ធនាគារអភិវឌ្ឍន៍អាស៊ី ឬហៅកាត់ថា ADB រៀបចំឲ្យមានការប្រកួតសរសេរសំណេរអត្ថបទសម្រាប់និសិ្សតកម្ពុជា ដោយការសរសេរនេះគឺផ្តោតទៅលើជំនួយនិងតួនាទីរបស់ធនាគារនេះ ក្នុងការអភិវឌ្ឍប្រទេសកម្ពុជា។
ក្នុងសេចក្តីប្រកាសព័ត៌មានចុះថ្ងៃទី ២៩ កក្កដា ដែលវីអូឌីទើបទទួលបាន ធនាគារអភិវឌ្ឍន៍អាស៊ីបានឲ្យដឹងថា ធនាគារអភិវឌ្ឍន៍អាស៊ី រួមជាមួយសាកលវិទ្យាល័យជាតិគ្រប់គ្រង បានរៀបចំការប្រកួតសរសេរសំណេរសម្រាប់និសិ្សតកម្ពុជា ដោយផ្តោតទៅលើជំនួយនិងតួនាទីរបស់ធនាគារនេះក្នុងការអភិវឌ្ឍ ការលើកស្ទួយកំណើនសេដ្ឋកិច្ច និងការដោះស្រាយរបស់ធនាគារនេះចំពោះបញ្ហានៃការអភិវឌ្ឍនៅកម្ពុជា។
នាយកធនាគារអភិវឌ្ឍន៍អាស៊ីប្រចាំកម្ពុជាលោក Samiuela Tukuafu ត្រូវបានដកស្រង់សម្តីក្នុងសេចក្តីប្រកាសព័ត៌មាននោះថា៖ “ការប្រកួតប្រជែងនេះ ផ្តល់ឱកាសឲ្យយុវជនកម្ពុជា ស្រាវជ្រាវ និងចែករំលែកការយល់ដឹងរបស់ពួកគេចំពោះតួនាទីរបស់ ADB នៅក្នុងវឌ្ឍនភាពនៃកិច្ចការអភិវឌ្ឍសង្គម និងសេដ្ឋកិច្ច របស់កម្ពុជា នារយៈពេលជាង៥០ឆ្នាំកន្លងទៅនេះ“។
ដើម្បីចូលរួមការប្រកួតប្រជែងនេះ អ្នកចូលរួមទាំងអស់ត្រូវសរសេរអត្ថបទមួយ ដោយមិនចម្លងស្នាដៃអ្នកដទៃជាភាសាអង់គ្លេសចន្លោះពី១ ៥០០ពាក្យទៅ២ ០០០ពាក្យ។ ADB នឹងជ្រើសរើសយកអ្នកដែលមានស្នាដៃល្អបំផុតចំនួន១០នាក់ ដែលនឹងត្រូវរៀបចំនៅចុងឆ្នាំនេះ។
ការប្រកួតប្រជែងការសរសេរនេះជាផ្នែកមួយកម្មវិធីអបអរខួបទី៥០នៃភាពជាដៃគូក្នុងកិច្ចការអភិវឌ្ឍរបស់ ADB នៅក្នុងប្រទេសកម្ពុជានារយៈពេល៥ទសវត្សកន្លងទៅនេះ៕
