លោកនាយករដ្ឋមន្រ្តី ហ៊ុន សែន បានជួបសំណេះសំណាលជាថ្មីម្ដងទៀតជាមួយក្រុមកម្មករជាង ៤ ពាន់នាក់ នៅព្រឹកនេះ នៅឯកោះពេជ្រ ដូចការគ្រោងទុករបស់លោក ដែលកំណត់យក ២ដងក្នុងមួយសប្ដាហ៍។
ទំព័រហ្វេសប៊ុករបស់លោកនៅព្រឹកថ្ងៃទី០១ ខែតុលានេះ បានរៀបរាប់ថា លោក ហ៊ុន សែន កំពុងជួប សំណេះសំណាលជាមួយតំណាងកម្មករដូចជា ប្រធានរដ្ឋបាល ប្រធានផ្នែក និងមេក្រុម មកពីបណ្តារោងចក្រនានា មានចំនួនសរុប ៤៦១០នាក់ នៅមជ្ឈមណ្ឌលកោះពេជ្រ។
នេះជាជំនួបជាមួយក្រុមកម្មករលើកទី ១០ របស់លោក ហ៊ុន សែន ចាប់តាំងពីថ្ងៃដែលលោកបានកំណត់ជួបជាមួយក្រុមកម្មករ ២ដងក្នុងមួយសប្ដាហ៍ ដោយកំណត់យកថ្ងៃពុធ ដើម្បីចុះជួបកម្មករនៅតាមរោងចក្រដោយផ្ទាល់ និងថ្ងៃអាទិត្យ លោកជួបសំណេះសំណាលជាមួយក្រុមកម្មករនៅឯមជ្ឈមណ្ឌលកោះពេជ្រ។
ដោយត្រឡប់ទៅឆ្នាំមុន លោក ហ៊ុន សែន បានចុះជួបជាមួយប្រជាពលរដ្ឋទូទៅ ក្រុមអាជីវករ មន្ត្រីរាជការ និងកងកម្លាំងប្រដាប់អាវុធ នៅទូទាំងប្រទេស ចាប់តាំងពីខែកក្កដាឆ្នាំមុនមកម៉្លេះ។
លោក ហ៊ុន សែន បានអះអាងកាលពីថ្ងៃទី២២ ខែសីហាឆ្នាំមុនថា ដំណើរចុះជួបសំណេះសំណាលជាមួយមហាជន គឺដើម្បីស្វែងរកការគាំទ្រពីប្រជាពលរដ្ឋ។
យុទ្ធនាការស្វែងរកការគាំទ្រពីមហាជន ត្រូវបានលោកនាយករដ្ឋមន្ត្រី ហ៊ុន សែន ធ្វើឡើង នៅមុនការបោះឆ្នោតជាតិនៅឆ្នាំ២០១៨ខាងមុខនេះ៕