ផ្ទាំងរូបភាពសុំឲ្យដោះលែងមន្ត្រីសិទ្ធិមនុស្សអាដហុក៤រូបដែលកំពុងជាប់ពន្ធនាគារ ត្រូវបានអាជ្ញាធរខេត្តកោះកុងចុះទៅដកចេញពីទីស្នាក់ការសមាគមសិទ្ធិមនុស្សអាដហុក និងអង្គការពីរទៀត ដោយអះអាងថាពួកគេបានដាក់ផ្ទាំងរូបភាពដោយគ្មានការអនុញ្ញាត្តិ។
អ្នកសម្របសម្រួលសមាគមអាដហុក (ADHOC) ខេត្តកោះកុង លោក ញៀប សំអឿន បានឲ្យវីអូឌីដឹងថានៅព្រឹកថ្ងៃទី០២ ឧសភា នេះមន្ត្រីសមត្ថកិច្ចមកពីសង្កាត់ស្មាច់មានជ័យ ក្រុងខេមភូមិន្ទចំនួន៤នាក់បានចុះទៅដក បដារូបភាពសុំឲ្យដោះលែងមន្ត្រីសិទ្ធិមនុស្សអាដហុក អគ្គលេខាធិការរងគ.ជ.ប និង អ្នកស្រីទេព វណ្ណី ពីមុខទីស្នាក់ការសមាគមអាហុក អង្គការលីការដូ និងអង្គការមាតាធម្មជាតិ ដោយសមត្ថកិច្ចទាំងនោះអះអាងថាការបិទរូបភាពនេះគឺមិនបានសុំការអនុញ្ញាត្តិពីខ្លួន។ លោកចាត់ទុកថានេះគឺជាការរំលោភសិទ្ធិក្នុងការបញ្ចេញមតិរបស់អ្នកការពារសិទ្ធិមនុស្សពីសំណាក់អាជ្ញាធរមានអំណាច។
លោកថា៖ «យើងគិតថាការចូលរួមដោយការបញ្ចេញមតិដោយសន្តិវិធីនេះគឺពុំមានច្បាប់ចែងត្រូវតែសុំអនុញ្ញាតឲ្យពីអជ្ញាធរមានសមត្ថកិច្ចនោះទេ ហើយមែនទែនទៅគឺយើងគ្រាន់តែតស៊ូមតិដោយសន្តិវិធីនៅក្នុងប្រទេសដែលកាន់លិទ្ធិប្រជាធិបតេយ្យដូចកម្ពុជានេះទេ។ អញឹងយើងចង់ចូលរួមចំណែកលើកកំពស់សិទ្ធិសេរីភាពរបស់ប្រជាពលរដ្ឋក្នុងការចួលរួមរបស់ប្រជាពលរដ្ឋក្នុងការជួបប្រជុំក្នុងការចូលរួម ហើយនឹងសេរីភាពនៃការតស៊ូបញ្ចេញមតិនោះឲ្យបានខ្ពស់ដែរកុំឲ្យពួកគាត់ចេះតែនឹកឃើញអញ្ចឹង អ្វីៗគាត់ចេះតែថាសុំៗៗៗរហូតដោយគ្មានគោលការណ៍ច្បាប់កំណត់អញ្ចឹងវាហាក់ដូចជារំលោភសិទ្ធិយើងហ្នឹងធ្ងន់ធ្ងរពេក»។
លោក ញៀប សំអឿន ថាផ្ទាំងរូបភាពទាំងនោះបានបិទមុខទីស្នាក់ការអង្គការទាំង៣នោះតាំងពីចុងឆ្នាំ២០១៦ ដោយពុំមានបញ្ហាអ្វីនោះទេ ទើបតែចាប់មានបញ្ហានៅថ្ងៃនេះប៉ុណ្ណោះ។
ស្នងការនគរបាលខេត្តកោះកុងលោក សំ ឃិតវៀន ថាលោកមិនបានដឹងពីការចុះចាប់ដក ផ្ទាំងរូបភាពនោះទេ តែលោកបានការពារការអនុវត្តន៍របស់ថ្នាក់ក្រោមខ្លួនថាត្រឹមត្រូវ និងបន្ទោសទៅដល់អង្គការទាំងនោះថាមិនបានសុំអាជ្ញាធរនៅពេលដាក់ផ្ទាំងរូបភាពទាំងនោះផង។
លោកថា៖ «មិនអញ្ចើញទៅសួរខាងអជ្ញាធរហេតុមិចមកសួរខ្ញុំវិញ? … ហើយចុះមូលហេតុអីគ្រាន់តែចងបដាមិចមិនជម្រាបដល់អជ្ញាធរគេបន្តិចទៅ! … ខ្ញុំឆ្ងល់ថាហេតុអីលោកនៅភ្នំពេញបានដឹងថាគេចងតាំងពីចុងឆ្នាំ២០១៦? អើបើថាឮគេប្រាប់កុំជឿតាមគេពេក!»។
អ្នកប្រឹក្សាឯករាជ្យផ្នែកសិទ្ធិមនុស្ស លោក សួន ប៊ុនស័ក្តិ យល់ថានេះជាការគំរាមកំហែងទៅលើសិទ្ធិសេរីភាពក្នុងការបញ្ចេញមតិរបស់ប្រជាពលរដ្ឋ ឬសមាគម អង្គការ។ លោកលើកឡើងថា រាល់ការមិនពេញចិត្តទៅនឹងអ្វីមួយប្រជាពលរដ្ឋគ្រប់រូបគឺមានសិទ្ធិក្នុងការបញ្ចេញមតិ ការមិនពេញចិត្តរបស់ខ្លួនតាមរយៈរូបភាពសន្តិវិធីណាមួយបានដោយគ្មានការរារាំង។
លោកថា៖ «វាដូចជាការបង្ហាញមួយនូវការរឹតត្បិត នៃសេរីភាពនៃការសំដែងមតិខុសពីធម្មតាបន្តិចរឿងហ្នឹង ព្រោះថាការសំដែងមតិពេលខ្លះជាការពិតហើយវាត្រូវការសុំច្បាប់ឧបមាថាយើងជួបជុំគ្នាជារួមតាមកន្លែងសាធារណៈធំៗ។ ក៏ប៉ុន្តែការសំដែងមតិខ្លះនោះកាលណាវាជារូបភាពជាស្ថានភាពអី្វដែលមិនមែនជាការគ្រោះថ្នាក់ដល់សង្គមដល់ជាតិគេគឺគេអាចធ្វើជាការសំដែងធម្មតាដោយមិនចាំបាច់បង្ហាញអ្វីទេ ឧទាហរណ៍ថាយើងទៅនិយាយនៅក្នុងទីធ្លាសារណៈអញ្ចឹងទៅ។ ដូច្នេះចំណុចនេះ ខ្ញុំគិតថាវាជាការរឹតត្បិតលើសពីធម្មតាដែលអជ្ញាធរមានសមត្ថកិច្ចមិនគួរធ្វើ»។
គួរបញ្ជាក់ថាការដកបដាទាមទារឲ្យដោះលែងមន្ត្រីអាដហុក និងអគ្គលេខាធិការរង គជប ដែលជាប់ឃុំនេះគឺធ្វើឡើងស្របពេលមួយឆ្នាំនៃការឃុំខ្លួនពួកគេពីសំណាក់តុលាការរាជធានីភ្នំពេញ។
មន្ត្រីការពារសិទ្ធិមនុស្សសមាគមអាដហុក៤នាក់ មាន លោក នី សុខា លោក ណៃ វ៉ង់ដា លោក យី សុខសាន្ត និងលោកស្រី លឹម មុន្នី រួមទាំងមន្ដ្រី គ.ជ.ប ម្នាក់ទៀត លោក នី ចរិយា ត្រូវតុលាការសម្រេចឃុំខ្លួនបណ្តោះអាសន្ននៅពន្ធនាគារព្រៃស ជាងមួយឆ្នាំហើយ ដោយចោទប្រកាន់ពីបទ «សូកប៉ាន់សាក្សី» ទាក់ទិនសំណុំរឿងដ៏ចម្រោងចម្រាស់មួយ ពាក់ព័ន្ធនឹងកញ្ញា ខុម ចាន់តារាទី ហៅ “ស្រីមុំ” តែតុលាការរកមិនឃើញភស្តុតាងគ្រប់គ្រាន់ដើម្បីកាត់ទោសនៅឡើយ៕
