មន្ត្រីសមាគមការពារសិទ្ធិមនុស្សអាដហុក បានឲ្យដឹងថា សកម្មជនដីធ្លីម្នាក់នៅខេត្តបន្ទាយមានជ័យ ត្រូវបានតុលាការខេត្តនេះ សម្រេចកាត់ទោសឲ្យជាប់ពន្ធនាគារ ១ឆ្នាំ ក្រោមការចោទប្រកាន់ថា បានលួចវាស់វែងដីរបស់ប្រជាពលរដ្ឋ លក់ទៅឲ្យពលរដ្ឋនៅឃុំផ្សេងទៀត។
អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តបន្ទាយមានជ័យ លោក ស៊ុំ ចាន់គា បានឲ្យដឹងថា អ្នកស្រី ឡុង សុគន្ធី តំណាងសហគមន៍នៅឃុំអូរបីជាន់ ស្រុកអូរជ្រៅ ត្រូវបានសាលាដំបូងខេត្តនេះ សម្រេចកាត់ទោស និងចាប់ដាក់ឃុំរយៈពេល ១ឆ្នាំ កាលពីថ្ងៃទី១៥ ខែមីនាកន្លងមកនេះ ក្រោមការចោទប្រកាន់ថា បានលួចវាស់វែងដីរបស់ប្រជាពលរដ្ឋ លក់ទៅឲ្យពលរដ្ឋនៅឃុំផ្សេងទៀត។
អ្នកឃ្លាំមើលសិទ្ធិមនុស្សរូបនេះ អះអាងថា សកម្មជនដីធ្លីរូបនេះ មិនជាប់ពាក់ព័ន្ធដូចការចោទប្រកាន់នោះឡើយ ប៉ុន្តែ លោកថា តំណាងសហគមន៍រូបនេះ ត្រូវបានកាត់ទោសបែបនេះ ដោយសារតែគាត់បានចេញមុខតវ៉ាជុំវិញជម្លោះដីធ្លីក្នុងសហគមន៍ ហើយអ្នកស្រីក៏កំពុងមានជម្លោះដីធ្លីជាមួយឧកញ៉ា និងមន្ត្រីធំៗមួយចំនួន នៅក្នុងខេត្តនេះផងដែរ។
បើតាមលោក ចាន់គា សមាគមរបស់លោកបានផ្តល់មេធាវី និងដាក់ឯកសារប្តឹងជំទាស់សាលក្រមរបស់សាលាដំបូងនេះ ទៅសាលាឧទ្ធរណ៍រួចហើយកាលពីថ្ងៃទី២៨ ខែមីនា។
លោកបន្ថែមថា៖ «ការឃុំខ្លួនអ្នកស្រី ឡុង សុគន្ធី នេះ ដោយសារគាត់មានប្រជាប្រិយក្នុងការតស៊ូមតិរឿងជម្លោះដីធ្លីក្នុងខេត្តបន្ថាយមានជ័យ។ អញ្ចឹង ចេះទាញគាត់ ចេះតែចោទគាត់ រហូតដល់សម្រេចឃុំខ្លួនគាត់ ១ឆ្នាំទៀត។ យើងមើលឃើញថា វាជារឿងអយុត្តិធម៌ណាស់ បើតុលាការធ្វើអញ្ចឹង វាធ្វើឲ្យប៉ះពាល់ដល់ស្ថាប័នយុត្តិធម៌ខ្លាំងណាស់។ គាត់មានជម្លោះដីធ្លីជាមួយឧញ៉ា សំ ផានណារិទ្ធ ជាមួយអ្នកមានអំណាចជាច្រើនទៀត ដែលដីគាត់កាន់កាប់ហើយ អ្នកទាំងនោះបានចូលទៅរំលោភបំពាន់លើកដីអ្នកស្រី»។
វីអូឌីមិនអាចសុំការឆ្លើយតបពីអ្នកនាំពាក្យសាលាដំបូងខេត្តបន្ទាយមានជ័យ លោក សុខ កែវបណ្ឌិត បានទេជុំវិញបញ្ហានេះ ដោយលោកថា រវល់ជាប់ប្រជុំ។
មន្រ្តីអង្គការឲ្យដឹងថា កាលពី ២ថ្ងៃមុននេះ ប្រជាពលរដ្ឋប្រមាណ ១០០នាក់ បានប្រផ្តុំគ្នាមុខសាលាដំបូងខេត្តនេះ ២ថ្ងៃ ១យប់ ដើម្បីទាមទារឲ្យតុលាការដោះលែងតំណាងរបស់ពួកគេ គឺអ្នកស្រី អ្នកស្រី ឡុង សុគន្ធី ឲ្យមានសេរីភាពវិញ។
មន្រ្តីអង្គការដដែលថា ពលរដ្ឋទាំងនោះប្រមាណ ២៤៦គ្រួសារ មានជម្លោះដីជាមួយឧញ៉ា និងមន្រ្តីមានអំណាចក្នុងខេត្តនេះ ដោយប៉ះពាល់ដីធ្លីសរុប ១ ៣៥០ហិកតា៕