រដ្ឋាភិបាលកម្ពុជា តាមរយៈក្រសួងប្រៃសណីយ៍និងទូរគមនាគន៍ ប្រកាសដាក់ឲ្យដំណើរការប្រព័ន្ធអ៊ីនធឺ ណិតឥតខ្សែជាសាធារណៈ (Public Wifi) នៅទីតាំងចំនួន៥កន្លែង នៅរាជធានីភ្នំពេញនិងខេត្តមួយ ចំនួនទៀត។
បើតាមសេចក្ដីប្រកាសព័ត៌មាន ផ្សាយកាលពីថ្ងៃទី២៦ខែមេសា ក្រសួងប្រៃសណីយ៍ ឲ្យដឹងថា ទីតាំងចំនួន៥កន្លែង ដែលនឹងត្រូវបំពាក់សេវាអ៊ិនធឺណិត Wifi ឥតគិតថ្លៃ រួមមានសួនច្បារសម្តេច ហ៊ុន សែន និងសួនច្បារមុខព្រះបរមរាជវាំង នៅរាជធានីភ្នំពេញ ហើយ ចំណែក៣កន្លែងទៀត មាននៅវិទ្យាល័យហ៊ុន សែន កំពង់លែង ស្រុកកំពង់លែង ខេត្តកំពង់ឆ្នាំង វិទ្យាល័យ ហ៊ុន សែន ទួលខ្ពស់ ស្រុកទឹកផុស ខេត្តកំពង់ឆ្នាំង និងវិទ្យាល័យអ៊ីវ៉ាស្រង់ ស្រុកគងពិសី ខេត្តកំពង់ស្ពឺ។
ការតម្លើងប្រព័ន្ធអ៊ីធឺណិតនៅតាមទីសាធារណៈនេះ ធ្វើឡើងក្រោមកិច្ចសហប្រតិបត្តិការជាមួយសាជីវកម្មទូរគមនាគន៍កូរ៉េ (KT) និងក្រសួងប្រៃសណីយ៍និងទូរគមនាគន៍កម្ពុជា នៃគម្រោង Pubilc Wifi និង Digital Connectivity for School ដែលភាគីកូរ៉េជាអ្នកផ្ដល់ជំនួយ។ នេះ បើតាមសេចក្ដីប្រកាសព័ត៌មានដដែល។
បើតាមក្រសួងប្រសណីយ៍ ប្រទេសកម្ពុជា មានអ្នកប្រើប្រាស់សេវាអ៊ីនធឺណិតប្រមាណ៨លាននាក់នៅក្នុងឆ្នាំ២០១៧ ពោលគឺប្រមាណ៥០ភាគរយនៃប្រជាជនសរុប៕