ផ្លូវមួយចំនួននៅជុំវិញសាលាឧទ្ធរណ៍មានការដាក់ពង្រាយកម្លាំងការពារ និងរបាំងតឹងរឹង ខណៈតុលាការនាំលោក កឹម សុខា ពីពន្ធនាគារត្រពាំងផ្លុងក្នុងខេត្តត្បូងឃ្មុំ ដើម្បីចូលរួមសវនាការលើបណ្តឹងនៅក្រៅឃុំព្រឹកថ្ងៃព្រហស្បតិ៍នេះ។
ផ្លូវដែលមានការបិទនោះមាននៅក្បែរសាលាឧទ្ធរណ៍ អគារក្បែរៗនោះដូចជា តុលាការកំពូល ផ្លូវជាប់របងព្រះបរមរាជវាំងជាដើម។ ក្រៅពីសមត្ថកិច្ចចរាចរណ៍ នគរបាល ក៏មានកម្លាំងសន្តិសុខសណ្តាប់ធ្នាប់ខណ្ឌប្រចាំការមិនឲ្យមានការឈរនៅជិតរបាំងបិទផ្លូវនេះដែរ។
ទោះយ៉ាងណាសកម្មភាពនៃការបិទផ្លូវនៅព្រឹកនេះ មានទ្រង់ទ្រាយតូចជាងកាលពីថ្ងៃសវនាការរំលាយគណបក្សសង្គ្រោះជាតិកាលពីថ្ងៃទី១៦ខែវិច្ឆិកាឆ្នាំ២០១៧៕