គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ចាប់ផ្តើមទទួលការចុះបញ្ជីគណបក្សនយោបាយឈរឈ្មោះបោះឆ្នោតនិងបញ្ជីបេក្ខជនឈរឈ្មោះបោះឆ្នោត សម្រាប់ការបោះឆ្នោតជ្រើសតាំងតំណាងរាស្ដ្រនីតិកាលទី៦ឆ្នាំ២០១៨ ចាប់ពីថ្ងៃនេះរហូតដល់ពាក់កណ្តាលខែឧសភា។ នេះ បើតាមសេចក្តីប្រកាសព័ត៌មានរបស់ គ.ជ.ប។
បើតាមសេចក្តីប្រកាសព័ត៌មាននៅថ្ងៃនេះ គ.ជ.ប ឲ្យដឹងថា ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោត ចាប់ផ្តើមពីថ្ងៃទី៣០ខែមេសា ហើយបញ្ចប់នៅថ្ងៃទី១៤ខែឧសភាឆ្នាំ២០១៨ វេលាម៉ោង៥និង៣០នាទីល្ងាច ហើយការចុះបញ្ជីគណបក្សនយោបាយនេះ ត្រូវធ្វើនៅ គ.ជ.ប។
កាលពីសប្តាហ៍មុន គណបក្សនយោបាមួយ បានប្រកាសថា ខ្លួនមិនចូលរួមក្នុងការបោះឆ្នោតនៅខែកក្ដដាខាងមុខទេ ដោយថាស្ថានការណ៍នយោយនៅកម្ពុជាគ្មានស្ថិរភាព ហើយថា សមាសភាពចាត់តាំងរបស់ គ.ជ.ប គ្មានសុក្រិត្យភាពលំអៀងទៅខាងរដ្ឋាភិបាល។
ប៉ុន្តែ គ.ជ.ប បានច្រានចោលចំពោះការលើកឡើងថា គ.ជ.ប បំពេញការងារមិនបានត្រឹមត្រូវ ដោយថា ខ្លួនត្រូវបានទទួលស្គាល់ជាស្ថាប័នឯករាជ្យ និងអព្យាក្រឹត ជាពិសេសលទ្ធផលការងាររបស់ខ្លួននៃការរៀបចំការបោះឆ្នោតសកលជ្រើសរើសក្រុមប្រឹក្សាឃុំ សង្កាត់ កាលពីថ្ងៃទី៤ ខែមិថុនា ឆ្នាំ២០១៧៕
