ប្រមុខអង្គការសហប្រជាជាតិលោក បាន គីមូន នៅថ្ងៃនេះបានថ្កោលទោសការវាយប្រហារភេរវកម្មនៅឯព្រលានយន្តហោះអន្តរជាតិនៅទីក្រុងអ៊ីស្តង់ប៊ុល ប្រទេសទួគី ដែលបានសម្លាប់មនុស្សយ៉ាងតិច៣៦នាក់និងរបួសជិត១៥០នាក់។
សារព័ត៌មាន Channel News Asia បានផ្សាយថាក្នុងសេចក្ដីថ្លែងការណ៍មួយរបស់គាត់ លោក បាន គីមូន សង្ឃឹមថាគេនឹងរកឃើញជនដៃដល់និងនាំយកទៅកាត់ទោស។
អ្នកនាំពាក្យប្រមុខអង្គការសហប្រជាជាតិគាំទ្រប្រទេសទួគី ខណៈប្រទេសនេះប្រឈមមុខនឹងការគំរាមកំហែងពីភេរវកម្ម ដែលត្រូវការពង្រឹងកិច្ចប្រឹងប្រែងទាំងក្នុងតំបន់និងអន្តរជាតិ ដើម្បីប្រយុទ្ធប្រឆាំងនឹងអំពើភេរវកម្មនិងអំពើហិង្សាជ្រុលនិយមនេះ។
ការបំផ្ទុះពីរលើកបានវាយប្រហារទៅលើព្រលានយន្តហោះទួគីនៅម៉ោង៣ទៀបភ្លឺ ម៉ោងនៅកម្ពុជា។ រហូតមកដល់ពេលនេះពុំទាន់មានក្រុមណាប្រកាសទទួលខុសត្រូវចំពោះការវាយប្រហារនេះទេ។
នៅថ្ងៃនេះដែរ សេតវិមានក៏បានថ្កោលទោសចំពោះការវាយប្រហារនេះផងដែរ ដោយចាត់ទុកការវាយប្រហារនេះក៏ដូចការវាយនៅព្រលានយន្តហោះទីក្រុងប៊្រុចសែលនៅដើមឆ្នាំនេះផងដែរ ជាសញ្ញាបង្ហាញឲ្យយើងធ្វើការរួមគ្នា។
ចំណែកនៅតំបន់អាស៊ី មេដឹកនាំប្រទេសម៉ាឡេស៊ី ប៉ាគីស្ថាន អូស្ត្រាលី និងជប៉ុន សុទ្ធតែថ្កោលទោសចំពោះការវាយប្រហារភេរវកម្មនេះនិងបានបង្ហាញសាមគ្គីភាពជាមួយប្រជាជននិងរដ្ឋាភិបាលទួគី៕