មេដឹកនាំបក្សកាន់អំណាច បានបន្តឌឺដងទៅបក្សប្រឆាំងថា ដោយសារតែប្រឆាំងខុសរឿង ទើបរលាយ និងខ្លះជាប់ពន្ធនាគារ ខណៈអន្តរជាតិកំពុងដាក់សម្ពាធឲ្យរដ្ឋាភិបាលស្តាប្រជាធិបតេយ្យឡើងវិញ។
លោកនាយករដ្ឋមន្ត្រី ហ៊ុន សែន និងជាមេដឹកនាំបក្សកាន់អំណាច ក្នុងពិធីមួយនៅខេត្តកំពង់ចាម នៅថ្ងៃនេះ បានថ្លែងបែបរំឭកដោយមិនបញ្ចេញឈ្មោះថា កន្លងទៅគេទាមទារឲ្យលោកចុះចេញពីដំណែង ដោយថា ខណៈលោកកំពុងកាន់អំណាចស្របច្បាប់ តាមការបោះឆ្នោត។
លោកថា៖ «ព្រោះខ្ញុំព្រះករុណាខ្ញុំ មនុស្សខុសគេ បើមិនចង់ឲ្យទៅ គឺទៅ ហើយបើចង់ឲ្យចេញ អញនៅ តែប៉ុណ្ណឹង។ រឿងអីមកស្រែក ហ៊ុន សែន អើយចុះចេញទៅ អញឈ្នះឆ្នោតសោះ។ ហ៊ុន សែន អើយចុះចេញទៅ ស្រែកដូចខ្មោចទារបាយ ចាំតែចុះតើ?»។
លោក ហ៊ុន សែន ថ្លែងបែបឌឺដងថា ការប្រឆាំងខុសរឿងបែបនេះហើយ បានជំរុញឲ្យមានការំលាយគណបក្ស និងអ្នកខ្លះកំពុងដេក«គុក»។
លោកថា៖«ដោយសារតែអញ្ចឹងបានវាជាប់គុក។ ដោយសារអញ្ចឹងបានវារត់ចោលស្រុក។ ដោយសារអញ្ចឹងបានវារលាយ រឿងវាអញ្ចឹង។ ហើយបើវាធ្វើល្អ អាហ្នឹងវាអស់សាច់រឿងហើយ វាមានអីទាស់ទៀត ហើយខ្ញុំព្រះករុណា មិនមែនជាអ្នកបង្កើតរឿងបង្កើតរ៉ាវទេ»។
ក្រោយពីគណបក្សប្រឆាំង បានកើនសំឡេងគាទ្រទាំងនៅរដ្ឋសភា និងក្រុមប្រឹក្សាឃុំ-សង្កាត់ ប្រហាក់ប្រហែលនឹងបក្សកាន់អំណាចដែរនោះ មេដឹកនាំបក្សប្រឆាំងលោក កឹម សុខា ត្រូវបានចាប់ឃុំខ្លួនទាំងមានអភ័យឯកសិទ្ធិសភា នៅថ្ងៃទី៣កញ្ញាឆ្នាំមុន ចោទថា«ក្បត់ជាតិ»។
ក្រោយមក នៅថ្ងៃទី១៦ ខែវិច្ឆិកាឆ្នាំ២០១៧ តុលាការកំពូលបានប្រកាសរំលាយគណបក្សនេះ ព្រមទាំងហាមមន្ត្រីជាន់ខ្ពស់របស់បក្សនេះ ១១៨នាក់ផ្សេងទៀត មិនឲ្យធ្វើនយោបាយរយៈពេល ៥ឆ្នាំទៀតផង។
គិតត្រឹមថ្ងៃព្រហស្បតិ៍នេះ លោក កឹម សុខា ត្រូវឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ ជិត ៦ខែមកហើយ។
ការចាប់ឃុំខ្លួនមេដឹកនាំបក្សប្រឆាំង ប្តឹងរំលាយគណបក្សសង្គ្រោះជាតិ និងបិទលំហប្រជាធិបតេ្យ ជំរុញឲ្យប្រទេសលោកសេរី ផ្តាច់ជំនួយជាបន្តបន្ទាប់ ដល់រដ្ឋាភិបាលកម្ពុជា និងគំរាមដាក់ទណ្ឌកម្មសេដ្ឋកិច្ច បើមិនស្តារប្រជាធិបតេយ្យឡើងវិញ។
អ្នកវិភាគនយោបាយ លោកបណ្ឌិត មាស នី យល់ថា សារបែបនេះបង្ហាញថា អ្នកនយោបាយ នៅតែយកគ្នាជាសត្រូវ ក្នុងការប្រជែងអំណាច ដូចពីអតីតកាល ទោះបីរដ្ឋធម្មនុញ្ញចែងថា កម្ពុជាអនុវត្តលទ្ធិប្រជាធិបតេយ្យក៏ដោយ។
លោក មាស នី វិភាគទៀតថា បើស្ថានការនយោបាយ មិនវិលថយក្រោយ ងាកទៅរៀបចំការបោះឆ្នោតមួយ ឲ្យមានតម្លាភាព និងយុត្តិធម៌ទេ លោកថា រដ្ឋាភិបាលថ្មីកើតក្រោយបោះឆ្នោត និងជួបវិបត្តិទាំងផ្នែកសេដ្ឋកិច្ចនិង នយោបាយលើឆាកអន្តរជាតិ តាមរយៈសម្ពាធ ពីប្រទេសលោកសេរី។
លោកថា៖ «បើសិនជារដ្ឋាភិបាលនៅទីក្រុងភ្នំពេញគាត់នៅតែធ្វើអីដែលវាបង្ហាញថារំលោភសិទ្ធិមនុស្សអីធ្ងន់ធ្ងនៅក្នុងអាណត្តិរបស់គាត់ខាងក្រោយហ្នឹងទៀត រឿងព្យួរអាសនៈ[នៅអង្គការសហប្រជាជាតិ]ជារឿងមួយបន្ទាប់។ប៉ុន្តែខ្ញុំគិតថាវាទម្រាំចូលដល់ចំនុចហ្នឹង វាត្រូវាករលក្ខខណ្ឌស្អីផ្សេងទៀត»។
យ៉ាងណាក៏ដោយនាយករដ្ឋមន្ត្រីកម្ពុជា លោក ហ៊ុន សែន បានថ្លែងកាលពីខែមុនថា កុំឲ្យបរទេសយកកម្ពុជាធ្វើជាចំណាប់ខ្មាំង ដោយសារតែបញ្ហាប្រជាធិបតេយ្យនៅកម្ពុជា។
ប៉ុន្តែ អ្នកវិភាគថា សហគមន៍អន្តរជាតិ មានកាតព្វកិច្ចឃ្លាំមើល និងជំរុញយន្តការប្រជាធិបតេយ្យនៅកម្ពុជា តាមស្មារតីនៃកិច្ចព្រមព្រៀងសន្តិភាពទីក្រុងប៉ារីស៕
