ក្រសួងបរិស្ថាន បានប្រកាសឲ្យសាធារណជន ផ្អាកចុះងូតទឹក និង បរិភោគអាហារសមុទ្រ នៅក្នុងខេត្តកែប ដើម្បីបញ្ចៀស ការប៉ះពាល់សុខភាព ដោយអះអាងថា មន្ត្រីជំនាញកំពុងពិនិត្យភាពមិនប្រក្រតីនៃទឹកសមុទ្រដែលប្រែក្លាយជាពណ៌បៃតង បណ្ដាលមកពីជាតិស្លែ។
ក្រសួងបរិស្ថាន បានចេញសេចក្ដីប្រកាសព័ត៌មាន ចុះថ្ងៃទី០២ ខែ មេសានេះឲ្យដឹងថា ទឹកសមុទ្រនៅភូមិសាស្ត្រខេត្តកែប ពេលនេះមានពណ៌បៃតងខុសពីធម្មតា សំបូរទៅដោយស្លែ។
ក្រសួងឲ្យដឹងទៀតថា ពេលនេះអគ្គនាយកដ្ឋានគាំពារបរិស្ថាន បានចុះពិនិត្យ និង ធ្វើពិសោធន៍ដោយសន្និដ្ឋានបឋមថា បណ្ដាមកពីកម្រិតជាតិស្លែខុសប្រក្រតីដែលអាចបង្កឲ្យប៉ះពាល់ដល់សុខភាពមនុស្ស និង សត្វ។
ក្រសួងបរិស្ថាន អំពាវនាវឲ្យប្រជាពលរដ្ឋ និងភ្ញៀវទេសចរណ៍ ដែលទៅកំសាន្តនៅតំបន់ឆ្នេរខេត្តកែប ឲ្យប្រុងប្រយ័ត្ន និងផ្អាកការចុះងូតទឹកកំសាន្ត និង បរិភោគគ្រឿងសមុទ្រដែលនេសាទពីតំបន់ដែលកើតមានបញ្ហានោះមួយរយៈពេលខ្លី។
ក្រសួងបរិស្ថានអះអាងថា នឹងបន្តការតាមដានបញ្ហានេះដោយយកចិត្តទុកដាក់ និងផ្ដល់ជាព័ត៌មានដល់សាធារណៈជនជាបន្តបន្ទាប់ទៀត៕
