រំលឹកទៅកាលពី៤ខែមុនរដ្ឋាភិបាលកម្ពុជាបានបញ្ជារឲ្យកងកម្លាំងអាជ្ញាធរចុះទៅបោសសម្អាតទីតាំងដែលល្បីជាយូរណាស់មកហើយដែលជាកន្លែងចែកចាយ និងប្រើប្រាស់គ្រឿងញៀនដ៏ធំនៅភ្នំពេញនោះគឺ តំបន់ត្រពាំងឈូក។
បត់តាមផ្លូវលំតូចមួយមុខមន្ទីរពេទ្យព្រះកុសមៈ ហៅពេទ្យលោកសង្ឃ អ្នកនឹងឃើញមានផ្សារក្រមួនមួយ ដែលបើកអាជីវកម្មយ៉ាងអ៊ូរអរពេលថ្ងៃ តែស្ងប់ស្ងាត់និងគ្មានពន្លីភ្លើងបំភ្លឺផ្លូវនាពេលរាត្រីនោះ ហើយអ្វីដែលគួរឲ្យចាប់អារម្មណ៍គឺមានផ្លូវតូចៗ ជាច្រើននៅតាមផ្លូវលំនោះ ដែលចូលទៅកាន់ផ្ទះពលរដ្ឋ ដែលសាងសង់ដោយឈើ និងមានផ្លូវជាច្រើនខ្វាត់ខ្វែងនៅខាងក្នុងនោះទៀត តំបន់នោះហើយដែលជាតំបន់ត្រពាំងឈូក ដែលត្រូវបានអាជ្ញាធរចុះទៅបង្ក្រាប និងរុះរើកាលពីខែកុម្ភះឆ្នាំ២០១៧។ បើទោះបីជាមានការបង្ក្រាប និងរុះរើហើយ ក៏ដោយពលរដ្ឋដែលរស់នៅ និងរកស៊ីនៅទីនោះនៅតែបង្ហាញក្តីបារម្ភថា នៅតែកើតមានការប្រើប្រាស់ នឹងចែកចាយគ្រឿងញៀនដដែល តែតូចៗ និងស្ថិតក្នុងរូបភាពក្នុងការចែកចាយលាក់លៀមជាងមុន។
អង្គុយលើម៉ូតូ និងសុំមិនឲ្យបញ្ចេញឈ្មោះ បុរសវ័យកណ្តាលអាយុ៣៧ឆ្នាំ ដែលជាអ្នករត់ម៉ូតូឌុប និងរស់នៅក្នុងតំបន់នោះថា ការចែកចាយគ្រឿងញៀននៅក្នុងតំបន់នេះ នៅតែបន្តកើតមាន តែមិនសូវសកម្មដូចពីមុននោះទេនៅពេលថ្ងៃ តែថានៅពេលយប់ គឺមានអ្នកចែកចាយឡើងទៅផ្លូវខាងលើដើម្បីធ្វើសកម្មភាព ដែលពេលវេលានៃការចែកចាយនោះចាប់ពីម៉ោង៨ល្ងាចទៅ។
លោកថា៖ «ជាពិសេសក្រោយពេទ្យកន្លែងផ្ទះតាម៉ាប់នោះ ច្រើងចង់ងាប់បើថាបិទៗ បានតែខាងក្រោមតែអាខាងលើវានៅតែដដែលហ្នឹង! តែម៉ោង៨ វាចេញមកហើយរហូតដល់ជិតភ្លឺ ដឹងហើយអ្នកធ្វើការគេដឹងគ្រប់តែគ្នាហ្នឹង ហើយយើងនិយាយទៅ វាពិបាកវាប៉ះពាល់គេវាម៉េចកើត និយាយគ្នាយើងចេះតែនិយាយបានហើយតែនិយាយវែងឆ្ងាយច្រើនហ្នឹងវាពិបាក»។
លោកបារម្ភថា ការនៅតែលាក់លៀម និងនៅតែមានការចែកចាយនេះ លោកបារម្ភពីសុវត្ថិភាពផ្ទាល់ខ្លួន និងអនាគតរបស់កូនរបស់លោកដែលកំពុងសិក្សា លោកចង់ឲ្យរដ្ឋាភិបាលធ្វើយ៉ាងណាលុបបំបាត់គ្រឿងញៀននេះចេញឲ្យអស់កុំឲ្យមានការចែកចាយគ្រឿងញៀននេះបន្តទៀត។
មិនហ៊ានបញ្ចេញឈ្មោះព្រោះខ្លាចប៉ះពាល់ដល់ការរកស៊ីរបស់ខ្លួន បុរសវ័យប្រហែល៥០ម្នាក់ ដែលជាម្ចាស់ហាងគុយទាវនៅផ្សារបឹងឈូកឲ្យដឹងថា លោកឃើញមានការចែកចាយគ្រឿងញៀននៅតំបន់នេះស្ទើជារៀងរាល់ថ្ងៃ ដោយមានការលាក់បាំង តែលោកថា លោកមិនហ៊ានរាយការណ៍ទៅអាជ្ញាធរទេព្រោះខ្លាចមានបញ្ហាដល់ក្រុមគ្រួសារខ្លួន។
លោកថា៖ «តែខ្ញុំមិនស្គាល់មុខទេ! ឃើញហុចឲ្យអញ្ចឹងលួចហុចឲ្យអញ្ចឹងទៅ ជូនការតែតាមផ្លូវជាតិក៏មានដែរអាផ្លូវធំៗ ខ្ញុំឃើញតើ កញ្ចប់តូចៗប៉ុនហ្នឹង មានអីមានតែអាហ្នឹង! …គេលក់ថ្នាំញៀនមិនគេចង់បានចំណេញលុយ ហើយអូនឯងមិនចង់បានចំណេញលុយ ហើយគេមិនចង់បានចំណេញលុយដូចតែគ្នា ហើយយើងទៅរាយការណ៍មិច រាយការណ៍ប្រសិនជាគេស្អប់យើងទៅធ្វើមិចទៅ? គេរកស៊ីអីរកទៅអាហ្នឹងសំខាន់ទៅលើសមត្ថកិច្ចតើ!»។
បន្ទាប់ពីចុះបង្ក្រាបកាលពីខែកុម្ភះឆ្នាំ២០១៧មក ទីតាំងសន្តិសុខមួយ ត្រូវបានដាក់នៅប្រចាំការក្បែរតំបន់នោះដែលមានប្រជាការពារនៅចាំយាម២៤ម៉ោង ដើម្បីទទួលការរាយការណ៍ពីប្រជាជនពីបទល្មើសគ្រឿងញៀននេះ។
អង្គុយនិយាយគ្នានៅក្នុងទីស្នាក់ការបញ្ជារការស្រាលនៅតំបន់ត្រពាំងឈូក ប្រជាការពារដែលនៅប្រចាំការនៅតំបន់នោះលោក ជុំ រស្មី អាយុ៥១ឆ្នាំ បានប្រាប់អ្នកយកព័ត៌មានវីអូឌីថា លោកទទួលស្គាល់ថា បញ្ហាគ្រឿងញៀននៅតំបន់នេះ គឺមិនទាន់បានបង្ក្រាបបានទាំងស្រុងនោះទេ ដោយថាតំបន់នេះស្ថិតក្រោមការគ្រប់គ្រងរបស់ខណ្ឌចំនួន២ គឺខណ្ឌទួលគោក និងខណ្ឌសែនសុខ។ តែទោះជាយ៉ាងណាលោកបានអះអាងគ្រឿងញៀននៅតំបន់បឹងឈូកនេះ ត្រូវបានដោះស្រាយបាន៨៥%ហើយ។
លោកថា៖ «យើងមិនអាចទៅឃាត់ឃាំងគាត់បានទេ នៅតាមព្រំប្រទល់សាធារណៈសមត្ថកិច្ចខណ្ឌទួលគោក វាមានកន្លងមក មានខ្លះរប៉ាត់រប៉ាយអីអញ្ចឹង អាហ្នឹងខណ្ឌទួលគោក តែខាងខ្ញុំនេះខណ្ឌសែនសុខ អត់មានទេ អត់មានឆ្វេកឆ្វាចចេញតាមថ្នល់ទេ គឺអត់មាន។ ភាគច្រើនចេញម៉ោង១១ ម៉ោង១២ អីអញ្ចឹងយប់យូរដែរ។ ខាងលើ តែខាងក្រោមនេះអត់មានទេ បើក្នុងនោះយូរៗមានម្តងដែរមិនអត់សោះទេ»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាពលោកយង់គឹមអេង ថាបញ្ហាគ្រឿងញៀនដែលនៅតែបន្តនៅតំបន់បឹងឈូកនេះ ព្រោះក្នុងយុទ្ធនាការដែលធ្វើកន្លងមកនោះមិនទាន់មានព័ត៌មានពីការចាប់បានមេខ្លោងធំណាម្នាក់មកធ្វើការផ្តន្ទាទោសនោះទេ ដែលធ្វើឲ្យមេខ្លោងធំៗទាំងនោះនៅតែប្រើប្រាស់តំបន់នេះចែកចាយដដែល។ លោកថា បញ្ហានេះអាចបណ្តាលមកពីមេខ្លោងគ្រឿងញៀននោះមានខ្នងបង្អែកធំៗ ដើម្បីការពារការចែកចាយគ្រឿងញៀននៅតំបន់នេះ។
លោកថា៖ «ខ្ញុំគិតថា ប្រហែលជាឈ្មួញជួញដូរធំៗហ្នឹង គេមិនបានចេញមុខគេប្រើតែកូនចៅតូចតាចរបស់គេមួយចំនួនចែកចាយអញ្ចឹងទៅ ដែលធ្វើឲ្យពិបាកស្វែងរកចាប់អានេះទីមួយ រឿងទីពីរទៀត ទំនងជាឈ្មួញជួញដូរហ្នឹងគាត់មានខ្នងធំៗដែរ ដែលធ្វើឲ្យអាជ្ញាធរពិបាកក្នុងការបង្ក្រាប»។
បើតាមលោក គឹមអេង ដើម្បីដោះស្រាយបញ្ហាគ្រឿងញៀននៅតំបន់នោះ គឺត្រូវរៀបចំសន្តិសុខជាប្រចាំនិងត្រូវស្វែងរកអ្នកដែលចែកចាយ និងមេខ្លោងគ្រឿងញៀននៅតំបន់នោះយកមកផ្តន្ទាទោស ជាពិសេសគួរតែជម្រុញទឹកចិត្តប្រជាជនឲ្យបង្កើតជាសហគមន៍ ដើម្បីតាមដានពីការចេញចូលនិងកំណត់មុខសញ្ញារាយការណ៍ទៅសមត្ថកិច្ច ហើយអាជ្ញាធរមូលដ្ឋានគួរតែមានទំនាក់ទំនងល្អជាមួយពលរដ្ឋនៅតំបន់នោះ។
គួររំលឹកផងដែរថា កាលពីចុងខែមករា កន្លងទៅរដ្ឋមន្ត្រីក្រសួងមហាផ្ទៃលោក ស ខេង បានបញ្ជាឲ្យអាជ្ញាធររាជធានីភ្នំពេញ សហការជាមួយអាជ្ញាធរជាតិប្រយុទ្ធប្រឆាំងគ្រឿងញៀនបង្ក្រាបគ្រឿងញៀននៅតំបន់ត្រពាំងឈូកឲ្យបានក្នុងរយៈពេល១ខែ លើសពីនេះលោកក៏បានបញ្ជាឲ្យតាមរកចាប់ខ្លួនមេខ្លោងជួញដូរនៅតំបន់នេះផងដែរ តែក្នុងយុទ្ធនាការរបស់រដ្ឋាភិបាលនេះមិនទាន់ចាប់ខ្លួនមេខ្លោងណាម្នាក់នៃតំបន់ត្រពាំងឈូកបាននៅឡើយទេ។
ងាកទៅកាន់យុទ្ធនាការបង្ក្រាបគ្រឿងញៀនរបស់រដ្ឋាភិបាលវិញ ក្នុងរយៈពេល៦ខែដើមឆ្នាំ២០១៧នេះ សមត្ថកិច្ចបានអះអាងថា ខ្លូនបង្ក្រាបបានជាង៥ពាន់ករណី និងឃាត់ខ្លួនមនុស្សបានជាង៩ពាន់នាក់៕