រដ្ឋាភិបាលនៃប្រទេសស្វីស សន្យាបន្តគាំទ្រដល់មន្ទីរពេទ្យពេទ្យគន្ធបុប្ផា បន្ទាប់ពីស្ថាបនិកមន្ទីរពេទ្យគន្ធបុប្ផា ដែលល្បីខាងសង្គ្រោះជីវិតកុមារដោយឥតគិតថ្លៃ លោកវជ្ជបណ្ឌិត បេអាត រីច្នឺ បានលាលែងតំណែងពីប្រធានគ្រប់គ្រងមន្ទីរពេទ្យភ្លាមៗ ដោយសារមានជំងឺធ្ងន់ធ្ងរ។ នេះបើតាមសេចក្តីប្រកាសព័ត៌មាន។
នៅក្នុងសេចក្តីប្រកាសព័ត៌មានកាលពីថ្ងៃទី២៩មីនា រដ្ឋាភិបាលនៃប្រទេសស្វីសតាមរយៈតំណាងដោយទីភ្នាក់ងារសម្រាប់ការអភិវឌ្ឍស្វ៊ីស និងកិច្ចសហប្រតិបត្តិការ (SDC) នៅក្នុងប្រទេសកម្ពុជា បានបង្ហាញការសោកស្តាយយ៉ាងជ្រាលជ្រៅ ក្រោយដឹងថា លោកវេជ្ជបណ្ឌិត បេអាត រីច្នឺ កំពុងមានជំងឺធ្ងន់ធ្ងរ។
សេចក្តីប្រកាសព័ត៌មានដដែលឲ្យដឹងថា រដ្ឋាភិបាលនៃប្រទេសស្វ៊ីស រួមជាមួយនឹងមូលនិធិគន្ធបុប្ផា នឹងប្តេជ្ញាចិត្តក្នុងការសហការជាមួយរាជរដ្ឋាភិបាលកម្ពុជា ក្នុងការធ្វើការឆ្ពោះទៅរកនិរន្តរភាពផ្នែកហិរញ្ញវត្ថុ រយៈពេលវែងរបស់មន្ទីរពេទ្យនេះ រួមទាំងធានានៃការបន្តបេសកម្មព្យាលបាលឥតគិតថ្លៃដល់កុមារនិងការថែទាំសុខភាពមាតាមួយ។
ការគាំទ្រដល់មន្ទីរពេទ្យគន្ធបុប្ផានេះ គឺជាផ្នែកសំខាន់មួយនៃការចូលរួមរបស់ប្រទេសស្វ៊ីសនៅក្នុងប្រទេសកម្ពុជា ដែលការគាំទ្រផ្នែកហរិញ្ញវត្ថុនេះធ្វើឡើងចាប់តាំងឆ្នាំ១៩៩៤ ដោយមានចំនួនទឹកប្រាក់ប្រមាណជាង៥៦លានដុល្លារអាមេរិក។
កាលពីថ្ងៃ២៨ខែមីនា ក្រុមប្រឹក្សាភិបាលមូលនិធិគន្ធបុប្ផា នៅទីក្រុងហ៊្សូរីច (Zurich) ប្រទេសស្វីស (Switzerland) បានឲ្យដឹងថា ស្ថាបនិកមន្ទីរពេទ្យគន្ធបុប្ផា លោកវេជ្ជបណ្ឌិត បេអាត រីច្នឺ កំពុងមានជម្ងឺជាទម្ងន់ ហើយលោកនឹងត្រូវលាលែងពីតំណែងពីប្រធានគ្រប់គ្រងមន្ទីរពេទ្យជាបន្ទាន់។
លោកវេជ្ជបណ្ឌិត លោកវជ្ជបណ្ឌិត បេអាត រីច្នឺ មានវ័យ៦៩ឆ្នាំ ជាជនជាតិស្វីស ហើយគឺជាគ្រូពេទ្យកុមារនិងជាអ្នកលេងឧបករណ៍ Cello ម្នាក់ ដើម្បីរៃអង្គាសប្រាក់ជួយមន្ទីរពេទ្យនេះ។ លោក បេអាត រីច្នឺ ជាប្រធានមូលនិធិគន្ធបុប្ផា ដែលបានបង្កើតឡើងក្នុងទីក្រុងហ៊្សូរីច (Zurich) ក្នុងឆ្នាំ១៩៩១។
កាលពីឆ្នាំ២០១៦ ព្រះមហាក្សត្រខ្មែរ នរោត្តម សីហមុនី បានតែងតាំងប្រធានមន្ទីរពេទ្យគន្ធបុប្ផាគឺលោកវេជ្ជបណ្ឌិត បេអាត រីច្នឺ ជាទីប្រឹក្សាក្រសួងសុខាភិបាល ដោយមានឋានៈស្មើរដ្ឋលេខាធិការ។
ជារៀងរាល់ឆ្នាំ មន្ទីរពេទ្យគន្ធបុប្ផា ទទួលព្យាបាលកុមារក្រីក្រកម្ពុជាជាងកន្លះលាននាក់។ ហើយមូលនិធិរបស់លោក បានរៃអង្គាសថវិកាជួយមកដល់កម្ពុជាមានទំហំ៣៧០លានដុល្លារចាប់តាំងពីបង្កើតមក៕