ការចំណាយលើការទិញទំនិញតាមអនឡាញរបស់ពលរដ្ឋអាមេរិក បានហក់ឡើងលើសពី ១ពាន់លានដុល្លារនៅល្ងាចនៃថ្ងៃបុណ្យ Thankgiving ពោលគឺបានកើនឡើងជិត ១៤ភាគរយ បើធៀបទៅនឹងឆ្នាំមុន និងឆ្លុះបញ្ចាំងឲ្យឃើញនិន្នាការកាន់តែធំឡើងរបស់មនុស្សងាកចេញពីការដើរផ្សារ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters ដែលបានដកស្រង់តួលេខពី Adobe Digital Index។
នៅថ្ងៃដំបូងនៃរដូវឈប់សម្រាកចាប់តាំងពីក្រោយការបោះឆ្នោតជ្រើសរើសលោក ដូណាល់ ត្រាំ ធ្វើជាប្រធានាធិបតីថ្មីរបស់អាមេរិកកាលពីថ្ងៃទី៨ ខែវិច្ឆិកាកន្លងមកនេះ អតិថិជនអាមេរិក បានចំណាយប្រាក់ដល់ទៅ ១.១៥ពាន់លានដុល្លារ នៅថ្ងៃបុណ្យនេះ។
ជាទូទៅ ថ្ងៃបន្ទាប់ពីបុណ្យ Thankgiving ឬថ្ងៃ Black Friday គឺជាការចាប់ផ្ដើមរដូវឈប់សម្រាក និងដើរផ្សារនៅសហរដ្ឋអាមេរិក ដោយក្រុមហ៊ុនលក់រាយនៅទីនោះ បានលក់ទំនិញបញ្ចុះតម្លៃ និងប្រមូលបានប្រាក់ចំណេញយ៉ាងច្រើន។ ប៉ុន្តែ ទម្លាប់ដើរផ្សារបែបនេះ បានរួមតូចទៅវិញ នៅចំពោះមុខការរីកលូតលាស់នៃការលក់ទំនិញថោកៗនៅតាមអនឡាញពីសំណាក់ក្រុមហ៊ុនលក់រាយតាមអនឡាញ ក្នុងនោះមានទាំងក្រុមហ៊ុន Amazon.com Inc. ផងដែរ។
ហាងលក់នៅអាមេរិក កំពុងបើកទ្វារហាងនៅចំថ្ងៃបុណ្យ Thankgiving ដើម្បីទាក់ទាញអតិថិជននៅហាងដោយផ្ទាល់ ខណៈដែលក្រុមហ៊ុនលក់រាយតាមអនឡាញ បានបើកលក់បញ្ចុះតម្លៃប៉ុន្មានសប្ដាហ៍មកហើយ ជាមួយការប្រកួតប្រជែងខាងតម្លៃ។
សហព័ន្ធលក់រាយជាតិ ដែលរំពឹងកំណើនខ្ពស់នៃការលក់លើសពីឆ្នាំមុននោះ បានព្យាករថា ការលក់ទំនិញនៅថ្ងៃឈប់សម្រាក នឹងកើនឡើង ៣.៦ភាគរយនៅឆ្នាំនេះ ពោលគឺឡើងទៅដល់ ៦៥៥.៨ពាន់លានដុល្លារ៕
