ក្រុមការងារជួយដល់លោកដូណល ត្រាំ និង លោកគីម ជុងអ៊ុន បានធ្វើដំណើរទៅដល់ប្រទេសសិង្ហបុរីកាលពីល្ងាចថ្ងៃចន្ទម្សិលមិញ ដើម្បីរៀបចំសម្រាប់ថ្នាក់ដឹកនាំជួបគ្នានៅថ្ងៃទី១២ខែមិថុនាខាងមុខ។
តាមការចុះផ្សាយរបស់ទីភ្នាក់ងារព័ត៌មានព័ត៌មានជប៉ុនNHK បានឲ្យដឹងថា លោក Kim Chang Son ប្រធានក្រុមការងាររបស់លោក គីម ជុងអ៊ុនបានទៅដល់ប្រទេសសិង្ហបុរីកាលពីយប់ថ្ងៃចន្ទម្សិលមិញ។ ចំណែក ប្រធានក្រុមការងាររបស់លោកត្រាំគឺលោក Joe Hagin បានចាកចេញពីអាមេរិក ហើយទៅដល់ប្រទេសសិង្ហបុរីកាលពីម្សិលមិញដែរ។
សេតវិមានបានប្រកាសថា ក្រុមការងាររៀបចំមុនជំនួបកំពូលនេះ បានទៅដល់ប្រទេសសិង្ហបុរីហើយជួបប្រជុំជាមួយក្រុមការងាររបស់កូរ៉េខាងជើង។
តាមគម្រោងនៅក្នុងជំនួបនេះក៏មានវត្តមានរបស់មេដឹកនាំកូរ៉េខាងត្បូងដែរ ប៉ុន្តែកម្មវិធី ជាក់ស្តែងនៅមិនទាន់បញ្ជាក់ពីវត្តមានរបស់មេដឹកនាំកូរ៉េខាងត្បូងលោក មូន ជែអ៊ីននៅឡើយទេ។
