ក្រសួងមហាផ្ទៃបានណែនាំឲ្យនគរបាលជាតិ ពង្រឹងសមត្ថភាពនិងគ្រប់គ្រងឲ្យបានល្អលើសន្តិសុខឯកជន ដើម្បីឲ្យការបំពេញការងារកាន់តែមានប្រសិទ្ធភាព ឆ្លើយតបនិងតម្រូវការថែរក្សាសន្តិសុខសណ្តាប់ធ្នាប់។
តាមសេចក្តីណែនាំរបស់ក្រសួងមហាផ្ទៃចុះហត្ថលេខា ដោយលោក ស ខេង កាលពីចុងខែឧសភា ហើយវីអូឌីទើបទទួលបាននៅថ្ងៃនេះ បានលើកឡើងថា ក្រុមហ៊ុនសន្តិសុខឯកជនកំពុងចូលរួមយ៉ាងសកម្មក្នុងការការពារ សន្តិសុខ សណ្តាប់ធ្នាប់ និងការពារទ្រព្យសម្បត្តិឯកជន។ ប៉ុន្តែសេចក្តីណែនាំលើកឡើងថា កម្លាំងសន្តិសុខដែលកំពុងបំពេញការងារទាំងនោះ មិនបានទទួលការបណ្តុះបណ្តាលជំនាញវិជ្ជាជីវៈត្រឹមត្រូវតាមច្បាប់កំណត់នោះទេ។
ក្រសួងមហាផ្ទៃក៏បានបញ្ជាឲ្យអគ្គស្នងការដ្ឋាននគរបាលជាតិ និង រដ្ឋបាលរាជធានី ខេត្ត ប្រមូលព័ត៌មានឲ្យបានច្បាស់លាស់ពីចំនួនក្រុមហ៊ុន ការផ្តល់សេវាកម្មសន្តិសុខ ទីតាំងយាម ការផ្លាស់ប្តូរកម្លាំងយាម ជាដើម។ ក្រសួងមហាផ្ទៃក៏បានណែនាំឲ្យនគរបាលរៀបចំការប្រជុំទៀងទាត់ជាមួយក្រុមសន្តិសុខឯកជន ដើម្បីជាការបណ្តុះបណ្តាលជំនាញ និង ចែករំលែកបទពិសោធន៍ការងារ៕
