លោកនាយករដ្ឋមន្ត្រី ហ៊ុន សែន ស្តីបន្ទោសរដ្ឋមន្ត្រីក្រសួងការងារ ករណីនៅតែមានកម្មករ តវ៉ាទាក់ទិននឹងថៅកែរត់ចោល មិនបានទូទាត់សំណងតាមច្បាប់ ខណៈរដ្ឋាភិបាលបានបញ្ចេញប្រាក់ជាង៤លានដុល្លារឲ្យដោះស្រាយរួចមកហើយនោះ។
ក្នុងពិធីជួបសំណេះសំណាលជាមួយ កម្មករ នៅខេត្តកណ្តាល នាថ្ងៃពុធនេះ លោក ហ៊ុន សែន បានរំឭកថា កន្លងទៅរដ្ឋាភិបាលបានផ្តល់ប្រាក់បុរេប្រទាន៤លាន៦សែនដុល្លារ ឲ្យក្រសួងការងារ និងបណ្តុះបណ្តាលវិជ្ជាជីវៈ ឲ្យដោះស្រាយបញ្ហាជូនកម្មករ ដែលថៅកែរត់ចោល មិនបានទូទាត់អត្ថប្រយោជន៍ផ្សេងៗ តាមច្បាប់ ស្តីពី ការងារ។
ប៉ុន្តែលោក ហ៊ុន សែន បានចោទជាសំនួរថា ហេតុអ្វីបានមកដល់ពេលនេះ នៅតែមានក្រុមកម្មករ ដើរហែក្បួន និងខ្លះទៀតគ្រោងទៅដាក់ញត្តិដល់ផ្ទះ របស់លោកសុំអន្តរាគមន៍ ជួយដោះស្រាយករណីនេះដដែល។
មេដឹកនាំរូបនេះ បញ្ជាឲ្យរដ្ឋមន្ត្រីក្រសួងការងារ លោក អ៊ិត សំហេង ត្រូវដោះស្រាយបញ្ហានេះឲ្យបានឆាប់ ទោះត្រូវការប្រាក់បុរេប្រទានបន្ថែមទៀត ពីរដ្ឋាភិបាលក៏ដោយ។
លោក ហ៊ុន សែន នាយករដ្ឋមន្ត្រីកម្ពុជា
ក្រោយនាយករដ្ឋមន្ត្រីថ្លែងដោយហៅចំឈ្មោះ លោក អ៊ិត សំហេង បានក្រោកឈរហើយលើកដៃសំពះ ហាក់ទទួលយកការក្រើនរំឭកនេះ។
នៅសប្តាហ៍មុន កម្មករនៅក្រុងតាខ្មៅ ខេត្តកណ្តាល និងនៅសង្កាត់ចាក់អង្រែក្រោម រាជធានីភ្នំពេញ បានដើរហែរក្បួនទៅក្រសួងការងារ និងខ្លះទៅដាក់ញត្តិនៅខុទ្ទការល័យនាយករដ្ឋមន្ត្រី ស្វែងរកកិច្ចអន្តរាគមន៍ជួយដោះស្រាយ ដោយក្រុមកម្មករអះអាងថា ថៅកែបានគេចវេសមិនទូទាត់ប្រាក់អត្ថប្រយោជន៍ផ្សេងៗជូនពួកគេ។
អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា C-CAWDU លោក គង់ អាទិត្យ បានលើកឡើងថា ដើម្បីទប់ស្កាត់ថៅកែខិលខូច និងការពារប្រយោជន៍កម្មករ កុំឱ្យមានករណីនេះកើតឡើងទៀត រដ្ឋាភិបាលត្រូវប្រាកដថា ក្រុមហ៊ុនដែលបានចុះបញ្ជីនៅក្រសួងការងារ ត្រូវដាក់ប្រាក់តម្កល់នៅធនាគារ ឬត្រូវមានមូលនិធិតម្កល់ ដើម្បីការពារហានិភ័យ តាមច្បាប់ការងារ។
ប៉ុន្តែមន្ត្រីសហជីពរូបនេះ យល់ថា ការស្តីបន្ទោស និងចង្អុលមុខចំៗ របស់នាយករដ្ឋមន្ត្រី ទៅលើមន្ត្រីអសកម្ម ថាជាការជំរុញមួយឲ្យកម្មករដែលកំពុងរងគ្រោះមានក្តីសង្ឃឹមឡើងវិញ។
លោក គង់ អាទិត្យ អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា C-CAWDU
បើតាមរដ្ឋមន្ត្រីក្រសួងការងារ លោក អ៊ិត សំហេង ថ្លែងបើកកម្មវិធីព្រឹកមិញនេះ លោកបញ្ជាក់ប្រាប់ថាគិតត្រឹមថ្ងៃពុធនេះ មានរោងចក្រសហគ្រាសជាង១ម៉ឺន ២ពាន់ បានចុះបញ្ជីជាផ្លូវការនៅក្រសួង។ប៉ុន្តែលោកមិនបានរាយការណ៍ថា មានរោងចក្រប៉ុន្មានបានរត់ចោលកម្មករ ដោយមិនបានទូទាត់អត្ថប្រយោជន៍ជូនកម្មករនោះទេ។
ទោះជាយ៉ាងណា លោក ហ៊ុន សែន បានបញ្ជាក់ថា ដើម្បីទប់ស្កាត់កុំឲ្យបញ្ហានេះបន្តធ្លាក់មកលើរដ្ឋាភិបាល លោកថារដ្ឋសភានឹងអនុម័តច្បាប់ តម្រូវឲ្យថៅកែរោងចក្រទូទាត់អត្ថប្រយោជន៍ផ្សេងៗជូនកម្មករ រយៈពេល៦ខែម្តង មិនទុកច្រើនឆ្នាំដូចពេលមុនៗឡើយ។
