នាយករដ្ឋមន្ត្រីកម្ពុជា លោក ហ៊ុន សែន បានលើកឡើងថា កម្ពុជាមានប្រាក់ឈ្នួលគោលខ្ពស់ជាងភូមា បើទោះបីរដ្ឋាភិបាលរបស់លោកមិនបានផ្ញើសារដូចមេដឹកនាំឈ្នះឆ្នោតលោក ស្រី អ៊ុង សានស៊ូជី ដែលប្រកាសហៅពលករចំណាកស្រុកឲ្យមកធ្វើការក្នុងស្រុកវិញក៏ដោយ។
កន្លងទៅមេដឹកនាំមីយ៉ាន់ម៉ា លោកស្រី អ៊ុង សានស៊ូជី ធ្លាប់ បានទៅជួបពលកររបស់គេនៅ ប្រទេសថៃ ដោយ ផ្ញើសារថា «តោះយើងទៅស្រុកយើងវិញ» ខណៈដែលរដ្ឋាភិបាលកម្ពុជាកំពុងបញ្ជូនពល ករ របស់ខ្លួនទៅធ្វើការនៅក្រៅប្រទេសជាចបន្តបន្ទាប់។
ក្នុងពិធីចែកសញ្ញបត្រដល់និស្សិត ក្នុងរាជធានីភ្នំពេញ នាថ្ងៃទី២៧ខែមេសានេះ លោក ហ៊ុន សែន ថ្លែង បែបប្រតិកម្មទៅនឹងការលើកឡើងនេះថា តើពលករចំណាកស្រុករបស់មីយ៉ាន់ម៉ា វិលទៅស្រុកវិញទេ បើ ប្រាក់ឈ្នួលគោលនៅប្រទេសខ្លួនមានត្រឹម៨០ដុល្លារបើនៅថៃប្រាក់ឈ្នួលចន្លោះពី២០០ដុល្លារទៅ៣០០ដុល្លារនោះ?លោក ហ៊ុន សែន បញ្ជាក់ថា នៅកម្ពុជាវិញ ១៥៣ដុល្លារ ហើយថាបើបូកនឹងអត្ថប្រយោជន៍ផ្សេងៗទៀតបានពី១៧០ទៅ១៨០ដុល្លារនោះ។
លោក ហ៊ុន សែន អះអាងថា ការបញ្ជូនពលករ ទៅ ធ្វើការនៅក្រៅប្រទេសនេះ លោកថាមិនមែនមានតែកម្ពុជាទេ គឺវៀតណាម ហ្វីលីពីន រួមទាំងប្រទេសមហាអំណាចអាមេរិកផងដែរ ក៏បញ្ជូនពលរដ្ឋខ្លួនមកស៊ីឈ្នួលនៅកម្ពុជា។
លោកថា៖ «ថាធ្វើយូរៗធ្វើខ្ញុំគេ។ ប៉ុន្តែយើងក៏ត្រូវកុំភ្លេចថា សូម្យីតែអាមេរិក ក៏ចេះដើរស៊ីឈ្នួលគេដែរ។ ឥឡូវសូម្បីតែទូរទស្សន៍បាយ័ន ក៏ជួលអាមេរិកមកជួយធ្វើការដែរ។ អញ្ចឹងមិនមកស៊ីឈ្នួលខ្មែរ។ ហ្អេ! អាហ្នឹងវាអញ្ចឹង»។
នាយកប្រតិបត្តិសម្ព័ន្ធភាពការងារ និងសិទ្ធិមនុស្ស លោក មឿន តុលា យល់ថា ការលើកឡើងរបស់ប្រមុខរដ្ឋាភិបាលត្រូវមួយផ្នែក។ ប៉ុន្តែលោកថា អ្វីដែលកម្ពុជាមិនទាន់ធ្វើបានដូចប្រទេសដទៃនោះ នៅត្រង់ថា ពលកគេមកធ្វើការនៅកម្ពុជា ពួកគេមានជំនាញផ្នែកបច្ចេកទេស ស្វែងរកបទពិសោធន៍ ឬ គ្រប់គ្រងក្រុមហ៊ុនណាមួយ។
តែលោកថា ខុសពីពលករខ្មែរ ដែលទៅធ្វើនៅប្រទេសគេភាគច្រើន ធ្វើជាកម្មករគេ ទទួលបានប្រាក់ខែតិច ហើយប្រឈមនឹងគ្រោះថ្នាក់ការងារ ក្នុងកម្រិតខ្ពស់។
លោកថា៖ «នៅស្រុកគេៗប្រថុយធ្វើចំណាកស្រុក ដោយសារតែគេ ស្វែងរកបទពិសោធន៍។ ដោយលែកខ្មែរយើងៗធ្វើចំណាកស្រុក ដោយបង្ខំចិត្តអត់មានការងារធ្វើគ្រប់គ្រាន់។ ជួនកាលមានការងារធ្វើដែរ តែគ្មានប្រាក់ឈ្នួល អាចរស់នៅបានសមរម្យ ឬក៏ជំពាក់បំណុលគេច្រើនអីអញ្ចឹងទៅ ក៏សម្រេចចិត្តធ្វើចំណាកស្រុក អីអញ្ចឹងទៅ អាហ្នឹងដែលរដ្ឋត្រូវគិត»។
ទោះជាយ៉ាងណា លោក ហ៊ុន សែន អះអាងទៀតថា អ្នកធ្វើចំណាកស្រុក បានផ្តល់ថវិកាចូលជាតិផង និងបង្កើនជីវភាពគ្រួសារបានផង ហើយថា រដ្ឋាភិបាលនឹងព្យាយាម បង្កើនទំនាក់ទំនង ជាមួយប្រទេសជាដៃគូដទៃទៀត ដើម្បីសម្រួលដល់ការងារចំណាកស្រុកនេះ៕
