ប្រទេសថៃ និងភូមា កាលពីថ្ងៃសុក្រម្សិលមិញ បានឯកភាពគ្នាកែលម្អស្ថានភាពពលករភូមាបម្រើការងារក្នុងប្រទេសថៃ និងបង្កើនការប្រយុទ្ធប្រឆាំងនឹងការជួញដូរមនុស្ស។
កាសែតបាងកកប៉ុស្តិ៍ របស់ថៃ បានផ្សាយថា សេចក្ដីសម្រេចនេះ ត្រូវបានធ្វើឡើងតាមរយៈអនុស្សារណៈយោគយល់ចំនួន ៣ ដែលត្រូវបានចុះហត្ថលេខាដោយនាយករដ្ឋមន្ត្រីថៃ លោក ប្រាយុទ្ធ ចាន់អូចា និងរដ្ឋមន្ត្រីការបរទេសភូមា លោកស្រី អ៊ុងសាន ស៊ូជី នៅឯវិមានរដ្ឋាភិបាល ក្នុងទីក្រុងបាងកក។
បញ្ហាពលកម្ម គឺជាចំណុចផ្ដោតសំខាន់នៃដំណើរទស្សនកិច្ចរបស់មេដឹកនាំភូមា លោកស្រី ស៊ូជី ដែលទទួលបានការស្វាគមន៍ពីពលរដ្ឋភូមារាប់ពាន់នាក់ នៅឯខេត្តសមុទ្រប្រាកាន។
កាសែតបាងកកប៉ុស្តិ៍ បានផ្សាយបន្តថា កិច្ចព្រមព្រៀងនានាកាលពីថ្ងៃម្សិលមិញ ត្រូវបានគេចាត់ទុកជាការលើកកម្ពស់អត្ថប្រយោជន៍ជនចំណាកស្រុក ការការពារកាន់តែប្រសើរ ការបង្កើនជំនាញ និងកិច្ចសហប្រតិបត្តិការរវាងប្រទេសទាំងពីរ ដើម្បីប្រយុទ្ធប្រឆាំងនឹងការជួញដូរមនុស្ស។
ក្រៅពីជជែកពីបញ្ហាពលករភូមា មេដឹកនាំនៃប្រទេសទាំងពីរនេះ ក៏បានប្ដេជ្ញាបង្កើនកិច្ចសហប្រតិបត្តិការផ្នែកសេដ្ឋកិច្ចផងដែរ ក្នុងនោះមានការអភិវឌ្ឍតំបន់សេដ្ឋកិច្ចពិសេសដាវ៉េ និងការធ្វើការរួមគ្នារវាងប្រទេសទាំងពីរ ដើម្បីធ្វើមាតុភូមិនិវត្តន៍ជនភៀសខ្លួនភូមា ដែលកំពុងស្នាក់នៅក្នុងប្រទេសថៃ៕
