ប្រាសាទអង្គរវត្ដ ត្រូវបានក្រុមហ៊ុនអន្ដរជាតិ ផ្ដល់ចំណាត់ថ្នាក់លេខ១ផ្នែកសំណង់ប្រវត្តិសាស្ត្រអស្ចារ្យបំផុតនៅលើពិភពលោក។
តាមគេហទំព័រអាជ្ញាធរជាតិអប្សរាចេញផ្សាយកាលពីថ្ងៃទី២៤ខែឧសភាបានឲ្យដឹងថា Trip Advisor ដែលជាគេហទំព័រទេសចរណ៏ដ៏ល្បីបានផ្តល់ចំណាត់ថ្នាក់លេខ១ដល់ប្រាសាទអង្គរវត្តរបស់កម្ពុជា ថាជាសំណង់ដ៏មានសារៈសំខាន់ផ្នែកប្រវត្តិសាស្ត្រអស្ចារ្យបំផុតនិងទទួលចំណាត់ថ្នាក់លេខ១៣ជាគោលដៅទេសចរណ៍របស់ពិភពលោកសម្រាប់ឆ្នាំ២០១៨នេះ។
គេហទំព័រអាជ្ញាធរជាតិអប្សរាដដែលឲ្យដឹងថា ក្រៅពី Trip Advisor ក៏មានគេហទំព័រនិងទស្សនាវត្តីល្បីៗដែលបានផ្សព្វផ្សាយពីតំបន់រមណីយដ្ឋានទេសចរណ៍នានាលើពិភពលោកផ្ដល់ចំណាត់ថ្នាក់ឲ្យប្រាសាទអង្គរវត្តជាប់លេខ១ជាប់ៗគ្នាចំនួន៥ឆ្នាំផងដែរ។ គេហទំព័រដ៏ល្បីល្បាញ និងទស្សនាវត្ដីផ្សេងៗគ្នា រួមមាន Archaeo Madness និង Lonely Planet ជាដើម។
យោងតាមស្ថិតិដែលចេញផ្សាយដោយគ្រឹះស្ថានអង្គរ ភ្ញៀវទេសចរណ៍អន្តរជាតិបានចូលមកទស្សនារមនីយដ្ឋានអង្គរនៅឆ្នាំ២០១៧មានជិត២លាន៥សែននាក់។
