ម្ចាស់ជើងឯកប្រជាធិបតេយ្យរបស់មីយ៉ាន់ម៉ា លោកស្រី អ៊ុងសាន ស៊ូជី គឺទំនងជាពន្លឿនការបោះឆ្នោតរើសប្រធានាធិបតីរបស់ប្រទេសនេះ ដោយការផ្លាស់ប្ដូរនៅនាទីចុងក្រោយនេះធ្វើឡើងបន្ទាប់ពីមានកិច្ចពិភាក្សាអស់ជាច្រើនសប្តាហ៍ជាមួយក្រុមយោធាដែលគាំទ្ររដ្ឋធម្មនុញ្ញដែលរារាំងមិនឲ្យលោកស្រីទទួលបានតំណែងដ៏ខ្ពស់ជាងគេរបស់ប្រទេសនេះ។
សារព័ត៌មាន Reuters បានរាយការណ៍ថា សភាមីយ៉ាន់ម៉ាដែលគ្របដណ្តប់ដោយគណបក្សសម្ព័ន្ធជាតិដើម្បីប្រជាធិបតេយ្យ (NLD)របស់លោកស្រី អ៊ុងសាន ស៊ូជី ដែលឈ្នះឆ្នោតជាប្រវត្តិសាស្រ្តកាលពីខែវិច្ឆិកា ឆ្នាំ២០១៥នោះ នឹងផ្លាស់ប្តូរកាលបរិច្ឆេទនៃការបោះឆ្នោតប្រធានាធិបតី ដែលកាលពីលើកមុនបានកំណត់យកថ្ងៃទី១៧ ខែមីនា។ នេះបើយោងតាមរបៀបវារៈសម្រាប់សម័យប្រជុំសភានៅថ្ងៃអង្គារនេះ។
សមាជិកគណបក្សសម្ព័ន្ធជាតិដើម្បីប្រជាធិបតេយ្យ និងអ្នកវិភាគនិយាយថា គណបក្សនេះគឺទំនងជាបង្កើនល្បឿនការបោះឆ្នោត ដើម្បីបញ្ចប់ជម្លោះរវាងកងទ័ព និងគណបក្សរបស់លោកស្រី ដែលបានអូសបន្លាយពេលអស់ច្រើនសប្ដាហ៍មក ទៅលើបញ្ហាថាតើរដ្ឋធម្មនុញ្ញសរសេរដោយរបបយោធាដែលរារាំងលោកស្រី ស៊ូជី ពីការក្លាយជាប្រធានាធិបតីនោះ គួរត្រូវធ្វើវិសោធនកម្ម ឬយ៉ាងណា។
ដើមឡើយ កាលបរិច្ឆេទនៃការបោះឆ្នោតជ្រើសរើសប្រធានាធិបតីនេះត្រូវបានកំណត់តែពីរសប្តាហ៍ប៉ុណ្ណោះ មុនពេលការចាប់ផ្ដើនៃរដ្ឋាភិបាលថ្មីដែលត្រូវបានកំណត់ថានឹងចាប់ផ្តើមនៅថ្ងៃទី១ ខែមេសា។ កាលបរិច្ឆេទនោះបានផ្ដល់ពេលឱ្យលោកស្រី ស៊ូជី ដើម្បីមានពេលចរចាសម្រាប់លក្ខខណ្ឌនៃការផ្លាស់ប្ដូរនេះ។ ប៉ុន្តែក្រុមអ្នកវិភាគយល់ថា ដោយសារមានការប្រឈមជាមួយយោធាឥតឈប់ឈរនោះ លោកស្រីស៊ូជី បានសម្រេចចិត្តពន្លឿនការបោះឆ្នោត ដើម្បីមានពេលសម្រាប់រៀបចំសម្រាប់រដ្ឋាភិបាល៕
ប្រភព៖ Channel News Asia
