អ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំកម្ពុជា ស្នើឲ្យរដ្ឋាភិបាលដាក់បញ្ចូលមេរៀនស្តីពីសិទ្ធិមនុស្សទៅក្នុងកម្មវិធីអប់រំរបស់សាលារៀន ដោយអះអាងថាដើម្បីធ្វើឲ្យការគោរពសិទ្ធិមនុស្សមានប្រសិទ្ធិភាព។
អ្នករាយការណ៍ពិសេសផ្នែកសិទ្ធិមនុស្ស គឺលោកស្រី រ៉ូណា ស្មីត បានលើកឡើងបែបនេះ នៅក្នុងរបាយការណ៍មួយ ខណៈលោកស្រីបញ្ចប់ទស្សនៈកិច្ចលើកទី២នៅកម្ពុជា កាលពីថ្ងៃទី៣១ខែមីនា។
លោកស្រី រ៉ូណា ស្មីត បានលើកឡើងថា ការដោះស្រាយបញ្ហាសិទ្ធិមនុស្សត្រូវមានការប្រាស័យទាក់ទងកាន់តែទូលាយឡើង និងមានការពង្រឹងការអប់រំក្នុងន័យទូលាយបំផុត។លោកស្រីមានប្រសាសន៍ថា “វាតម្រូវឲ្យមានសិទ្ធិមនុស្សដាក់បញ្ចូលក្នុងកម្មវិធីសិក្សានៅតាមសាលា ដើម្បីចូលរួមចំណែកឲ្យកាន់តែមានប្រសិទ្ធិភាពថែមទៀតដល់ការយល់ដឹង និងទទួលបាននូវសិទ្ធិមនុស្សដែលកម្ពុជាបានទទួលយកមកអនុវត្តរួចហើយនោះ”។
បើតាមលោកស្រី រ៉ូណា ស្មីត គឺរដ្ឋមន្រ្តីក្រសួងអប់រំ យុវជន និងកីឡា បានស្នើឲ្យលោកស្រីជួយពិនិត្យឡើងវិញនូវកម្មវិធីសិក្សាដើម្បីធានាឲ្យមានការដាក់បញ្ចូលនូវធាតុនានានៃការអប់រំសិទ្ធិមនុស្ស៕