មិនខុសពីការអះអាងរបស់ផលិតករភាគច្រើនដែលបានប្រកាសថាភាពយន្តខ្មែរមិនអាចបន្តសភាពផលិតរឿង
ហើយអង្វរករអោយអ្នកទស្សនាគាំទ្រស្នាដៃកូនខ្មែរ លោក អ៊ិន សុភិន ម្ចាស់ផលិតកម្មមហាហង្សក៏បានប្រកាសផងដែរថា វាល្មមដល់ពេលនោះហើយ ដែលខាងផលិតករក្នុងស្រុកត្រូវតែពង្រឹងគុណភាពផលិតរឿងអោយមានការទទួលស្គាល់ ដោយមិនចេះតែផលិតរឿងឆិនឆៃៗ ហើយស្រែកសុំអោយមហាជនគាំទ្រៗ ក្នុងពេលដែលស្នាដៃរបស់ខ្លួននៅតែមានការកែប្រែគុណភាព។
លោកថ្លែងបែបនេះ ព្រមជាមួយនឹងការប្រកាសផលិតភាពយន្តក្រោយៗ អោយក្លាយជាភាពយន្តប្រកួតប្រជែងតាមរយៈការចាប់ដៃជាមួយផលិតករបរទេស និងអ្នកជំនាញក្នុងស្រុក ដោយមិនធ្វើការផលិតដូចការផលិតមុនៗ។ លោក អ៊ិន សុភិន និយាយថា បន្ទាប់ពីបានចូលរូមប្រកួតភាពយន្តនៅក្នុងមហោស្រពភាពយន្តថ្នាក់ជាតិកាលពីថ្ងៃទី៦ ធ្នូ ធ្វើអោយលោកយល់ដឹងកាន់តែច្បាស់ពីទម្រង់នៃការផលិតភាពយន្តបែបណា អោយមានការគាំទ្រ និងមានទីផ្សារនៅចំណោមអ្នកចេះទស្សនាភាពយន្តខ្នាតធំ និងទីផ្សារក្រៅប្រទេស។
លោកថាវាដល់ពេលហើយដែលខាងផលិតករ ត្រូវតែខំប្រឹងប្រែងធ្វើខ្លួនអោយខ្លាំង ហើយឈប់ស្រែកថ្ងូរថាហេតុអ្វីបានជាអ្នកគាំទ្រក្នុងស្រុកផ្កាប់មុខតែរឿងបរទេស ដោយមើលរំលងភាពយន្តក្នុងស្រុក។ លោកថាបើផលិតករគ្រប់រូបយកចិត្តទុកដាក់ពង្រឹងគុណភាពនិងផលិតភាពយន្តអោយល្អ គឺមិនខ្វះនោះទេចំពោះការគាំទ្រជាពិសេសគឺអ្នកចង់ទស្សនាភាពយន្តល្អៗដែលមានគុណភាព។
លោកប្រកាសចាប់ដៃជាមួយផលិតករបរទេស ដោយចាប់ពីឆ្នាំ២០១៨ទៅ លោកថាផលិតកម្មមហាហង្សនឹងធ្វើភាពយន្តអោយមានគុណភាពនិងមានស្ដង់ដារគ្រប់គ្រាន់ក្រោយការផលិតរួច។ ជាក់ស្ដែងក្នុងការផលិតរឿង «ផ្ទះចុងភូមិ» ដែលលោកប្រកាសឡើងកាលពីថ្ងៃទី១៥ ខែធ្នូ ឆ្នាំ២០១៧ លោកថាជារឿងទី១ដែលខាងមហាហង្សសម្រេចចាប់ដៃជាមួយអ្នកបច្ចេកទេសមកពីបរទេស ដែលមានជំនាញលើការពង្រឹងគុណភាពរឿង
បើទោះជាការចាប់ដៃនោះតម្រូវអោយខាងផលិតកម្មមានការចំណាយខ្ពស់ លើសការផលិតរឿងដែលប្រើតែធនធានផលិតករក្នុងស្រុកសុទ្ធសាធ។
ដ្បិតថា លោក ជុំ វិចិត្រ អ្នកដឹកនាំរឿងរបស់មហាហង្ស បានទទួលតំណែងជាអ្នកដឹកនាំសម្ដែងឆ្នើមប្រចាំមហោស្រពភាពយន្តថ្នាក់ជាតិ ដែលប្រកាសដោយក្រសួងវប្បធម៌ តែលោកប្រកាសថាមិនអាចរំពឹងតែលើមហាហង្សមានអ្នកដឹកនាំរឿងឆ្នើមរួចហើយក៏អត់រវល់ក្នុងការពង្រឹងគុណភាពដោយចាប់ដៃជាមួយអ្នកមានជំនា
ញបន្ថែមទៀតបានទេ គឺដាច់ខាតត្រូវតែរកគន្លឹះពង្រឹងគុណភាពរឿងអោយកាន់តែល្អបន្ថែមទៀត ដើម្បីកុំអោយផលិតកម្មរបស់លោកដែលទើបទទួលបានពានថាជាផលិតកម្មដែលមានអ្នកដឹកនាំសម្ដែងឆ្នើម ត្រូវគេកត់សម្គាល់ថាមិនមានអ្វីប្រែប្រួល។
ការផលិតរឿងក្នុងពេលបន្តបន្ទាប់ លោកថាផលិតកម្មមហាហង្សនឹងចាប់ផ្ដើមចាប់ដៃជាមួយផលិតករបរ
ទេសមួយជំហានម្ដងៗ ជាក់ស្ដែងក្នុងការផលិតរឿង «ផ្ទះចុងភូមិ» នឹងក្លាយជាភាពយន្តទី១ដែលមានអ្នកបច្ចេកទេសកុនជាជនបរទេសចូលរួមពេញទំហឹង ក្នុងពេលដែលការផលិតរឿងចាប់ពីដើមឆ្នាំ២០១៨ គឺនឹងឈានដល់ការចាប់ដៃជាមួយផលិតករបរទេសអោយមកដឹកសម្ដែងអោយផង។
លោកប្រកាសជំហរថា ក្រោយការឈ្នះពានចំនួន១ក្នុងចំណោម៩ដែលបានប្រគល់អោយដោយក្រសួងវប្បធម៌ ក្នុងព្រឹត្តិការណ៍មហោស្រពភាពយន្តថ្នាក់ជាតិ គឺលោកនឹងមានគម្រោងផលិតរឿងមិនគ្រាន់តែដើម្បីអោយមានៗបំពេញតម្រូវការអ្នកទស្សនានោះទេ តែនឹងផលិតអោយមានស្ដង់ដារ អោយមានឱកាសប្រកួតប្រជែងខ្ពស់សម្រាប់ការប្រលងភាពយន្តថ្នាក់ជាតិនៅ២ឆ្នាំក្រោយនិងធ្វើអោយរឿងដែលខ្លួនផលិតបានក្លាយជារឿងដែលអាចឈានចូលទីផ្សារក្រៅប្រទេស។
លោកថាភាពយន្តកម្ពុជាមិនពិបាកដាក់បញ្ចាំងនៅក្រៅប្រទេសនោះទេ អោយភាពយន្តទាំងនោះកុំផ្ដោតលើទម្រង់ខ្មោចខ្លាំងពេក កុំផ្ដោតលើសំណើចខ្លាំងពេក ហើយត្រូវផលិតរឿងមួយអោយមានស្ដង់ដារទាំងប្លង់ ទាំងរូបភាព ទាំងសាច់រឿង និងទាំងការដឹកនាំសម្ដែង។
លោកនៅតែអះអាងថារយៈពេលច្រើនឆ្នាំមកហើយ ដែលក្រុមផលិតករខ្មែរតែងតែថ្ងូរសុំអោយមានការគាំទ្រភាពយន្តក្នុងស្រុក នៅក្នុងកាលៈទេសៈដែលភាពយន្តបរទេសកាន់តែល្អ ហើយភាពយន្តក្នុងស្រុកគឺចេញមិនរួចពីការខ្វះចន្លោះ ជាពិសេសគឺសំឡេងនិងប្លង់។
លោក អ៊ិន សុភិន ប្រកាសថាភាពយន្ត «ផ្ទះចុងភូមិ» នឹងក្លាយជាភាពយន្តសាកល្បងមួយដែលមហាហង្ស
ងាកមកចាប់ដៃជាមួយផលិតករបរទេស ដើម្បីប្រកួតប្រជែងទីផ្សារ ដោយក្រៅពីគ្រោងចំណាយច្រើនជាង៥ម៉ឺនដុល្លារក្នុងការផលិតភាពយន្តក៏ជម្រើសយកតារាសម្ដែងល្អៗយកមកសម្ដែងផងដែរ ដូចជានាយគ្រឿន កញ្ញា ម៉ៅ គឹមធីតា លោកជា សុវណ្ណនរាហ៍ អ្នកនាង សឿន ផាន់ផាភួង, កញ្ញា ដានី អារីយ៉ា, លោក យន់ រិទ្ធយ៉ាន
និងតារាល្បីឈ្មោះជាច្រើនរូបទៀត ដែលការផលិតរឿងនេះគឺលោកសម្រាំងយកតែតារាដែលមានទេពកោសល្យសម្ដែងខ្ពស់ និងមានឈ្មោះបោះសំឡេងនៅក្នុងវិស័យសម្ដែងតែម្ដង។
លោកថាភាពយន្តនេះពោរពេញដោយឈុតឆាកកំប្លែង ខ្មោច រន្ធត់ ស្នេហាព្រាត់ប្រាស អាថ៌កំបាំង និងឈុតឆាកគ្រោះថ្នាក់ជាច្រើនទៀត ទើបតម្រូវអោយផលិតកម្មមហាហង្សត្រូវតែរកអ្នកបច្ចេកទេសបរទេសមកជួយ
ទាំងស្រុង បើទោះមិនទាន់ឈានដល់ការចាប់ដៃអោយផលិតករបរទេសមកជួយលូកលាន់ក្នុងរឿងច្រើនជាងនេះ។
លោកថាភាពយន្តរឿង «ផ្ទះចុងភូមិ» ត្រូវបានដំណើរការចេញថតក្រោយការក្រុងពាលី ដោយតាមគម្រោងគឺអាចរហូតដល់ពាក់កណ្ដាលឆ្នាំឬចុងឆ្នាំក្រោយទើបអាចបញ្ចាំងក្នុងរោងបាន ដោយសារតែលោកចង់ពង្រឹងបច្ចេកទេសផលិត និងគុណភាព ដោយមិនបង្ខំអោយហើយលឿនៗដូចមុន៕