ប្រធានាធិបតី​ថ្មី​ហ្វីលីពីន​ស្បថ​ចូល​កាន់​តំណែង សន្យា​ផ្លាស់​ប្ដូរ​នយោបាយ​ជាតិ

(រូបភាពពី BBC)

លោក រ៉ូទ្រីហ្កូ ដូថឺត អាយុ៧១ឆ្នាំបានស្បថចូលកាន់តំណែងប្រធានាធិបតីប្រទេសហ្វីលីពីនហើយនៅថ្ងៃនេះ បន្ទាប់ពីលោកទទួលបានជោគជ័យភ្លូកទឹកភ្លូកដីនៅក្នុងការបោះឆ្នោតកាលពីខែឧសភាកន្លងមក។

អតីតអភិបាលក្រុង Davao ដ៏ចម្រូងចម្រាស់រូបនេះបានឈ្នះការបោះឆ្នោតនយោបាយជាមួយការសន្យា «ធ្វើសង្គ្រាម» ប្រឆាំងនឹងឧក្រិដ្ឋកម្មនិងចាត់ការទៅលើអំពើពុករលួយ។

សារព័ត៌មាន BBC បានដកស្រង់សម្ដីរបស់លោក ដូថឺត ដែលបានថ្លែងនៅពិធីស្បថចូលកាន់តំណែងថា លោកសន្យាធ្វើការផ្លាស់ប្ដូរប្រព័ន្ធនយោបាយរបស់ប្រទេសនេះ។

លោកថ្លែងបន្តថា លោកបានមើលឃើញការធ្លាក់ចុះនៃទំនុកចិត្តរបស់ប្រជាជនទៅលើមេដឹកនាំប្រទេស ប្រព័ន្ធតុលាការ និងសមត្ថភាពមន្ត្រីសាធារណៈ ក្នុងការធ្វើឲ្យជីវិតរបស់ពួកគេកាន់តែល្អប្រសើរ កាន់តែមានសុវត្ថិភាព និងកាន់តែមានសុខុមាលភាព។

លោក ដូថឺត ដែលកម្រចាកចេញពីទីក្រុង Davao នៅភាគខាងត្បូងហ្វីលីពីននោះបានស្បថចូលកាន់តំណែងនៅក្នុងពិធីតូចមួយធ្វើឡើងនៅវិមានរដ្ឋាភិបាលក្នុងទីក្រុងម៉ានីល។ មានតែប្រព័ន្ធផ្សព្វផ្សាយរដ្ឋប៉ុណ្ណោះត្រូវបានគេអនុញ្ញាតឲ្យចូលយកព័ត៌មាននៃព្រឹត្តិការណ៍នេះ ប៉ុន្តែវាក៏ត្រូវបានគេផ្សាយបន្តផ្ទាល់តាមអនឡាញផងដែរ។

យោងតាមរដ្ឋធម្មនុញ្ញ លោក ដូថឺត និងអនុប្រធានាធិបតីលោកស្រី Leni Robredo នឹងកាន់តំណែងនេះមួយអាណត្តិរយៈពេល៦ឆ្នាំ។

លោកស្រី Robredo បានស្បថចូលកាន់តំណែងក្នុងពិធីដាច់ដោយឡែកមួយនៅឯទីក្រុងហ្កេចុង។

លោក ដូថឺត មានកេរ្តិ៍ឈ្មោះល្បីល្បាញក្នុងឋានៈជាអ្នកនៅខាងក្រៅរង្វង់នយោបាយ។

អំឡុងពេលកាន់តំណែងជាអភិបាលក្រុង Davao រយៈពេល២២ឆ្នាំ លោកបានសាងកេរ្តិ៍ឈ្មោះដោយសារលោកជាមនុស្សនិយាយចំៗនិងបានគាំទ្រការសម្លាប់ជនសង្ស័យជាឧក្រិដ្ឋជននៅក្រៅប្រព័ន្ធតុលាការ។

អត្រាឧក្រិដ្ឋកម្មធ្លាក់ចុះយ៉ាងច្រើន ប៉ុន្តែក្រុមសិទ្ធិមនុស្សបានវាយតម្លៃថាមនុស្សជាង១ពាន់នាក់ត្រូវបានគេសម្លាប់ក្រៅនីតិវិធីច្បាប់៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ