យ៉ាងហោចណាស់មនុស្សម្នាក់បានស្លាប់ ប៉ុន្តែ ១៣នាក់ទៀតបានរងរបួសធ្ងន់ និងស្រាល ក្នុងគ្រោះថ្នាក់ចរាចរណ៍កាលពីថ្ងៃម្សិលមិញនេះ ដែលជំរុញឲ្យចំនួនមនុស្សស្លាប់នៅក្នុងគ្រោះថ្នាក់ចរាចរណ៍នៅក្នុងរយៈពេល ២៤ថ្ងៃខែមីនានេះ កើនឡើងដល់ចំនួន ១១៨នាក់។
របាយការណ៍នគរបាលចរាចរណ៍ ដែលផ្សាយនៅលើវេបសាយនគរបាលជាតិកម្ពុជា បានបង្ហាញថា គ្រោះថ្នាក់ចរាចរណ៍ចំនួន ៧ករណីបានកើតឡើងនៅទូទាំងប្រទេសកាលពីថ្ងៃម្សិលមិញនេះ ដោយបានសម្លាប់មនុស្សម្នាក់នាក់ ខណៈមនុស្ស ៨នាក់រងរបួសធ្ងន់ ហើយ ៥នាក់ទៀតរងរបួសស្រាល។
របាយការណ៍នេះ បានបន្ថែមទៀតថា គ្រោះថ្នាក់ចរាចរណ៍ចំនួន ២៣៧លើក បានកើតឡើងពីចន្លោះថ្ងៃទី ១ដល់ថ្ងៃ២៤ ខែមីនានេះ ដោយសម្លាប់មនុស្សដល់ទៅ ១១៨នាក់ ហើយបណ្ដាលឲ្យមនុស្ស ៣៣០នាក់ទៀតរងរបួសធ្ងន់ស្រាល៕