រដ្ឋាភិបាលកម្ពុជានិងឡាវបានឯកភាពបង្កើតកុងស៊ុលនៅខេត្តតាមព្រំដែននិងបើកច្រកព្រំដែនរវាងប្រទេសទាំងពីរបន្ថែមទៀតដោយថា ដើម្បីជំរុញការដោះដូរសេដ្ឋកិច្ច វិនិយោគ និងទេសចរណ៍រវាងប្រទេសទាំងពីរបន្ថែមទៀត។
បើតាមព័ត៌មានដែលចុះផ្សាយនៅលើទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន នារសៀលនេះ នាយករដ្ឋមន្ត្រីកម្ពុជានិងនាយករដ្ឋមន្ត្រីឡាវ លោក ថោងលូន ស៊ីស៊ូលីដ បានជួបពិភាក្សាការងារនៅវិមានសន្តិភាព។ ក្នុងជំនួបនោះ ភាគីឡាវបានស្នើឲ្យកម្ពុជាបន្តកិច្ចសហប្រតិបត្តិការរវាងប្រទេសទាំងពីរបន្ថែមទៀត។ ភាគីឡាវក៏បានជំរុញឲ្យបង្កើនការវិនិយោគ ទេសចរណ៍និងសេដ្ឋកិច្ចរវាងប្រទេសទាំងពីរ ដោយមានការបើកច្រកព្រំដែនថ្មីបន្ថែមទៀនៅតាមព្រំដែនរបស់ប្រទេសទាំងពីរ។
ជាការឆ្លើយតប លោកនាយករដ្ឋមន្ត្រី ហ៊ុន សែន បានឯកភាពចំពោះការលើកឡើងរបស់នាយករដ្ឋមន្ត្រីឡាវនេះ។ ជាមួយគ្ននេះដែរ លោកនាយករដ្ឋមន្ត្រីកម្ពុជានិងឡាវក៏បានឯកភាពគ្នាក្នុងការបើកកុងស៊ុលកម្ពុជានៅក្នុងខេត្តបំប៉ាសាក់របស់ឡាវនិងកុងស៊ុកឡាវនៅក្នុងខេត្តស្ទឹងត្រែងរបស់កម្ពុជាផងដែរ។ ភាគីទាំងពីរក៏បានជំរុញឲ្យមានការដោះស្រាយបញ្ហាព្រំដែន អោយបានឆាប់រហ័សទៀតផងដែរ។ នេះបើតាមព័ត៌មាននៅលើទំព័រហ្វេសប៊ុក លោកនាយករដ្ឋមន្ត្រីដដែល។
គួរបញ្ជាក់ថានាយករដ្ឋមន្ត្រីឡាវ លោក ថោងលូន ស៊ីស៊ូលីដ មកធ្វើទស្សនកិច្ចនៅកម្ពុជាចំនួន២ថ្ងៃគឺពីថ្ងៃទី២៧ដល់ថ្ងៃទី២៨ ខែមិថុនា ឆ្នាំ២០១៦។ ក្នុងដំណើទស្សនកិច្ចនេះ តាមគម្រោងលោកជួបជាមួយលោកនាយករដ្ឋមន្ត្រី ហ៊ុន សែន ប្រធានរដ្ឋសភាលោក ហេង សំរិន ប្រធានព្រឹទ្ធសភា លោក សាយ ឈុំ និងចូលបង្គំគាល់ព្រះមហាក្សត្រកម្ពុជាផងដែរ៕
