ប្រធានគណបក្សប្រឆាំងដែលកំពុងគេចខ្លួនទៅរស់នៅក្រៅប្រទេសហៅការប្រើកម្លាំងទ័ពជើងទឹក ជើងគោក និងជើងអាកាស ដើម្បីសម្លុតជាពលរដ្ឋខ្មែរដូចគ្នាថាជាសកម្មភាពរបស់មនុស្សតិរច្ឆាន។
កាលពីថ្ងៃពុធម្សិលមិញមាននាវាជើងទឹក រថយន្ត និងឧទ្ធម្ភាចក្រផ្ទុកដោយកម្លាំងទ័ព បើកជុំវិញបរិវេណស្នាក់ការកណ្តាលគណបក្សសង្គ្រោះជាតិ នៅសង្កាត់ចាក់អង្រែលើប្រមាណ៤០នាទី។ ចលនារបស់កម្លាំងទ័ពនេះ នាំឲ្យមន្ត្រីគណបក្សសង្គ្រោះជាតិ ប្រជាពលរដ្ឋនៅជុំវិញនោះមានការភ្ញាក់ផ្អើល ហើយសារព័ត៌មានជាតិនិងអន្តរជាតិចាប់អារម្មណ៍ចុះផ្សាយហេតុការណ៍នេះ។
ក្នុងបទសម្ភាសន៍ជាមួយវិទ្យុអាស៊ីសេរី នៅថ្ងៃម្សិលមិញ លោក សម រង្ស៊ី ហៅការចល័តកម្លាំងទ័ពនោះថា ជាការបំភិតបំភ័យពលរដ្ឋ។ លោកហៅសកម្មភាពនេះថាធ្វើឡើងដោយមនុស្សតិរច្ឆាន៖ «ដឹងថាពេលបោះឆ្នោតជិតមកដល់ពិតជាចាញ់ឆ្នោត ព្រោះប្រជាពលរដ្ឋទូទាំងប្រទេសគេចង់ផ្លាស់ប្តូរ ហើយអត់មានមធ្យោបាយទប់ស្តាត់ ធ្វើការបំភិតបំភ័យ មិនចង់ឲ្យមានការបោះឆ្នោតដោយសេរី ដោយរលូន ដោយត្រជាក់ គេបង្កើតតែវិធានការក្តៅ។ ខ្ញុំហៅថាមានតែមនុស្សពាល មនុស្សតិច្ឆានទេ ដែលប្រើមធ្យោបាយបែបនេះមកសម្លុតប្រជាពលរដ្ឋខ្មែរគ្នាឯង»។
ទោះជាយ៉ាងណាក្រោយការចល័តទ័ពនៅជិតស្នាក់ការគណបក្សសង្គ្រោះជាតិនេះ មន្ត្រីក្រសួងការពារជាតិនិង អ្នកនាំពាក្យរដ្ឋាភិបាលបកស្រាយថា នេះមិនមែនជាការគំរាមកំហែងបក្សប្រឆាំងឬពលរដ្ឋទេ គឺជាការធ្វើសមយុទ្ធ១ឆ្នាំម្តង ដើម្បីការពារសន្តិសុខសណ្តាប់ធ្នាប់របស់ជាតិ៕