ម្តាយលោក កឹម សុខា យំនៅមុខសាលាឧទ្ធរណ៍ ព្រមទាំងលើកដៃសំពះសុំឲ្យដោះលែងកូនរបស់គាត់ ដោយថា កូនគាត់មិនបានធ្វើសកម្មភាពក្បត់ជាតិដូចការចោទប្រកាន់នោះទេ។
ខណៈលោក កឹម សុខា ត្រូវសមត្ថកិច្ចនាំខ្លួនចូលក្នុងបន្ទប់សវនាការ ម្តាយមានវ័យចំណាស់ និងភរិយាលោក កឹម សុខា ដើរនៅខាងមុខតុលាការ។ ម្តាយដែលមានវ័យចាស់ ដើរមានអ្នកដឹកដៃ មានបង់ក ក្រមា បានយំបណ្តើរ លើកដៃសំពះបណ្តើរ ហើយនិយាយថា ចង់ឲ្យដោះលែងកូនរបស់គាត់។
សវនាការសុំនៅក្រៅឃុំរបស់លោក នៅព្រឹកនេះ មានវត្តមានក្រុមគ្រួសារលោក កឹម សុខា អតីតមន្ត្រីគណបក្សសង្គ្រោះជាតិ មន្ត្រីអង្គការសង្គមស៊ីវិល អង្គការជាតិអន្តរជាតិ និងមន្ត្រីស្ថានទូតផងដែរ ដែលនៅតាមដានខាងក្រៅ និងខាងក្នុងតុលាការ៕