បើសំឡឹងពីបទពិសោធន៍ និងប្រវត្តិក្នុងការប្រកួត គឺអ្នកគាំទ្រវិស័យប្រដាល់១០០ទាំង១០០ អាចមិនមានអ្នកជឿសូម្បីតែម្នាក់នោះទេ ថាកីឡាករវ័យក្មេង និងថ្មីសន្លាងនៅលើសង្វៀន នឹងអាចទៅរួចជាមួយនឹងកីឡាករជើងចាស់ល្បីឈ្មោះ ស៊ឹម ប៊ុនឆៃ សម្រាប់ការប្រកួតវគ្គជម្រុះយកកៅអី១៦នាក់ នៅក្នុងព្រឹត្តិការណ៍ជ្រើសរើសជើងឯកប្រភេទទម្ងន់៥៧គីឡូក្រាម ដែលបានធ្វើឡើងនៅប៉ុស្ដិ៍លេខ៥នៅព្រែកកំពិស កាលពីថ្ងៃទី២៤ កុម្ភៈ ដែលជាការប្រកួតចម្រុះក្នុងសប្ដាហ៍ទី៥នោះ។ អ្វីដែលគេភ្ញាក់ផ្អើល គឺកីឡាករជើងថ្មី រឿន ឈី បានទាំងវាយបំបុកអោយកីឡាករ ស៊ឹម ប៊ុនឆៃ ដែលមានបទពិសោធន៍នៅលើសង្វៀនរាប់មិនអស់អោយបោះបង់ការប្រកួតក្នុងទឹកទី២ នៅក្នុងថ្ងៃនោះទៀត។
លោក សេង កដិកា អ្នករៀបចំកម្មវិធី បានសម្ដែងការភ្ញាក់ផ្អើលច្រើនជាងអ្នកគាំទ្រទៅទៀតបន្ទាប់ពីគូទាំងបានបញ្ចប់ការប្រកួត ហើយកីឡាករជើងថ្មីខ្ចីបទពិសោធន៍បែរជាអាចទម្លាក់កីឡាករល្បីម្នាក់នៅលើសង្វៀនអោយធ្លាក់ហាលអាវក្នុងទី២។ លោកថាការប្រកួតគូនេះ ក្រោយពេលចាប់ឆ្នោតហើយបានលទ្ធផលថា កីឡាករ រឿន ឈី និងកីឡាករស៊ឹម ប៊ុនឆៃ ប៉ះគ្នា គឺលោកមានអារម្មណ៍ភ័យជំនួសតែម្ដង ដោយលោកបារម្ភថាកីឡាកររឿន ឈី នឹងមិនអាចទប់ជាមួយគូប្រកួតជាជើងខ្លាំងបានទេ ដោយសារតែបទពិសោធន៍របស់កីឡាករទាំងពីរគឺខុសគ្នាដាច់ឆ្ងាយ។
ប៉ុន្តែលោកថាក្ដីបារម្ភសម្រាប់កីឡាករ រឿន ឈី បែរជាមិនកើតមានឡើង បន្ទាប់ពីគេឆ្លងកាត់ការប្រកួតបានចប់ទឹកទី១ ហើយបញ្ចេញថ្វីដៃទៅលើកីឡាករ ស៊ឹម ប៊ុនឆៃ បានល្អ។ លោកកាន់តែសម្ដែងអារម្មណ៍ធូរចិត្តបន្ថែមទៀត បន្ទាប់ពីកីឡាករ រឿន ឈី ស្រាប់តែអាចវាយអោយស៊ឹម ប៊ុនឆៃ បោះបង់ការប្រកួតក្នុងទឹកទី២ ដែលធ្វើអោយម្នាក់ៗសុទ្ធតែបង្ហាញការភ្ញាក់ផ្អើល។
ការប្រកួតរបស់កីឡាករទាំងពីរ លោកថាបានបង្ហាញនូវការប្រឹងប្រែងរៀងខ្លួននៅលើសង្វៀនដែលបានធ្វើឡើង ដោយលោកបញ្ជាក់ថាខ្លួនកាន់តែពេញចិត្តទៅទៀតនៅពេលការប្រកួតឈានដល់ទឹកទី២ បើទោះជាកីឡាករ ស៊ឹម ប៊ុនឆៃ ត្រូវគេគិតថាបោះបង់ការប្រកួតព្រោះតែភ្លាត់ច្រើនជាងបរាជ័យដោយកម្លាំង និងបច្ចេកទេស។
លោកថាជារឿងសោកស្ដាយដែលកីឡាករធ្លាប់ល្បីឈ្មោះម្នាក់នៅលើសង្វៀន បែរជាក្លាយជាអ្នកបាត់បង់ឱកាសឡើងទៅប្រកួតក្នុងវគ្គបន្ត ក្នុងពេលដែលការប្រកួតជម្រុះមួយនេះ គឺអត់មានអ្នកណាចង់ធ្លាក់ទាល់តែសោះ ជាពិសេសកីឡាករដែលមានក្រេឌីតជាង ដូចជាកីឡាករ ស៊ឹម ប៊ុនឆៃ ដែលអ្នកគាំទ្រ១០០ទាំង១០០យល់ថានឹងឈ្នះជើងថ្មី រឿន ឈី ដោយមិនលំបាកនោះ។
លទ្ធផលដែលបានស្ដែងឡើង កាន់តែបង្ហាញយ៉ាងច្បាស់ទៀតហើយថា កីឡាករដែលសម្អាងថាខ្លួនធ្លាប់មានថ្វីដៃល្អ និងប្រវត្តិប្រកួតច្រើន មិនសុទ្ធតែអាចវាយឈ្នះកីឡាករថ្មោងថ្មី ដើម្បីដណ្ដើមយកកៅអីនោះទេ ជាពិសេសក្នុងពេលដែលកីឡាករថ្មីៗ ក៏ប្រឹងអស់ពីសមត្ថភាពដើម្បីឈោងឆាប់ភាពល្បី ដោយមិនខ្លាចគ្រោះថ្នាក់នោះផង។
លោកនៅតែអះអាងថារូបមន្តចាញ់ធ្លាក់ៗ មិនពិបាកធ្វើអោយ កីឡាករប្រកួតលាក់ដៃ ឬលក់លទ្ធផល ដែលលោកបានហៅរូបមន្តនេះថា ជាការប្រកួតអស់ដៃរៀងខ្លួនដោយសូម្បីតែចាញ់ក៏អ្នកគាំទ្រអស់ចិត្ត។
កីឡាករ រឿន ឈី បានបង្ហាញអារម្មណ៍ភ្ញាក់ផ្អើល បន្ទាប់ពីបានឆ្លងផុតជុំទី១ហើយបានឡើងទៅកាន់វគ្គ១៦នាក់ដែលជាជុំទី២ ក្នុងពេលដែលលោកក៏អះអាងថាមិនចង់ជឿភ្នែកថាលទ្ធផលចុងក្រោយ គឺលោកជាអ្នកឈ្នះ។ ការទម្លាក់កីឡាករជើងខ្លាំង ស៊ឹម ប៊ុនឆៃ លោកថាមិនទាន់សង្ឃឹមខ្ពស់សម្រាប់ការឈានឡើងទៅវគ្គបន្តទៀតនោះទេ ពិសេសសម្រាប់ការប្រកួតជម្រុះក្នុងវគ្គ១៦នាក់យក៨នាក់ ដោយសារតែគូប្រកួតដែលបានឈានឡើង គឺទោះជាប៉ះមួយណាក៏មិនងាយវ៉ៃស៊ី។
លោកថាការប្រកួតកាលពីល្ងាចថ្ងៃទី២៤ កុម្ភៈ លោកទទួលជ័យជម្នះដោយសារតែបានហ្វឹកហាត់រហូតដល់ជាង២អាទិត្យជាប់លាប់ ហើយលោកក៏ខំប្រឹងប្រែងអោយខ្លាំងបន្តទៀតផងដែរ ដោយសារតែលោកក៏ចង់ឈ្នះពាន ឬឈានទៅដល់ដំណាក់កាលដែលមានអ្នកទស្សនាស្គាល់មុខ និងឈ្មោះ បានច្បាស់ជាងនេះ៕