នៅទីបំផុតការប្រកួតអន្តរជាតិកាលពីរសៀលថ្ងៃទី១៧ ធ្នូ នៅលើសង្វៀនទូរទស្សន៍អាស៊ីអាគ្នេយ៍ នៅក្នុងព្រឹត្តិការណ៍ដណ្ដើមជើងឯកជំនាន់ទី១ក្នុងប្រភេទទម្ងន់៦៥គីឡូក្រាម ត្រូវបានបញ្ចប់ហើយ ដោយកីឡាករជា សំនៀង ជាតំណាងរបស់កម្ពុជាជាអ្នកទទួលបានជោគជ័យ បន្ទាប់ពីការប្រកួតនេះមានការចូលរួមដោយកីឡាករកម្ពុជា៤រូបនិងថៃ៤រូបតាំងពីដំបូង។
នេះគឺជាទំព័រប្រវត្តិសាស្រ្តលើកដំបូងដែលកីឡាករកម្ពុជា ជា សំនៀង ទទួលបានខ្សែក្រវាត់ជើងឯក ដោយខ្សែក្រវាត់ជើងឯកនេះគឺកាលីបតែម្ដង ព្រោះជាខ្សែក្រវាត់ជើងឯកអន្តរជាតិ ដែលក្រៅពីបានខ្សែក្រវាត់ក៏បានទឹកប្រាក់អមតម្លៃ៥ពាន់ដុល្លារ។
ការប្រកួតដែលបានធ្វើឡើងយ៉ាងកក្រើកនេះ គឺជាការប្រកួតផ្ដាច់ព្រ័ត្រ បន្ទាប់ពីទូរទស្សន៍អាស៊ីអាគ្នេយ៍បានចំណាយពេលធ្វើការប្រកួតសន្សំពិន្ទុតាមរូបមន្តចែកពូល ហើយកីឡាករកម្ពុជា៣នាក់ និងកីឡាករថៃ៣នាក់
ដែលមានពិន្ទុទាបជាងគេ ត្រូវបានធ្លាក់។ ការប្រកួតមួយនេះ បានចាប់ផ្ដើមឡើងប្រមាណជាច្រើនខែមកហើយ
ដោយកីឡាករកម្ពុជាមានចំនួន៤រូប និងកីឡាករថៃមានចំនួន៤រូប ហើយកីឡាករម្នាក់ៗត្រូវឆ្លងកាត់ការប្រកួតចំនួនម្នាក់៤លើកក្នុងពេលចែកពូល ដើម្បីស្វែងរកកីឡាករដែលមានពិន្ទុខ្ពស់នៅខាងកម្ពុជា និងខាងភាគីថៃអោយឡើងប្រកួតប៉ះគ្នា។
កីឡាករ ជា សំនៀង និងកីឡាករថៃ Phlay Noy ជាកីឡាករ២រូបដែលបានឈានឡើងក្នុងវគ្គដណ្ដើមយកខ្សែក្រវាត់អន្តរជាតិ បន្ទាប់ពីអ្នកទាំងពីរមានពិន្ទុនាំមុខគេក្នុងពូលនីមួយៗ ហើយវាយឈ្នះក្នុងវគ្គពាក់កណ្ដាលផ្ដាច់ព្រ័ត្រមួយតង់ទៀត ដើម្បីកំណត់យកតែ២នាក់អោយឡើងប្រកួតយកខ្សែក្រវាត់។
ការប្រកួតដែលបានធ្វើឡើងកាលពីថ្ងៃទី១៧ ធ្នូ កីឡាករកម្ពុជា ជា សំនៀង មិនត្រូវបានរំពឹងថានឹងឈ្នះកីឡាករថៃនោះទេ ដោយសារតែក្នុងវគ្គសន្សំពិន្ទុ កីឡាករថៃ Phlay Noy បានវាយអោយកីឡាករកម្ពុជារូបនេះសន្លប់ក្នុងទឹកទី៣។ គាប់ជួនជាការប្រកួតនៅថ្ងៃប៉ះគ្នាជាថ្មី ស្រាប់តែកីឡាករកម្ពុជាពិបាកក្នុងការវាយលុកគូប្រកួតនៅអំឡុង២ទឹកដំបូងផងនោះ គឺរឹតតែធ្វើអោយអ្នកគាំទ្រ ជា សំនៀង ពិបាករំពឹង។
កីឡាករកម្ពុជា ត្រូវគេឃើញឆ្លងផុត៥ទឹកយ៉ាងពិបាកបំផុត ដោយក្នុងចំណោម៥ទឹកកីឡាករ ជា សំនៀង
មានឱកាសវាយចូលតែក្នុងទឹកទី៤ និងទី៥ចុងក្រោយបន្តិចប៉ុណ្ណោះ ទើបលទ្ធផលដែលបានប្រកាសឡើង
គឺកីឡាករកម្ពុជាដែលធ្លាប់បរាជ័យក្រោមដៃកីឡាករថៃ Phlay Noy បានក្លាយជាអ្នកឈ្នះកីឡាកថៃទៅវិញដោយលទ្ធផលមិនឯកច្ឆ័ន្ទ គឺគណៈកម្មការ៣ផ្ដល់ពិន្ទុអោយឈ្នះ និងគណៈកម្មការ២ទៀតផ្ដល់ពិន្ទុអោយកីឡាករថៃឈ្នះ ខណៈដែលពិន្ទុសរុបគឺកីឡាករកម្ពុជា បានឈ្នះតែមួយពិន្ទុប៉ុណ្ណោះ។
ជា សំនៀង ទទួលបានទឹកប្រាក់២០លានរៀល ប្រហាក់ប្រហែលនឹង៥ពាន់ដុល្លារអាមេរិក ដោយក្រោយការប្រកាសថាលោកទទួលបានជ័យជម្នះ គឺលោកបានទាំងលត់ជង្គង់អោបកីឡាករថៃផង ដោយសារតែលោកមិននឹកស្មានថាខ្លួនទទួលជោគជ័យលើកីឡាករថៃ។ លោកថានេះជាឱកាសឈ្នះបានខ្សែក្រវាត់ក្នុងជីវិតរបស់ខ្លួន
ហើយលោកក៏មានមោទនភាពណាស់ដែល ដែលធ្លាប់ឆ្លងកាត់ការប្រកួតជម្រើសជើងឯកច្រើនមកហើយ
គឺមិនដែលទទួលបានជ័យជម្នះ ដើម្បីក្លាយជាម្ចាស់ខ្សែក្រវាត់ទាល់តែសោះ ប៉ុន្តែបែរជាបានឈ្នះនៅក្នុងការដណ្ដើមខ្សែក្រវាត់អន្តរជាតិតែម្ដង ដោយបានទឹកប្រាក់តម្លៃ៥ពាន់ដុល្លារបន្ថែមលើកិត្តិយសដែលលោកមិន
ធ្លាប់ស្រម៉ៃក្នុងពេលមានឈ្មោះចូលប្រកួត។
លោកថាគ្មានអ្វីសប្បាយចិត្តជាងទទួលបានខ្សែក្រវាត់ជើងឯកនៅក្នុងព្រឹត្តិការណ៍អន្តរជាតិនេះទេ ហើយលោកក៏បានប្រកាសថានឹងប្រឹងប្រែងរក្សាតំណែងខ្លាំងក្នុងនាមជាម្ចាស់ខ្សែក្រវាត់អន្តជាតិនេះមិនអោយចុះខ្សោយផងដែរ ដើម្បីកុំអោយមានការរិះគន់ថាប្រកួតធ្លាក់ដៃ។
លោក ញាណ សុធី អ្នករៀបចំការប្រកួត បញ្ជាក់ថាចាប់តាំងពីបានបង្កើតព្រឹត្តិការណ៍ប្រដាល់នៅទូរទស្ស៍អាស៊ីអាគ្នេយ៍ មានការប្រកួតជ្រើសរើសជើងឯកអន្តរជាតិចំនួន៥លើកហើយ ដោយក្នុងព្រឹត្តិការណ៍ប្រដាល់ថ្ងៃសៅរ៍វេលាម៉ោង២រៀលមានការប្រកួតជើងឯកអន្តរជាតិបានចំនួន៤លើកហើយ ដោយកីឡាករថៃគ្រងតំណែងជើងឯក២រដូវកាល និងកីឡាករកម្ពុជាគ្រងតំណែងជាម្ចាស់ជើងឯក២ជំនាន់ដែរ។
ដោយឡែកសម្រាប់ការប្រកួតនៅរសៀលថ្ងៃអាទិត្យគឺទើបតែមានការប្រកួតអន្តរជាតិបានមួយលើកប៉ុណ្ណោះ ដោយការប្រកួតលើកទី១នោះ គឺជាការប្រកួតជើងឯកអន្តរជាតិក្នុងប្រភេទទម្ងន់៦៥គីឡូក្រាម និងទើបក្ដោបក្ដាប់បានដោយ កីឡាករ ជា សំនៀង៕