ប៉ូលីសថៃបានចាប់ខ្លួនជនសង្ស័យប្រាំនាក់ដែលជាសកម្មជនក្រុមអាវក្រហម ព្រមទាំងរឹបអូសអាវុធជាច្រើនដើមពីជនសង្ស័យទាំងនោះទៀតផង។
យោងតាមការចុះផ្សាយរបស់ការសែតបាងកកប៉ុស្តិ៍កាលពីថ្ងៃទី២៥ខែឧសភាម្សិលមិញនេះ ជនសង្ស័យទាំង៥នាក់នោះ មានគម្រោងប្រើប្រាស់អាវុធទាំងនោះ ធ្វើឲ្យមានភាពវឹកវរកើតក្នុងពេលដែលពលរដ្ឋថៃបានចេញធ្វើការតវ៉ាកាលពីថ្ងៃ ទី២២ខែឧសភាកន្លងទៅដើម្បីទាមទារឲ្យរដ្ឋាភិបាលយោធារៀបចំការបោះឆ្នោតឡើងវិញឲ្យបានឆាប់។
តាមអាជ្ញាធរថៃជនសង្ស័យទាំងនោះមកពីខេត្តផ្សេងៗនៃប្រទេសថៃ ហើយពួកគេមានការជាប់ទាក់គ្នាជាមួយសកម្មជន ស្នូលនៃក្រុមអាវក្រហមដែលស្និតនឹងអតីតនាយករដ្ឋមន្រ្តីថៃ ថាកស៊ីន ស៊ីណាវ៉ាត្រា។ ។ តាមសមត្ថកិច្ចថៃដដែលអាវុធដែលអាជ្ញាធរប្រទេសនេះរឹបអូសបានរួមមានកាំភ្លើងវែង ខ្លី រំសេវ និងគ្រាប់បែកដៃជាដើម។
ក្រុមអាវក្រហមថៃ ជាសកម្មជនចលនានយោបាយថៃដែលបង្កើតឡើងនៅឆ្នាំ២០០៦ បន្ទាប់ពីមានការធ្វើរដ្ឋប្រហារទម្លាក់អតីតនាយករដ្ឋមន្រ្តីថៃ ថាកស៊ីន ស៊ីណាវ៉ាត្រា។