បទយកការណ៍៖ កង្វះ​ខាត​ការ​បណ្ដុះ​បណ្ដាល កសិករ​ជ្រើស​រើស​វិធី​ប្រើ​ប្រាស់​ថ្នាំ​គីមី​ដោយ​ខ្លួន​ឯង

ការរាតត្បាត​នៃ​ហ្វូង​ស​ត្វ​ដង្កូវ​ដែលកំពុង​បំផ្លាញស្រូវវស្សា (ដោយ បូ សាវី)

[Quote]

នេះជាការរៀបរាប់របស់កសិករម្នាក់រស់នៅភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្ដាល ពីការប្រើប្រាស់ថ្នាំពុល លើបន្លែ។ លោក ថា ចាន់ធឿន អាយុ ៣១​ឆ្នាំ បាន​ឲ្យ​ដឹង​ថា លោកប្រើប្រាស់ថ្នាំគីមី​សម្រាប់សម្លាប់សត្វល្អិតទៅ​លើ​ដំណាំ​ម្រះចំនួន ២៥​ឆ្នាំមកហើយ ប៉ុន្តែ លោក​ថា លោក​រៀន​ប្រើ​ថ្នាំ​គីមី​នេះ​ដោយ​ខ្លួន​ឯង និង​ចេះ​តៗ​គ្នា។

[Quote2]

បុរសរាងស្គរ​សម្បុរខ្មៅរូបនេះនិយាយថា ថ្នាំពុលដែលទិញយកមកប្រើរាល់ថ្ងៃនេះ លោកមិនសូវចាំឈ្មោះទេ គឺគ្រាន់តែដឹងថា ថ្នាំនោះសម្រាប់សម្លាប់សត្វល្អិតដែលបំផ្លាញបន្លែ​ម្រះ​របស់​គាត់​តែ​ប៉ុណ្ណោះ។

ភ្នែកក្រឡេកទៅមើលម្រះ និងសំបក​ថ្នាំដែលចោលនៅជាប់នឹងខ្ទម លោក ចាន់ធឿន រៀបរាប់ថា កន្លងមក លោកបានពុលថ្នាំ ដោយសារ​ពេលដែលលោកបាញ់ថ្នាំសម្លាប់សត្វល្អិតលើបន្លែ មិនប្រើសម្ភារការពារ។

[Quote3]

កំពុងអង្គុយក្រោមដើមចេកនៅម៉ោង ២​រសៀល អ្នកស្រី យឿន ឆាំ អាយុ ៥៦​ឆ្នាំ រៀបរាប់ប្រាប់អ្នកសារព័ត៌មាន ខណៈដែលអ្នកស្រីទើបទិញ​ថ្នាំមកពីផ្សារដើម្បីបាញ់សម្លាប់សត្វល្អិតថា អ្នកស្រីប្រើប្រាស់ពុលលើបន្លែ ៣០​ឆ្នាំហើយ។ មិន​ខុសពី​កសិករ​ដាំ​ម្រះ​នោះ​ឡើយ កសិករ​ដាំ​បន្លែ​ត្រសក់​រូប​នេះ បាន​ប្រាប់​ថា គាត់​បាន​ប្រើ​ប្រាស់​ថ្នាំ​គីមី​តាម​រយៈ​ការ​ស្វែង​យល់​ដោយ​ខ្លួន​ឯង និង​មិន​បាន​ដឹង​អំពី​របៀប​នៃ​ការ​ប្រើ​ប្រាស់​ថ្នាំ​គីមី​នោះ​ឡើយ។

[Quote4]

សម្បុរខ្មៅ​រាងធាត់ កសិករ​រូបនេះនិយាយថា ថ្នាំពុលដែលកសិករប្រើសម្រាប់សម្លាប់សត្វ​ល្អិត​លើបន្លែភាគច្រើនជាថ្នាំ​យកមក​ពីប្រទេសវៀតណាម ថៃ ចិន កូរ៉េ។

កំពុងដើរមើលបន្លែកសិករម្នាក់ទៀត អ៊ុន ម៉ុន បាន​រៀបរាប់ថា គាត់ និង​កសិករ​ដទៃ​ទៀត បាន​រៀន​ប្រាស់​ប្រាស់​ថ្នាំ​គីមី​ពុល​ដោយ​ខ្លួន​ឯង ដោយ​មិន​មាន​អ្នក​ជំនាញ​ផ្នែក​ថ្នាំ​គីមី​ចុះ​ទៅ​បណ្ដុះ​បណ្ដាល​ពួកគាត់​នោះ​ឡើយ។

សម្លឹងមើលសំបកកំប៉ុងថ្នាំ និងបេជីដែលចោលនៅជាប់របងជិតកន្លែងដាំបន្លែ កសិករ​រូប​នេះ​ប្រាប់​ថា​ គាត់​បារម្ភពីសុខភាពរបស់គាត់ បន្ទាប់​ពី​គាត់​បាន​ប្រើប្រាស់ជី និងថ្នាំពុលនេះអស់រយៈ​ពេល ៣០​ឆ្នាំ​ហើយមក ទាំងមិនបានសិក្សាពីរៀបប្រើ​ប្រាស់​នោះ​ឡើយ។

[Quote5]

អនុភូមិព្រែកត្រែង លោក បែន ជា បាន​ឲ្យ​ដឹង​ថា ពលរដ្ឋ​តែ ១០​គ្រួសារ​ប៉ុណ្ណោះ​នៅ​ក្នុង​ចំណោម​ពលរដ្ឋ​សរុប​នៅ​ក្នុង​ភូមិ​របស់​គាត់ ដែល​បាន​ប្រកប​របរ​ដាំ​បន្លែ​ច្រើន​ជាង​គេ ដោយ​កសិករ​ទាំង​នោះ នាំ​បន្លែ​ទៅ​លក់​នៅ​លើ​ទីផ្សារ​បាន​ចន្លោះ​ពី ៣ ទៅ ៤​តោន​ក្នុង​មួយ​គ្រួសារ។

ប៉ុន្តែ លោក​សារភាព​ថា លោក​មិន​បាន​ដឹង​ថា តើ​ថ្នាំ​គីមី​អ្វី​ខ្លះ ត្រូវ​បាន​កសិករ​ទិញ​យក​ទៅ​ប្រើ​ប្រាស់​នោះ​ឡើយ ហើយ​ក្រុម​កសិករ​បាន​ប្រើ​ប្រាស់​ថ្នាំ និង​ជី​គីមី​តាម​របៀប​ចេះ​តៗ​គ្នា។

[Quote6]

លោកបន្តថា កន្លងមក​អាជ្ញាធរបានស្នើទៅខាងមន្ទីរកសិកម្មឲ្យចាត់អ្នកជំនាញមកបង្រៀន​កសិករពីររបៀបប្រើប្រាស់ថ្នាំ​ពុលលើបន្លែ​ដែរ  ប៉ុន្តែ រហូត​មក​ដល់បច្ចុប្បន្ន​នេះ មិន​មាន​អ្នកជំនាញណាចុះទៅ​បង្រៀន​ប្រជាកសិករ​នោះទេ។

នាយកប្រតិបត្តិអង្គការសេដាកដែលធ្វើការផ្តោតលើកសិកម្ម លោក​ សម វិទូ បាន​មើល​ឃើញ​ជា​ទូទៅ​ថា ប្រជា​កសិករ​ភាគ​ច្រើន​សុទ្ធ​តែ​រៀន​ប្រើ​ប្រាស់​ថ្នាំ​ និង​ជី​គីមី​ដោយ​ខ្លួន​ឯង ឬ​ចេះ​តៗ​គ្នា ប៉ុន្តែ មិន​មាន​អ្នក​ជំនាញ​ផ្នែក​ថ្នាំ​ជីគីមី​កសិកម្ម​ចុះ​ទៅ​បង្រៀន​ដល់​ប្រជា​កសិករ​នោះ​ឡើយ។

វិធី​ប្រើ​ប្រាស់​ថ្នាំ​ និង​ជី​គីមី​កសិកម្ម​បែប​នេះ លោក វិទូ ថា វា​នឹង​បង្ក​ផល​ប៉ះ​ពាល់​ខ្លាំង​ដល់​កសិករ​ខ្លួន​ឯង​ដោយ​ផ្ទាល់ ហើយ​ក៏​ប៉ះ​ពាល់​ដល់​អ្នក​បរិភោគ​បន្លែ​ផង​ដែរ​។

ជាង​នេះទៅ​ទៀត លោក វិទូ អះ​អាង​ថា កង្វះ​ដំណេះ​ដឹង​អំពី​របៀប​ប្រើ​ប្រាស់​ថ្នាំ​ជីគីមី​កសិកម្ម​បែប​នេះ ក៏​នឹង​ធ្វើ​ឲ្យ​ប៉ះ​ពាល់​ដល់​បរិស្ថាន​ផង​ដែរ។

[Quote7]

ក្រសួងកសិកម្ម រុក្ខាប្រមាញ់ និងនេសាទ ឲ្យដឹង​កាល​ពីឆ្នាំមុន​​ថា កម្ពុជាបាន​ចំណាយ​ថវិកា​ជាង ២០០លានដុល្លារអាមេរិក សម្រាប់នាំ​ចូល​បន្លែពីបរទេស ដើម្បីយកមក​ផ្គត់ផ្គង់​តម្រូវការ​ក្នុងស្រុក ដោយ​​ភាគ​ច្រើន​នាំ​ចូល​ពី​ប្រទេស​វៀតណាម។​

បើតាមរបាយការណ៍អង្គការ USAID របស់អាមេរិក បានបង្ហាញថា ពលរដ្ឋកម្ពុជាជាង ៧០ភាគរយកំពុង​ប្រកបរបរកសិកម្ម ប៉ុន្តែ កសិករ​អាចដាំបន្លែបានតែ ១ភាគ៣ នៃតម្រូវការទីផ្សារ ដោយសារបញ្ហាផ្សេងៗ។

ក្រុមកសិករស្នើទៅរដ្ឋាភិបាលឲ្យចាត់អ្នកជំនាញផ្នែកកសិកម្មចុះទៅបង្រៀនពួកគេ ពាក់ព័ន្ធនឹងការប្រើប្រាស់ថ្នាំលើបន្លែ ដោយ​សារ ​បច្ចុប្បន្ននេះ ពួកគេប្រើថ្នាំពុលលើបន្លែ គឺចេះតៗគ្នា។

[Quote8]

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ