កម្មករប្រមាណជិត ១០០នាក់បម្រើការងារនៅរោងចក្រ ហ្វឺស ហ្គាវ័ន្ត ស្ថិតក្នុងសង្កាត់ចាក់អង្រែក្រោម បានប្រមូលផ្ដុំគ្នានៅមុខស្ថានទូតកូរ៉េខាងត្បូងប្រចាំប្រទេសកម្ពុជាជាថ្មីទៀតនៅថ្ងៃនេះ ដើម្បីជំរុញទៅស្ថាប័ននេះ ឲ្យពន្លឿនដំណោះស្រាយវិវាទការងាររបស់ពួកគេ ខណៈថៅកែរោងចក្រជនជាតិកូរ៉េជំពាក់ប្រាក់ឈ្នួលកម្មករ ៥ខែមិនព្រមបើកឲ្យ។
ប្រធានសហជីពស៊ីខាឌូប្រចាំរោងចក្រ ហ្វឺស ហ្គាវ័ន្ត លោក ឃឹម មករា មានប្រសាសន៍ថា ក្រុមកម្មករបានសម្រេចទៅរកកិច្ចអន្តរាគមន៍ពីស្ថានទូតកូរ៉េខាងត្បូង ដោយសារពួកគាត់រង់ចាំដំណោះស្រាយពីអាជ្ញាធរយូរពេក និងម្យ៉ាង ថៅកែរោងចក្រនោះ ជាជាតិជាតិកូរ៉េខាងត្បូងដែលកំពុងដំណើរការអាជីវកម្មរបស់ខ្លួនដោយមិនគោរពច្បាប់ការងារកម្ពុជា ធ្វើឲ្យប៉ះពាល់ជីវភាពកម្មករ។
លោក ឃឹម មករា ប្រធានសហជីពស៊ីខាឌូប្រចាំរោងចក្រ ហ្វឺស ហ្គាវ័ន្ត
កម្មករផ្នែកដេរ អ្នកស្រី សេក ទៀរិការ និយាយថា រយៈពេល ៥ខែដែលថៅកែរោងចក្រ ហ្វឺស ហ្គាវ័ន្ត មិនបើកប្រាក់ឈ្នួលនេះ បានធ្វើឲ្យកម្មករជួបការលំបាកច្រើន ដោយក្រុមកម្មករត្រូវនាំគ្នាដេកយាមមុខរោងចក្រ គ្មានលុយបង់ថ្លៃបន្ទប់ជួល ថ្លៃចាយវាយប្រចាំថ្ងៃជាដើម។
អ្នកស្រី សេក ទៀរិការ កម្មករផ្នែកដេរ
ការប្រមូលផ្ដុំរបស់ក្រុមកម្មករទាំងនោះ ស្ថិតនៅក្រោមការឃ្លាំមើលពីអាជ្ញាធរស្លៀកពាក់ស៊ីវិល ហើយសន្តិសុខយាមនៅកោះពេជ្រ មិនអនុញ្ញាតឲ្យក្រុមកម្មករទៅជិតស្ថានទូតនោះទេ ប៉ុន្តែ អនុញ្ញាតឲ្យតំណាងកម្មករម្នាក់ទៅជួបជាមួយតំណាងស្ថានទូត។
មន្រ្តីដែលធ្វើការនៅស្ថានទូត បានប្រាប់ទៅតំណាងកម្មករថា ខាងស្ថានទូតនឹងប្រជុំគ្នាជុំវិញរឿងនេះនៅសប្តាហ៍ក្រោយ និងផ្តល់ចម្លើយមកវិញ បន្ទាប់ពីកិច្ចប្រជុំនោះ។
នៅព្រឹកថ្ងៃនេះផងដែរ ក្រុមកម្មករទាំងនោះក៏បានទៅតវ៉ានៅមុខក្រសួងការងារផងដែរ ដើម្បីជំរុញទៅក្រសួងឲ្យពន្លឿនដំណោះស្រាយសម្រាប់ពួកគេ។
គណៈកម្មការសម្រាប់ដោះស្រាយបញ្ហាកូដកម្មបាតុកម្មនៅក្រុមមុខសញ្ញា លោក ប្រាក់ ចាន់ធឿន បានប្រាប់ទៅក្រុមកម្មករថា នៅម៉ោង ២រសៀលនេះ ក្រសួងនឹងជួបពិភាក្សារជាមួយតំណាងកម្មករ និងភាគីក្រុមហ៊ុនដើម្បីរកដំណោះស្រាយ។
កម្មករអះអាងថា រោងចក្ររោងចក្រ ហ្វឺស ហ្គាវ័ន្ត មានកម្មករសរុប ៣៥០នាក់ ប៉ុន្តែ បច្ចុប្បន្ន នៅសល់កម្មករប្រមាណជាង ១០០នាក់ប៉ុណ្ណោះដែលតស៊ូតវ៉ាទាមទារសំណង ខណៈកម្មករផ្សេងទៀតបោះបង់ការតវ៉ាដោយសារជីវភាពខ្វះខាត៕
