លោកនាយករដ្ឋមន្ត្រី ហ៊ុន សែន បានថ្លែងថា រឿងនយោបាយលែងជាបញ្ហា ដែលកម្ពុជាត្រូវឈឺក្បាលទៀតហើយ ខណៈលោកបញ្ជាក់ថាគ្មានការពន្យារការបោះឆ្នោត ហើយគណបក្សនយោបាយ ដែលលោកថាបានស្លាប់បាត់មិនអាចរស់ឡើងវិញបានទេ។
ក្នុងពីធីចែកសញ្ញាបត្រជូននិស្សិតនៅភ្នំពេញនៅព្រឹកថ្ងៃចន្ទនេះ លោក ហ៊ុន សែន បានប្រកាសថា ល្បែងនយោបាយនៅកម្ពុជាមិនត្រូវបានរាំងខ្ទប់ដោយនណាម្នាក់ ឬ ក្រុមណាមួយនោះទេ ដោយលោកថា មានគណបក្សនយោបាយជាច្រើនកំពុងត្រៀមចូលរួមប្រកួតការបោះឆ្នោតនាពេលខាងមុខ។
លោកមានប្រសាសន៍ថា៖ «ឥឡូវមិនដឹងជាវាឡប់អី! ឲ្យតែអ្នកណាបង្កើតគណបក្សនយោបាយ សុទ្ធតែអាយ៉ងរបស់ ហ៊ុន សែន ទាំងអស់…។ កាលណាគេធ្វើគណបក្សនយោបាយ បានសេចក្តី ថាភាពខុសគ្នាទោះតិចទោះច្រើន គេបង្កើតគណបក្សហើយ។ បើដូចគ្នាគេចាំបាច់ទៅបង្កើតគណបក្សនយោបាយធ្វើអី គេចូលជាមួយបក្សប្រជាជនហើយ។ […] បញ្ហាដែលលំបាកជាងគេសព្វថ្ងៃនេះ ហើយឈឺក្បាលខ្លាំងជាគេសព្វថ្ងៃនេះ មិនមែនបញ្ហាអ្នកណាចូលបោះឆ្នោត ឬមិនចូលបើឆ្នោតនោះទេ បញ្ហាគ្រោះថ្នាក់ចរាចរណ៍ គឺជារឿងគ្រោះថ្នាក់ជាងគេ»។
លើសពីនេះទៀត លោកនាយករដ្ឋមន្ត្រី ហ៊ុន សែន ក៏បានប្រៀបធៀបអតីតគណបក្សសង្គ្រោះជាតិដែលត្រូវបានរំលាយ ទៅនឹងសាកសពដែលបានស្លាប់បាត់ ហើយមិនអាចរស់ឡើងវិញបាននោះទេ ហើយលោកអះអាងទៀតថា ក៏គ្មានការពន្យារការបោះឆ្នោតផងដែរ។
លោកថា៖ «អ្នកដែលជឿៗងប់! រហូតដល់មានអ្នកខ្លះគេថា បើលោក ហ៊ុន សែន មិនព្រមធ្វើ មិនព្រមពន្យារទេ ច្បាស់ជាគេចាប់លោក ហ៊ុន សែន។ ខ្ញុំសួរថា អាណាក្បាលប៉ានដែក មកចាប់ក្បាល ហ៊ុន សែននោះ។ ប្រាប់ត្រង់ទៅវិញទៅ គេថាគេចាប់ ហ៊ុន សែន! នាយករដ្ឋមន្ត្រីនៃប្រទេសមួយត្រូវគេចូលមកចាប់ខ្លួននៅទីនេះ។ លមើលហើយចូលមក ក្រែងពិបាករកខ្មោចទៅទៀត!»។
ការថ្លែងរបស់លោកនាយករដ្ឋមន្ត្រីនៅថ្ងៃនេះ ទំនងជាកើតឡើងបន្ទាប់ពីអតីតមេដឹកនាំបក្សប្រឆាំងគឺលោក សម រង្ស៊ី បានប្រកាសធ្វើនយោបាយការទូតនៅថ្នាក់អន្តរជាតិ ដើម្បីសង្គ្រោះប្រជាធិបតេយ្យនៅកម្ពុជា និង ដើម្បីជាអ្វីដែលលោក សម រង្ស៉ី ចង់ឃើញគណបក្សសង្គ្រោះជាតិអាចចូលរួមការបោះឆ្នោតនៅខែកក្កដាឡើងវិញ។
ប្រាប់វីអូឌីនៅថ្ងៃនេះ ប្រធានក្រុមអ្នកវិភាគវ័យក្មេងលោង ហង្ស វិទូ យល់ថាការថ្លែងរបស់លោក ហ៊ុន សែន ថាបញ្ហានយោបាយមិនមែនជាបញ្ហារបស់កម្ពុជាទៀតទេនោះ គឺគ្រាន់តែចង់បង្វែរអារម្មណ៍ និងការគិតរបស់ប្រជាពលរដ្ឋពីបញ្ហានយោបាយតែប៉ុណ្ណោះ តែលោកថា មិនអាចបិទបាំងបាននោះទេ។
លោកថា៖ «ក្រដាសមិនអាចខ្ចប់ភ្លើងបានទេ! ទោះបីជា លោកនាយករដ្ឋមន្ត្រី គាត់អះអាងថាគ្មានជម្លោះនយោបាយ គ្មានបញ្ហានយោបាយ ក៏ប៉ុន្តែខ្ញុំមើលឃើញថា ពលរដ្ឋគ្រប់គ្នាគាត់កំពុងតែមានការព្រួយបារម្ភថា នៅពេលមានការបោះឆ្នោត មានតែគណបក្សប្រជាជនដែលជាគណបក្សមានឥទ្ធិពល ដោយគ្មានបក្សប្រឆាំង តើនឹងទៅជាយ៉ាងណា? បើសិនជាលោកនិយាយពីគណបក្សផ្សេងៗចូលរួម អាហ្នឹងមិនមែនជាទល្ហីករណ៍ ជាមូលហេតុចំបងដែលមិនមែនជាបញ្ហានយោបាយនៅកម្ពុជាទេ»។
ជម្លោះនយោបាយនៅកម្ពុជា ត្រូវបានមជ្ឈដ្ឋានទូទៅមើលឃើញថា ហាក់នៅតែបន្តគ្មានដំណោះស្រាយ បន្ទាប់ពីមេដឹកនាំបក្សប្រឆាំង លោក កឹម សុខា ត្រូវបានលោក ហ៊ុន សែន បញ្ជាឲ្យចាប់ខ្លួនដាក់ពន្ធនាគារ ក្រោមការចោទប្រកាន់ថា «ក្បត់ជាតិ» ហើយគណបក្សប្រឆាំងដ៏ធំមួយនេះ ត្រូវបានរំលាយចោលកាលពីពាក់កណ្ដាលខែវិច្ឆិកាឆ្នាំមុន ខណៈលោក សម រង្ស៊ី ដែលកំពុងរស់នៅនិរទេស ហើយរងបណ្តឹងជាងច្រើននោះ ក៏មិនទាន់អាចត្រឡប់មកកម្ពុជា។
បើតាមលោក ហង្ស វិទូ ការដោះលែងលោក កឹម សុខា ឬការរស់ឡើងវិញនៃអតីតគណបក្សសង្គ្រោះជាតិ គឺជាកូនសោរតែមួយគត់ដែលអាចជួយសម្រួលដល់បញ្ហានយោបាយនៅកម្ពុជាឡើងវិញបាន។
បើតាម គ.ជ.ប ការបោះឆ្នោតថ្នាក់ជាតិនេះ នឹងប្រព្រឹត្តិទៅនៅថ្ងៃទី២៩ខែកក្កដា ហើយការចុះបញ្ជីគណបក្សនយោបាយនិងបេក្ខជនឈរឈ្មោះ ត្រូវបានកំណត់ធ្វើឡើងចាប់ពីថ្ងៃទី៣០ខែមេសានេះ រហូតដល់ថ្ងៃទី១៤ខែឧសភាខាងមុខ។ ខណៈស្ថានការនយោបាយនៅកម្ពុជា កំពុងស្ថិតនៅក្នុងស្ថានភាពមិនច្បាស់លាស់ អ្នកតាមដានមួយចំនួនហាក់បានដាក់ក្តីសង្ឃឹមតិចតួច ចំពោះការវិញត្រឡប់មកវិញរបស់អតីតគណប្សសង្គ្រោះជាតិ ដើម្បីធ្វើជាគូប្រជែងដ៏ធំតែមួយគត់ជាមួយគណបក្សប្រជាជនកម្ពុជា។
ករណីនេះ គណបក្សប្រជាជន នៅតែអះអាងពីការមិនផ្តល់សម្បទានណាមួយជាមួយអតីតបក្សប្រឆាំងនោះទេ បើទោះបីមជ្ឈដ្ឋានអន្តរជាតិដាក់ការព្រួយបារម្ភចំពោះការបោះឆ្នោតខាងមុខ និងគំរាមពីទណ្ឌកម្មណាមួយជាបន្តបន្ទាប់លើកម្ពុជានោះ៕