ក្នុងកិច្ចសម្ភាសន៍កាលពីល្ងាចថ្ងៃទី២៥ កុម្ភៈ តាមឆាតលោក សុវណ្ណ រិទ្ធី ហៅលោកតា វ៉ិចទ័រ ដែលត្រូវគេស្គាល់ថាជាផលិតករកម្មវិធីល្បីឈ្មោះប្រចាំ CTN បានបដិសេធថា លោកមិនបានដាក់សម្ពាធលើកូនប្រុសពៅនោះទេ ដោយអះអាងថាដ្បិតថាក្មេងប្រុសម្នាក់នេះ មិនមានចំណូលចិត្តក្នុងការសម្ដែងតាំងពីមុនប្រាកដមែន
តែគេក៏មានទេពកោសល្យដោយខ្លួនឯង។
ការលើកឡើងនេះ គឺបន្ទាប់ពីមានការប្រកាសថាកូនពៅរបស់លោកមានចំណូលចិត្តចង់ក្លាយជាអ្នកបើកយន្តហោះ មិនចង់សម្ដែងនោះទេ ប៉ុន្តែលោកជំរុញអោយចេះរកលុយពីការសម្ដែងដោយបានទាំងដាក់សម្ពាធអោយប្អូនសម្ដែងជាតួមនុស្សចាស់ ដែលក្មេងធម្មតាមិនអាចទទួលសម្ដែងនោះ។
នៅលើគណនីផ្ទាល់ខ្លួនរបស់លោក សុវណ្ណ រិទ្ធី ហៅលោកតា វ៉ិចទ័រ គេឃើញលោកបង្ហោះរូបថតជាច្រើនសន្លឹកពីសកម្មភាពរបស់កូនពៅរបស់លោក គឺប្អូនប្រុស វ៉ាន់ គាវីន វ័យ១៣ឆ្នាំ ដែលត្រូវលោកតម្រូវអោយសម្ដែងជាមនុស្សពេញកំលោះនិងជាតួអង្គមនុស្សចាស់ ដោយតម្រូវអោយប្អូនសម្ដែងចរឹកបែបចាស់ទុំផង។
អមដោយការបង្ហោះអោយឃើញពីសកម្មភាពសម្ដែងជាតួអង្គមនុស្សចំណាស់ទាំងនោះ លោកក៏បានសរសើរថាអរគុណកូនប្រុសដែលប្រឹងសម្ដែងក្នុងឈុតដែលលោកបានកំណត់ បើទោះជាប្អូនគឺជាដំណក់ឈាមរបស់លោកនៅក្នុងគ្រួសារដែលមិនចូលចិត្តការសម្ដែងបែបនេះទាល់តែសោះ។
លោកបដិសេធថា មិនបានដាក់សម្ពាធអោយកូនប្រុសពៅទទួលយកសម្ដែងនិងបង្ខំអោយគេប្រឹងសម្ដែងជាតួមនុស្សចាស់ ផ្ទុយពីចំណូលចិត្តរបស់ខ្លួននោះទេ ដោយលោកបានចាត់ទុកថាការប្រឹងប្រែងសម្ដែងរបស់គេ
រហូតទទួលបានជោគជ័យគ្រប់ឈុតដែលលោកដាក់អោយ គឺជាដោយសាររតែគេព្យាយាមនិងមានការតាំងចិត្តខ្ពស់មុនពេលសម្ដែងតែប៉ុណ្ណោះ។
លោកនិយាយថាកូនពៅរបស់លោក ទើបតែអាយុ១៣ឆ្នាំទេ ប៉ុន្តែគេមានចរឹតចាស់ទុំ ដោយចូលចិត្តសង្កេត និងស្ដាប់ពីការពន្យល់ច្រើន ទើបលោកដាក់អោយសម្ដែងសាកល្បងក៏ទទួលបានជោគជ័យ ហើយកាន់តែជោគជ័យបន្ថែមទៀត នៅពេលដែលលោកសាកអោយសម្ដែងជាតួចាស់សក់ស្កូវក្នុងឈុតកំប្លែង ក៏អាចធ្វើបាន។
លោកសារភាពថា មុនពេលអោយសម្ដែងក្នុងឈុតកំប្លែង កូនប្រុសពៅរបស់លោកបានប្រាប់លោកថាអត់ចូលចិត្តសិល្បៈនោះទេ ជាពិសេសគឺការសម្ដែងតែម្ដង ដោយសារតែគេហាក់មានក្ដីស្រម៉ៃចង់ក្លាយជាអ្នកបើកយន្តហោះ និងចង់ស្វែងយល់ពីភាសានិងបច្ចេកវិទ្យាដើម្បីឈោងចាប់ជំនាញដែលកូនរបស់លោកចង់បាន
នោះច្រើនជាង។
លោកនិយាយថា «កូនហ្នឹងតាំងពីដើមគឺគាត់និយាយថាអត់ចូលចិត្តសិល្បៈទេ ប៉ុន្តែដល់ពេលសម្ដែងគឺដាក់អីអោយសម្ដែងបានអោយសម្ដែងអីបាន ហើយខ្ញុំអត់មានបង្ខំទេ ខ្ញុំប្រាប់ថាបើកូនធ្វើ(សម្ដែង)បានចាំធ្វើ
បើអត់ប៉ាក៏អត់បង្ខំដែរ ប៉ុន្តែជាក់ស្ដែងគាត់ធ្វើបាន!»។
លោកថាក្នុងចំណោមកូនៗរបស់លោកទាំង៣ ២នាក់បងៗសុទ្ធតែជាតារាសិល្បៈទាំងអស់ ដោយកូនប្រុសពៅជាតន្ត្រីករ ហើយកូនស្រីទី២ គឺវ៉ាន់ នីឡា ជាតារាកំប្លែង ដោយឡែកកូនប្រុសពៅ គឺអត់មានចំណូលសិល្បៈតាំងពីដើម ប៉ុន្តែចុងក្រោយនៅពេលដែលលោកអោយសម្ដែងក៏អាចធ្វើបាន ដោយលោកបញ្ជាក់ថាអត់មានដាក់សម្ពាធណាមួយនោះទេ គឺកូនប្រុសប្រឹងប្រែងសម្ដែងបានដោយផ្ទាល់ខ្លួនប៉ុណ្ណោះ។
លោកតា វ៉ិចទ័រ បន្តថាលោកមានការភ្ញាក់ផ្អើលដែលកូនប្រុសរបស់លោកអាចសម្ដែងជាតួមនុស្សចាស់បាន
ក្នុងពេលដែលគេទើបតែមានវ័យ១៣ឆ្នាំ និងមិនមានចំណូលចិត្តលើវិស័យនេះទាល់តែសោះ។ ក្នុងនាមជាឪពុកលោកអះអាងថាស្គាល់ច្បាស់ពីចំណូលចិត្តរបស់កូន ប៉ុន្តែបណ្ដាលមកពីលោកចង់អោយកូនប្រុសបានស្គាល់ពីការលំបាកនៅក្នុងសិល្បៈខ្លះ ទើបលោកជំរុញអោយចូលសម្ដែងកំប្លែង ហើយលទ្ធផលលោកថាគេធ្វើបានល្អ
ដោយអាចទាំងសម្ដែងជាតួមនុស្សចាស់បានដូចការចង់បានរបស់លោកផង។
យ៉ាងណាមិញ លោកថាកូនប្រុសពៅម្នាក់នេះ នឹងមិនអោយចូលស៊ប់នៅក្នុងការសម្ដែងដូចកញ្ញា នីឡា នោះទេដោយសារតែលោកមិនចង់អោយគេបែកអារម្មណ៍លែងចង់រៀនសូត្រ ហើយចុងក្រោយធ្វើអោយក្ដីប្រាថ្នារបស់កូនប្រុសដែលចង់ក្លាយជាអ្នកបើកយន្តហោះទៅថ្ងៃអនាគតបរាជ័យ។
លោកគម្រោងអោយកូនប្រុសពៅ ប្រឡូកសិល្បៈតែក្នុងស្ថានភាពលេងៗច្រើនជាង បើធៀបនឹងកូនប្រុសស្រី២នាក់ទី១និងទី២របស់លោក ដែលលោកជំរុញអោយក្លាយជាអ្នកភ្លេង និងជាតារាកំប្លែង រហូតយកអាជីពនោះធ្វើជាឆ្នាំងបាយ។ យ៉ាងណាក៏ដោយ បើកូនប្រុសពៅរបស់លោកចង់ដូរក្ដីស្រម៉ៃ មកធ្វើជាតារាសម្ដែង
ជាតារាកំប្លែងអោយលេចធ្លោវិញ គឺលោកនឹងជំរុញ៕