ព្រឹត្តិការណ៍មេដឹកនាំកូរ៉េទាំងពីរជួបគ្នានៅថ្ងៃនេះ គឺជាព្រឹតិ្តការណ៍ប្រវត្តិសាស្ត្រដែលពិភពលោកកំពុងតែចាប់អារម្មណ៍ ដែលលទ្ធផលនៃជំនួបនេះពាក់ព័ន្ធទៅនឹងសន្តិសុខ សុវត្ថិភាពនៅក្នុងតំបន់និងពិភពលោក។
ថ្ងៃនេះយើងស្វែងយល់ពីប្រវត្តិ របស់មេដឹកនាំទាំងពីរនេះ។
ដំបូងចាប់ផ្តើមចេញពីមេដឹកនាំកូរ៉េខាងត្បូងគីលោក មូន ជែអ៊ីន។ លោក មូន ជែអ៊ីន កើតនៅសម័យសង្គ្រាមបែងចែកកូរ៉េជាពីរគឺនៅឆ្នាំ១៩៥៣នោះ។ ចំណែកឪពុកម្តាយរបស់លោករត់ភៀសខ្លួនចេញពីកូរ៉េខាងជើងចូលទឹកដីកូរ៉េខាងត្បូង ហើយពួកគេរស់នៅភាគខាងត្បូងនៃកោះ Geoje។ ឪពុករបស់លោកបម្រើការងារនៅពន្ធនាគារ ចំណែកម្តាយជាអ្នកលក់ពងទានៅកំពុងផែប៊ូសាន។
នៅឆ្នាំ១៩៧២ លោក មូន ចូលរៀនសាលាច្បាប់ ប៉ុន្តែរៀនបានតែមួយរយៈខ្លី ត្រូវបានឃាត់ខ្លួន និងឃុំឃាំងនៅពន្ធនាគារដោយសារ លោកដឹកនាំចលនាតវ៉ាប្រឆាំងរដ្ឋាភិបាលផ្តាច់ការដឹកនាំដោយលោក ប៉ាកជុង ហ៊ី ជាឪពុករបស់លោកស្រី ប៉ាក ឃឿនហេ។ ក្រោយមកលោក ត្រូវបានដោះលែងវិញហើយចូលបម្រើកងទ័ពនៅឆ្នាំ១៩៧៦ ហើយក៏ធ្លាប់បះទង្គិចជាមួយកងទ័ពកូរ៉េខាងជើងដែរ។
លោក មូន និង មិត្តរបស់លោកបានបើកក្រុមហ៊ុនមេធាវីមួយ នៅក្នុងទីក្រុងប៊ូសាន ដែលផ្តោតសំខាន់ លើការការពារសិទ្ធិមនុស្ស។
នៅឆ្នាំ២០០៣ មិត្តភ័ត្តិរបស់លោកគឺលោកRoh Moo-hyun ជាប់ឆ្នោតជាប្រធានាធិបតី ចំណែកលោក មូនក្លាយជាមន្ត្រីសំខាន់ម្នាក់ជួយការងារមិត្តភ័ក្តិ ដែលប្រឈ្មោះហៅក្រៅថា Shadow of Roh មានន័យថា ជាស្រមោលរបស់លោក Roh។
លុះដល់ឆ្នាំ២០០៩ មិត្តរបស់លោកគឺលោក Roh Moo-hyun បានធ្វើអត្តឃាតបន្ទាប់ពីមានការស៊ើបអង្កេតថា ជាប់ពាក់ព័ន្ធអំពើពុករលួយទឹកប្រាក់ជា៤លានដុល្លារ។
ក្រោយពេលសភាសម្រេចដកលោកស្រី ប៉ាក ឃឿនហេ ចេញពីតំណែងដោយសារពាក់ព័ន្ធរឿងពុករលួយនិងរំលោភអំណាចរដ្ឋនោះ នៅថ្ងៃទី៩ខែឧសភា២០១៧ លោក មូន ត្រូវបានបោះឆ្នោតជ្រើសរើសជាប្រធានាធិបតី។
ទាំងពេលឃោសនា និងក្រោយពេលជាប់ឆ្នោតលោក មូន តែងថ្លែងថា នឹងធ្វើឲ្យកូរ៉េទាំងពីរមានភាពស្និទ្ធស្នាលគ្នាឆ្ពោះទៅរកការបង្រួបបង្រួមគ្នាវិញ។
លោក គីម ជុងអ៊ុន
លោកគីម ជុងអ៊ុន កើតនៅឆ្នាំ១៩៨៣ ហើយធ្លាប់បានទៅសិក្សានៅប្រទេសស្វីសចំនួន២ឆ្នាំ។ លោក ចូលកាន់តំណែងកាលពីឆ្នាំ២០១១ ក្រោយពេលឪពុករបស់លោកស្លាប់។
ក្រោយពេលឡើងកាន់តំណែង លោក គីម ជុងអ៊ុនបានធ្វើសកម្មភាពបោសសម្អាតផ្ទៃក្នុងដោយសម្លាប់មន្ត្រីអស់ប្រមាណ ៣០០នាក់គិតត្រឹមឆ្នាំ២០១៧ ក្នុងនោះជាង១០០នាក់ជាមន្ត្រីមានតំណែងសំខាន់ៗ។
លោក គីម ជុងអ៊ុនក៏បានស្លាប់ឪពុកមារបស់លោកឈ្មោះ Jang Song Thaek ដោយចោទថា ចង់ផ្តួលរំលំរដ្ឋាភិបាលរបស់លោក។លោក Jang Song Thaek មន្ត្រីជាន់ខ្ពស់នៅកូរ៉េខាងជើងហើយមានភាពស្និទ្ធស្នាលជាមួយកូរ៉េខាងត្បូង និងចិន។
លោក គីម ជុងអ៊ុន ជាមេដឹកនាំដែលមានលក្ខណៈឆេវ ឆាវ និងក្រអើតក្រទម ហើយតែងតែព្រមានប្រើប្រាស់អាវុធនុយក្លេអ៊ែបាញ់ប្រហាររំលាយអាមេរិក។
ប៉ុន្តែមេដឹកនាំវ័យក្មេងឆេវឆាវរូបនេះ បានប្តូរឥរិយាបថស្លូតប៉ូតនិងវិលចូលតុចរចាវិញនៅដើមឆ្នាំ២០១៨នេះ ក្រោយពេលដែលមានការដាក់ទណ្ឌកម្មខ្លាំងពីអង្គការហសហប្រជាជាតិនិង សហរដ្ឋអាមេរិក។