ចិន​​ធ្វើការ​ហោះ​ហើរ​យន្តហោះ​ពាណិជ្ជកម្ម​ផលិត​ក្នុង​ស្រុក​លើក​ដំបូង

យន្តហោះ ARJ21 របស់ក្រុមហ៊ុន Chengdu Airline (រូបភាពពី AFP)

យន្តហោះពាណិជ្ជកម្មមួយគ្រឿងដែលផលិតនៅក្នុងប្រទេសចិនបានធ្វើការហោះហើរដឹកជញ្ជូនលើកដំបូងរបស់ខ្លួនកាលពីថ្ងៃម្សិលមិញ បន្ទាប់ពីការពន្យាពេលអស់រយៈពេលប៉ុន្មានឆ្នាំមកនេះ បានចោទសួរអំពីផែនការរបស់ប្រទេសមួយនេះក្នុងការផលិតយន្តហោះនៅក្នុងស្រុក។

ទីភ្នាក់ងារព័ត៌មាន AFP បានដកស្រង់សម្ដីមន្ត្រីក្រុមហ៊ុន Chengdu Airline ដែលបាននិយាយថាយន្តហោះ ARJ21 របស់ក្រុមហ៊ុននេះបានចេញដំណើរពីមូលដ្ឋានរបស់ខ្លួននៅខេត្តស៊ីឈួន ភាគពាយ័ព្យប្រទេសចិន ហោះហើរទៅកាន់ទីក្រុងពាណិជ្ជកម្មស៊ាងហៃ ដោយផ្ទុកអ្នកដំណើរ៧០នាក់។

អ្នកនាំពាក្យក្រុមហ៊ុននេះបញ្ជាក់ថា អ្នកដំណើរជាងពាក់កណ្ដាលគឺជាអតិថិជនដែលបានទិញសំបុត្រយន្តហោះ និងបានដឹងថា ពួកគេនឹងត្រូវធ្វើដំណើរតាមយន្តហោះថ្មីនោះ។ យន្តហោះនេះនឹងហោះហើរទៅមករវាងទីក្រុងឆឹងទូនិងទីក្រុងស៊ាងហៃ៣លើកក្នុងមួយសប្ដាហ៍។

យន្តហោះនេះគឺជាសមិទ្ធផលនៃកម្មវិធីផលិតយន្តហោះពាណិជ្ជកម្មរបស់ចិនអស់រយៈពេល១៤ឆ្នាំមកហើយនេះ ដែលអាចនឹងប្រកួតប្រជែងនឹងក្រុមហ៊ុនផលិតយន្តហោះ Boeing របស់អាមេរិកនិងក្រុមហ៊ុន Airbus របស់អឺរ៉ុប។

ប៉ុន្តែយន្តហោះនេះនៅមិនទាន់ទទួលបានលិខិតបញ្ជាក់ពីរដ្ឋបាលអាកាសចរណ៍សហព័ន្ធអាមេរិកនៅឡើយទេ។ លិខិតនោះនឹងអនុញ្ញាតឲ្យយន្តហោះនេះហោះហើរនៅលើដែនអាកាសរបស់អាមេរិក។ ចំណែកឯក្រុមហ៊ុនផលិតយន្តហោះអន្តរជាតិ យល់ឃើញថាយន្តហោះថ្មីនេះមិនទាន់ជាការគំរាមកំហែងដល់ការប្រកួតប្រជែងនៅឡើយទេ។

យន្តហោះនេះអាចផ្ទុកអ្នកដំណើរពី៧៨ទៅ៩០នាក់និងអាចហោះហើរបានចម្ងាយពីជាង២ពាន់គីឡូម៉ែត្រទៅ ៣៧០០គីឡូម៉ែត្រ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ