លោកនាយករដ្ឋមន្ត្រី ហ៊ុន សែន បានរំលឹកជាថ្មីថា នឹងមិនផ្ទេរអំណាចដឹកនាំប្រទេស ទៅឲ្យអ្នកដទៃដែលមិនមែនជាសមាជិកគណបក្សកាន់អំណាចនោះទេ ខណៈលោកថា ការបោះឆ្នោតជាតិឆ្នាំនេះ នៅតែបន្តកើតមានដដែល បើទោះជាមានបញ្ហាយ៉ាងណាក៏ដោយ។
ការបញ្ជាក់ជាថ្មីរបស់លោក ហ៊ុន សែន នៅពេលនេះ ធ្វើឡើងក្នុងឱកាសដែលលោកចុះទៅបើកការដ្ឋានសាងសង់ផ្លូវជាតិលេខ ៥ តភ្ជាប់ពីខេត្តបាត់ដំបងទៅខេត្តបន្ទាយមានជ័យ នៅព្រឹកថ្ងៃនេះ។
លោកបានបញ្ជាក់ដោយប្រៀបធៀបការផ្លាស់ប្តូរទេវតាឆ្នាំថ្មី ទៅនឹងឆន្ទៈរបស់លោក ដោយថា គ្មានការផ្លាស់តំណែងនាយករដ្ឋមន្ត្រីកម្ពុជាទៅឲ្យគណបក្សដទៃក្រៅពីកូនចៅនៃគណបក្សប្រជាជនកម្ពុជានោះទេ។
លោកថា៖ « អ្នកខ្លះកាលប៉ុន្មានឆ្នាំមុននោះ! ដូចជាជាង ១០ឆ្នាំមុន និយាយថា ទេ! ម្នាក់នាយករដ្ឋមន្ត្រីហ្នឹងមិនព្រមដូរទៅណាទេហ្ហេ៎? បានជាខ្ញុំប្រាប់ទៅវិញថា ទេ! បើទោះបីជាគេដូរក៏ត្រូវតែកូនទេវតាដូចតែគ្នាទេ!»។
នេះមិនមែនជាលើកទីមួយទេដែលលោកហ៊ុន សែន ប្រកាសមិនផ្ទេរអំណាចដឹកនាំប្រទេសទៅឲ្យគណបក្សដទៃនោះ ជាក់ស្តែងកាលពីថ្ងៃទី២៥ ខែឧសភា ឆ្នាំមុន លោក ហ៊ុន សែន ក៏បានប្រកាសស្រដៀងគ្នានេះដែរ។
សាស្ត្រាចារ្យវិទ្យាសាស្ត្រនយោបាយ លោក សូ ចន្ថា ធ្លាប់មានប្រសាសន៍ប្រាប់វីអូឌីកាលពីថ្ងៃទី២៥ ឧសភា ឆ្នាំ២០១៧ថា ការលើកឡើងពីការរក្សាតំណែងសំរាប់សមាជិកបក្សខ្លួននេះ ជាទស្សនៈហួសសម័យ ដោយថា ក្នុងសង្គមប្រជាធិបតេយ្យ បណ្ដាគណបក្សអាចចូលរួមការបោះឆ្នោតដោយស្មើភាព ដើម្បីប្រកួតប្រជែងទៅដឹកនាំរដ្ឋាភិបាល ពោល គឺមិនមែនផ្ទេរអំណាចបន្ដទៅកូនចៅនោះទេ។
លោកថា៖ «ក្នុងសង្គមប្រជាធិបតេយ្យ ការដោះដូរអំណាច មិនមែនផ្ទេរទៅឲ្យកូនចៅនោះទេ ក៏ប៉ុន្តែ គឺអាស្រ័យលើឆន្ទៈរបស់ប្រជាពលរដ្ឋបោះឆ្នោត និងលទ្ធផលនៃការបោះឆ្នោតតែប៉ុណ្ណោះ មិនមែនអាស្រ័យទៅលើគណបក្សនយោបាយ ទៅលើអ្នកដឹកនាំនោះទេ។ វាអាស្រ័យលើពលរដ្ឋទូទៅដែលចង់ឲ្យមានការផ្លាស់ប្តូរតែប៉ុណ្ណោះ» ។
លោក ហ៊ុន សែន បានកាន់តំណែងជានាយករដ្ឋមន្ដ្រីជាលើកដំបូងចាប់ពីឆ្នាំ១៩៨៥ ដល់១៩៩១ ប៉ុន្ដែ នៅចន្លោះឆ្នាំ១៩៩៣ និង១៩៩៨ លោកបានកាន់តួនាទីជានាយករដ្ឋមន្ត្រីទី២ ក្នុងរដ្ឋាភិបាលចម្រុះនីតិកាលទី១ ដោយកាលណោះគណបក្សប្រជាជនចាញ់ឆ្នោត តែលោក ហ៊ុន សែន មិនព្រមប្រគល់អំណាចទាំងស្រុងទៅឲ្យគណបក្សរាជានិយមហ៊្វុនស៊ិនប៉ិចនោះទេ៕
