ពលករខ្មែរជិត ២ពាន់នាក់ហើយ ត្រូវបានគេរាយការណ៍ថា រត់គេចចេញពីការចាប់ខ្លួន និងត្រូវបានអាជ្ញាធរថៃចាប់បញ្ជូនត្រឡប់មកប្រទេសកំណើតវិញ តាមច្រកប៉ោយប៉ែត នៅក្នុងរយៈពេលជិត ១សប្ដាហ៍មកនេះ។
ទីភ្នាក់ងារព័ត៌មាន AFP បានរាយការណ៍ថា រដ្ឋាភិបាលថៃកំពុងតែរឹតបន្តឹងច្បាប់គ្រប់គ្រងពលករបរទេសនៅក្នុងប្រទេសថៃ ដែលកំពុងបម្រើការងារក្នុងវិស័យរោងចក្រ នេសាទ និងវិស័យសំណង់។
វិធានការថ្មីរបស់រដ្ឋាភិបាលយោធាថៃនេះ បានជំរុញឲ្យពលករភាគច្រើនមកពីប្រទេសជិតខាង គេចខ្លួន ឬត្រូវបានតម្រួតថៃចាប់បញ្ជូនត្រឡប់ទៅប្រទេសកំណើតវិញ។
នៅឯច្រកព្រំដែនកម្ពុជា-ថៃ ចំនួនពលករដែលគេចខ្លួន ឬត្រូវបានតម្រួតថៃចាប់បញ្ជូនត្រឡប់មកវិញ បានកើនឡើងរៀងរាល់ថ្ងៃ ដោយចំនួនជិត ២ពាន់នាក់ហើយ គិតចាប់ពីថ្ងៃពុធកន្លងមក នៅត្រង់ច្រកព្រំដែនប៉ោយប៉ែតតែមួយប៉ុណ្ណោះ។
AFP បានរាយការណ៍បន្ថែមថា រដ្ឋាភិបាលយោធាថៃនឹងផ្អាកការអនុវត្តបទប្បញ្ញត្តិថ្មីនេះ បន្ទាប់ពីពលករបរទេសជាច្រើនពាន់នាក់ បានគេចខ្លួនវិលត្រឡប់ទៅប្រទេសកំណើតរបស់ពួកគេវិញ។
កាលពីឆ្នាំ២០១៤កន្លងមក ពលករខ្មែរប្រហែល ២៥ម៉ឺននាក់ បានគេចខ្លួន ឬត្រូវបានតម្រួតថៃចាប់បញ្ជូនត្រឡប់មកប្រទេសកំណើតវិញ ក្រោយរដ្ឋប្រហារយោធាមិនបង្ហូរឈាមកាលពីខែឧសភាក្នុងឆ្នាំនោះ៕