មេធាវីថា សុខភាពលោក កឹម សុខាធ្លាក់ចុះខ្លាំងដោយសារជំងឺទឹកនោមផ្អែម​

មេធាវីអះអាងថា ស្ថានភាពសុខ ភាព​លោក កឹម សុខា ធ្លាក់ចុះខ្លាំងដោយសារតែជំងឺទឹកនោមផ្អែម គឺកម្រិតជាតិស្ករ ឡើងដល់ជាង៣០០។​

លោក ជូង ជូងី មេធាវីការពារក្តី ឲ្យលោក កឹម សុខា ថ្លែងបន្ទាប់ពីសវនាការនៅព្រឹកនេះថា កូនក្តីរបស់លោក កំពុងតែមានបញ្ហាសុខភាពខ្លាំង ដែលត្រូវការព្យាបាលនៅខាងក្រៅពន្ធនាគារ ដោយសារតែជំងឺទឹកនោមផ្អែមធ្វើទុក្ខ។

ទោះយ៉ាងណាចៅក្រមសាលាឧទ្ធរណ៍នៅព្រឹកថ្ងៃព្រហស្បតិ៍នេះ សម្រេចបដិសេធសំណើរនៅក្រៅឃុំរបស់លោក កឹម សុខា។​

លោក កឹម សុខា អតីតប្រធានគណបក្សសង្គ្រោះជាតិ ត្រូវបានសមត្ថកិច្ចចាប់ខ្លួននៅក្នុងផ្ទះរបស់លោក កាលពីរំលងអធ្រាត្រថ្ងៃទី៣ខែកញ្ញា ឆ្នាំ២០១៧។ ចាប់តាំងពីការចាប់ខ្លួនយកទៅឃុំនៅពន្ធនាគារត្រពាំងផ្លុងខេត្តត្បូងឃ្មុំមក ថ្ងៃនេះគឺជាលើកទី១មួយដែល​សមត្ថកិច្ចនាំខ្លួនមកចូលរួមសវនាការនៅភ្នំពេញ។​