កម្មករជាង១០នាក់រងរបួសធ្ងន់និងស្រាលក្នុងហេតុការណ៍រថយន្តបុកគ្នានៅក្នុងក្រុងស្វាយរៀង នៅព្រឹកថ្ងៃអង្គារនេះ។ នេះបើតាមក្រសួងការងារ។
ក្នុងសេចក្តីប្រកាសព័ត៌មានចុះថ្ងៃទី១ វិច្ឆិកានេះ ក្រសួងការងារបានឲ្យដឹងថា កាលពីម៉ោង៦និង៣០នាទីព្រឹកនេះ មានហេតុការណ៍រថយន្តដឹកទំនិញពិព័ណ៌របស់ជនជាតិថៃ បើកបុកពីក្រោយរថយន្តដឹកកម្មករ ស្ថិតនៅភូមិវាលយន្ត សង្កាត់ស្វាយរៀង ក្រុងស្វាយរៀង ដែលបានបណ្តាលឲ្យកម្មកររងរបួសចំនួន១២នាក់ ក្នុងនោះធ្ងន់៧នាក់ និងមានម្នាក់ត្រូវបានបញ្ជូនមកសង្គ្រោះនៅមន្ទីរពេទ្យកាល់ម៉ែត។
ក្រសួងបានបញ្ជាក់ថា ខ្លួននឹងជួយដោះស្រាយការលំបាកដល់កម្មករនិងក្រុមគ្រួសារទៅតាមបេឡាជាតិរបបសន្តិសុខសង្គម។
គួរបញ្ជាក់ផងដែរ កាលពីថ្ងៃទី២៧ តុលាថ្មីៗនេះ ក្នុងសង្កាត់ជ្រោយចង្វារក៏មានហេតុការណ៍គ្រោះថ្នាក់ចរាចរណ៍របស់រថយន្តដឹកកម្មករនេះផងដែរ ដែលពេលនោះបើតាមសេចក្តីបញ្ជាក់របស់ក្រសួងមានកម្មកររងរបួសដល់ទៅ៧២នាក់ ធ្ងន់៤៣នាក់៕
