អគ្គនាយកដ្ឋានកាំកុងត្រូលនៃក្រសួងពាណិជ្ជកម្មបានហាមមិនឲ្យបរិភោគផលិតផលដែលនាំចូលពីប្រទេសបារាំងឈ្មោះថា គ្រាប់អាល់ម៉ុន និង អែបព្រីខត (Bitter Almonds AB Apricot) ដោយថាផលិតផលទាំងនោះមាន សាធាតុគីមីធ្វើឲ្យប៉ះពាល់សុខភាព។
អគ្គនាយកដ្ឋានកាំកុងត្រូលនៃក្រសួងពាណិជ្ជកម្មបានចេញសេក្ដីជូនដំណឹងមួយចុះថ្ងៃទី២៧ ខែ មេសា ខណៈអាជ្ញាធរប្រទេសបារាំងបានជូនដំណឹងពីការប្រមូលត្រឡប់វិញនូវគ្រាប់អាល់ម៉ុន និង អែបព្រីខត ដែលមានម៉ាកយីហោ UBERTI ពីទីផ្សារប្រទេសបារាំង បន្ទាប់ពីរកឃើញមានចម្លងចូលសារធាតុគីមី Prussic Acid Content លើសកំណត់ច្រើនជាង ២០មីលីក្រាម ក្នុងមួយគីឡូផលិតផល ដែលធ្វើឲ្យប៉ះពាល់ដល់សុខភាពពលរដ្ឋ។
អគ្គនាយកដ្ឋានកាំកុងត្រូលនៃក្រសួងពាណិជ្ជកម្មបានបន្តថាការទទួលទានផលិតផលម្ហូបអាហារដែលមានចម្លងចូលសារធាតុខាងលើលើសពីកម្រិតកំណត់បណ្ដាលឲ្យមានផលប៉ះពាល់ដល់សរីរាង្គក្រពេញទីរូអ៊ីត និងប្រព័ន្ធសរសៃប្រសាទដែលនឹងបង្កជំងឺនានាដូចជា ជំងឺរលាកសរសៃប្រសាទ ជំងឺកង្វះឈាម ដោយកង្វះជីវជាតិវីតាមីន បេ ១២។
អគ្គនាយកដ្ឋានកាំកុងត្រូលបានកំពុងចាត់វិធានការដើម្បីទប់ស្កាត់តាមរយៈការរាំងខ្ទប់មិនឲ្យនាំចូលផលិតផលទាំអនោះ ផ្ដល់ព័ត៌មានដល់ក្រុមហ៊ុននាំចូល អាជីវករលក់ដុំ និងរាយ ក្នុងករណីមាននាំចូលលើទីផ្សារ និងការត្រួតពិនិត្យនៅតាមទីផ្សារធំ តូច ផ្សារទំនើប ដើម្បីសម្រួល និងមានវិធានការតាមនីតិវិធីបើសិនមានការដាក់តាំងលក់។
បន្ថែមលើនោះអគ្គនាយកដ្ឋានកាំកុងត្រូលក៏អំពាវនាវឲ្យសាធារណៈជន កុំទិញផលិតផលខាងលើ ហើយសហការផ្ដល់ព័ត៌មានដល់មន្រ្តីមានសមត្ថកិច្ចតាមរយៈលេខទូរសព្ទ ៣ខ្សែ ០១២ ២៧ ៨៧ ៨៩ លេខ ០៩២ ៩៩៩ ៨៦៧ និង លេខ ០១២ ៩៨ ៥៥ ៧៧ ក្នុងករណីពលរដ្ឋជួបប្រទះផលិតផលដែលមានសារធាតុដែលហាមឃាត់ខាងលើ៕