រដ្ឋាភិបាលកម្ពុជាថា រយៈពេល៥ខែដើមឆ្នាំនេះ ខ្លួនបានជួយសង្គ្រោះពលករខ្មែរដែលទៅធ្វើការនៅប្រទេសម៉ាឡេស៊ីបានជាង១០០នាក់ នេះដោយយោងតាមការចុះផ្សាយរបស់ទីភ្នាក់ងារសារព័ត៌មានជាតិកម្ពុជា AKP។
តាមរយៈការចុះផ្សាយរបស់ AKP អ្នកនាំពាក្យក្រសួងការបរទេសកម្ពុជាលោក ជុំ សន្ទរី បានឲ្យដឹងថាចាប់ពីថ្ងៃទី១មករារហូតដល់ថ្ងៃទី៣១ឧសភាឆ្នាំ២០១៧ ក្រសួងការបរទេសកម្ពុជាតាមរយៈស្ថានទូតប្រចាំប្រទេសម៉ាឡេស៊ី បានជួយសង្គ្រោះពលករ បានចំនួន១២២នាក់ ដែលនិយោជក បានរំលោភបំពាន វាយធ្វើបាប មិនបើកប្រាក់ខែឱ្យ ធ្វើការពុំមានពេលសម្រាក ផ្ដល់អាហារបរិភោគមិនគ្រប់គ្រាន់ ស្នាក់នៅ និងធ្វើការខុសច្បាប់ ឬពុំមានឯកសារជាប់ខ្លួន។
បើតាមលោក ជុំ សន្ទរី ជាមធ្យម ពលរដ្ឋខ្មែរពី១៥ទៅ២០នាក់ បានមករង់ចាំដំណោះស្រាយ ស្នាក់នៅ អាហារ និងថ្នាំពេទ្យពីស្ថានទូតខ្មែរប្រចាំប្រទេសម៉ាឡេស៊ីជារៀងរាល់ថ្ងៃ និងលើសពីនេះ លោកថាមានពលរដ្ឋមួយចំនួន ត្រូវបន្តស្នាក់នៅស្ថានទូតនេះជាច្រើនខែទំរាំដោះស្រាយបញ្ហារួចរាល់បញ្ជូនមកកម្ពុជាវិញ៕
