនួន ៦៥នាក់ នៅសាលាសំបួរសាគរ ស្រុកព្រៃកប្បាស ត្រូវបានគេរាយការណ៍ថា បានពុលចំណីអាហារកាលពីថ្ងៃម្សិលមិញនេះ និងបញ្ជូនទៅសង្គ្រោះនៅមន្ទីរពេទ្យ បន្ទាប់ពីពួកគេបរិភោគគុយទាវឆា។
នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានអះអាងនៅលើទំព័រហ្វេសប៊ុកផ្លូវការរបស់ខ្លួនថា កាលពីម៉ោង ១០កន្លះព្រឹកថ្ងៃទី២៤ ខែកុម្ភៈនេះ ក្មេងៗសិស្សសាលាចំនួន ៦៥នាក់ ក្នុងនោះមានសិស្សស្រី ៣៤នាក់ ត្រូវបានគេបញ្ជូនទៅព្យាបាលទៅមណ្ឌលសុខភាព និងមន្ទីរពេទ្យ បន្ទាប់ពីពួកគេពុលគុយទាវឆា ប៉ុន្តែ កុមារទាំងនោះ បានធូរស្បើយវិញ គិតត្រឹមយប់ថ្ងៃដដែលនោះ។
អាជ្ញាធរសុខាភិបាលកម្ពុជាអះអាងថា ការស្រាវជ្រាវបឋម បានរកឃើញថា កុមារទាំងនោះ បានពុលគុយទាវ ផ្ទុកទៅដោយសារធាតុគីមី និងពុំមានអនាម័យ។
ករណីពុលអាហារ បានកើតឡើងជាបន្តបន្ទាប់នៅតាមបណ្ដាខេត្តនានា ដូចជាខេត្តសៀមរាប ខេត្តឧត្ដរមានជ័យ ខេត្តកំពង់ឆ្នាំង និងខេត្តពោធិ៍សាត់ ជាដើម៕