អាជ្ញាធរខេត្តរតនគិរី បានអះអាងថា ពួកគេមិនទាន់ស្រាវជ្រាវរកមុខឃាតក ដែលរំលោភហើយសម្លាប់ យុវតីជនជាតិទំពួនម្នាក់ ដែលសកម្មនិងការងារតស៊ូមតិក្នុងការលើកកម្ពស់សិទ្ធិជនជាតិដើមភាគតិច កាលពីថ្ងៃទី២២ខែតុលា នៅឡើយ ដោយថា សំណុំរឿងនេះ សមត្ថកិច្ចកំពុងចុះស្រាវជ្រាវ។
ជនរងគ្រោះ កញ្ញា កេល ស្រីលាប ដែលជាជនជាតិទំពួន បានធ្វើការងារស្ម័គ្រចិត្តផ្នែក ការងារតស៊ូមតិលើកកម្ពស់សិទ្ធិជនជាតិដើមភាគតិចនៅតាមសហគមន៍។ ស្ថាប័នដែលធ្វើការជាមួយ អ្នកស្ម័គ្រចិត្តនៅ សមាគមយុវជនជនជាតិដើមភាគតិចកម្ពុជា និងជាពលរដ្ឋអ្នកសារព័ត៌របស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ប្រចំាខេត្តរតនគិរីជាដើម។
ស្នងការរង ទទួលផែនព្រហ្មទណ្ឌ លោក ផែន ឌីណា បានប្រាប់ VOD នៅថ្ងៃទី២៥ខែតុលានេះថា សមត្ថកិច្ចមិនទាន់កំណត់មុខសញ្ញាឃាតក ដែលរំលោភនិងសម្លាប់ យុវតីជនជាតិទំពួន នៅក្នុងចម្ការដំឡូងមីមួយកន្លែង ស្ថិតនៅចំណុចក្នុងភូមិចាងរ៉ា ឃុំបាតាង ស្រុកលំផាត់ ខេត្តរតនគិរី កាលពីថ្ងៃទី២២ខែតុលា នៅឡើយ។ យ៉ាងណាក៏ដោយ លោកថា សមត្ថកិច្ចកំពុងចុះស្រាវជ្រាវសំណុំរឿងនេះ ដោយថា ដើម្បីចាប់ជនល្មើសយកទៅផ្តន្ទាទោសតាមច្បាប់។
លោកនិយាយថា «យើងកំពុងធ្វើការស្រាវជ្រាវយ៉ាងយកចិត្តទុកដាក់លើរឿង[រំលោភសម្លាប់]ហ្នឹង ការស្រាវជ្រាវវាមិនអាចថាកំណត់ត្រូវឆាប់ ឬមួយយូរបានទេ ជួនកាលឆាប់ ជួនកាលយូរទៅ»។
មន្ត្រីសម្របសម្រួល នៃសមាគមការពារសិទ្ធិមនុស្សអាដហុក ប្រចាំខេត្តរតនគិរី លោក ឡេង សេងហាន មានប្រសាសន៍ថា បើជនរងគ្រោះពិតជាស្លាប់ ដោយសាររំលោភនិងសម្លាប់មែន លោកថា នេះ ជាបទល្មើសឃាតកម្មគិតទុកជាមុន ហើយអ្នកប្រព្រឹត្តប្រឈម និងជាប់ពន្ធគារអស់មួយជីវិត។
លោក ស្នើទៅសមត្ថកិច្ចពន្លឿនស៊ើបអង្កេត ករណីនេះ ដោយចាប់ជនល្មើស មកផ្តន្ទាទោស ដោយថា ដើម្បីផ្តល់យុត្តិធម៌ឲ្យក្រុមគ្រួសារជនរងគ្រោះ នឹងកុំឲ្យមាននិទណ្ឌភាពនៅកម្ពុជា។
លោកនិយាយថា «ខ្ញុំសំណូមពរ ដល់អាជ្ញាធរធ្វើយ៉ាងណា តាមចាប់ជនល្មើស វែកមុខជនល្មើសមកផ្តន្ទាទោសឲ្យខានតែបាន កុំឲ្យវាមាននិទណ្ឌភាពកើតឡើង! ខ្ញុំជឿថា បើអាជ្ញាធរគាត់មានឆន្ទៈ ពិតជនល្មើសមិនរួចខ្លួនទេ ហើយមួយទៀតខាងរដ្ឋ ឬក៏អាជ្ញាធរគ្រប់លំដាប់ថ្នាក់ គួរតែចុះអប់រំ ផ្សព្វផ្សាយ យើងធ្វើម៉េចឲ្យគោលនយោបាយរបស់រដ្ឋាភិបាល ភូមិ ឃុំមានសុវត្ថិភាព ឲ្យវាមានសុវត្ថិភាពទៅតាមគោលការណ៍ហ្នឹងឲ្យពិតប្រាកដ កុំឲ្យតែវាមានតែក្នុងក្រដាស»។
មាត្រា២០០ នៃក្រមព្រហ្មទណ្ឌ មានខ្លឹមសារថា បទល្មើសឃាតកម្មគិតទុកជាមុន គឺជាគម្រោងបង្កើតឡើង មុនអំពើបៀតបៀនទៅលើរូបបុគ្គលនៃជនរងគ្រោះ។ បទល្មើសនេះ ត្រូវផ្តន្ទាទោសដាក់ពន្ធគារអស់មួយជីវិត។
ប្រភពសារព័ត៌មានក្នុងស្រុក ដែលបានដកស្រង់សម្តីមិត្តភក្តិជនរងគ្រោះ បានឲ្យដឹងថា កាលពីថ្ងៃទី២២ ខែតុលា ឆ្នាំ២០១៧ វេលាម៉ោង១១ថ្ងៃត្រង់ អង្គការមីឌីវ័ន្ត បានរៀបចំកម្មវិធីមួយ ដែលមានឈ្មោះថា «ធម្មជាតិរបស់អ្នក» ហើយបានអញ្ចើញនារីរងគ្រោះ មករាំរបាំជនជាតិទំពួនដល់ម៉ោង១២ថ្ងៃត្រង់។ បើតាមមិត្តភក្តិ បន្ទាប់ពីចប់កម្មវិធី នារីរងគ្រោះ បាននៅហូបបាយរួមគ្នា ជាមួយមិត្តភក្តិជាច្រើនទៀត រហូតដល់ម៉ោង៣រសៀល ទើបបែកគ្នាអស់ ប៉ុន្តែមិត្តភក្តិរបស់នាង បញ្ជាក់ថា មិនដឹងនារីរងគ្រោះទៅណាទៀតទេ ទើបមកដល់ថ្ងៃទី២២ថ្ងៃ ដដែល មានការភ្ញាក់ផ្អើលថា នារីរងគ្រោះត្រូវបាន គេរំលោភសម្លាប់៕
