អ្នកឃ្លាំមើលពីបញ្ហាសង្គមថាមិនទាន់មានជំនឿលើវិធានការរបស់រដ្ឋាភិបាលក្នុងការទប់ស្កាត់គ្រឿងញៀនបាននោះទេ ដោយសារវិធានការនោះហាក់មានឥទ្ធិពលតែលើអ្នកចែកចាយតូចតាច ខណៈដែលមេខ្លោងធំៗគឺមិនទាន់ចាប់ខ្លួនបាននៅឡើយ។
រដ្ឋាភិបាលបានបញ្ជាក់ថាក្នុងយុទ្ធនាការបង្ក្រាបគ្រឿងញៀននៅទូទាំងប្រទេសក្នុងរយៈពេល១ខែកន្លងមកនេះ ឃាត់ជនល្មើសបានជិត៣ពាន់នាក់ ចាប់បានគ្រឿងញៀនជាង៩គីឡូក្រាម។
ទោះជាយ៉ាងណាក្នុងការបង្ក្រាបនោះ គេមិនទាន់ឃើញមានការបង្ក្រាបមេខ្លោងជួញដូរធំៗនៅឡើយទេ។
នាយកប្រតិបត្តិសម្ព័ន្ធគណនេយ្យសង្គមលោក សន ជ័យ យល់ថា បញ្ហាគ្រឿងញៀននៅកម្ពុជានេះបណ្តាលមកពីការអនុវត្តការងារនៅរង់ចាំតែបញ្ជាពីថ្នាក់លើនិងការបង្ក្រាបបានតែអ្នកចែកចាយតូចតាច។ លោកថាលោកមិនទាន់មានជំនឿទៅលើវិធានការរបស់រដ្ឋាភិបាលនៅឡើយទេ ក៏ព្រោះតែមេខ្លោងធំៗនៅតែមានសេរីភាព មិនទាន់បង្ក្រាបបាន។
លោកថា៖ «យើងកុំទាន់ទៅណាឆ្ងាយយើងមើលនៅបឹងឈូកសិន ព្រោះថារឿងបឹងឈូកហ្នឹង វាជារឿងមួយដែលមិនទាន់មានប្រសិទ្ធភាពហើយនឹងមិនទាន់ដល់កម្រិតមួយដែលប្រជាពលរដ្ឋជឿទុកចិត្តបានផង ហើយយើងឃើញថាមានប្រជាពលរដ្ឋរាយការណ៍ថាមានអ្នកចែកចាយហ្នឹង ដែលគេសង្ស័យថាជាមនុស្សដែលមានអំណាច ទាំងមធ្យោបាយចែកចាយនិងរចនាសម្ព័ន្ធនៃការចែកចាយនៅទីនោះ ជាអំណាចមួយដែលរឹងមាំ យើងអត់ទាន់ទៅណាឆ្ងាយទេ យើងចង់មើលករណីនៅបឹងឈួកសិន។ … តែខ្ញុំមិនទាន់ឃើញស្រមោលនៃប្រសិទ្ធភាពទេទៅលើការបង្ក្រាបគ្រឿងញៀនហ្នឹង!»។
លោកបន្ថែមថា បញ្ហាគ្រឿងញៀននេះគួរតែបង្ក្រាបឲ្យលឿន ជាជាងនៅតែបណ្តែតបណ្តោយឲ្យមេខ្លោងធំៗទាំងនោះមានឱកាសចែកចាយឬបំផ្លាញភស្ភុតាងឬក៏រត់រួចចេញពីកម្ពុជា។
នៅថ្ងៃទី២ កុម្ភៈម្សិលមិញ រដ្ឋមន្ត្រីក្រសួងមហាផ្ទៃលោក ស ខេង ទុករយៈពេល១ខែទៅកាន់មន្ត្រីថ្នាក់ក្រោមឲ្យធ្វើការបោសសម្អាតការជួញដូរនិងប្រើប្រាស់គ្រឿងញៀននៅតំបន់ត្រពាំងឈូក រាជធានីភ្នំពេញ ខណៈដែលតំបន់នេះមានបង្ក្រាបជាច្រើនលើកច្រើនសារមកហើយនៅតែមិនអស់ ដែលលោកថាកន្លែងនោះហើយដែលជាសំបុករបស់មេខ្លោងជួញដូរគ្រឿងញៀនមួយចំនួន។
ប្រធានមជ្ឈមណ្ឌលពលរដ្ឋអភិវឌ្ឍន៍និងសន្តិភាពលោក យង់ គិមអេង មានប្រសាសន៍ថា លោកមិនមានជំនឿថាវិធានការរបស់រដ្ឋាភិបាលនេះមានប្រសិទ្ធភាពនោះទេ ដោយសារតែជាទូទៅលោកសង្កេតឃើញថាវិធានការដែលរដ្ឋាភិបាលដាក់ចេញនោះគឺមានប្រសិទ្ធភាពតែមួយឆាវ ហើយការបង្ក្រាបបទល្មើសគ្រឿងញៀនកន្លងទៅនេះទៀតសោតគឺមិនទាន់ចាប់ខ្លួនបានមេខ្លោងធំៗនៅឡើយទេ។ លោកបន្តថាមេឈ្មួញជួញដូរទាំងនោះអាចផ្អាកសកម្មភាពខ្លួនសិន រង់ចាំដល់វិធានការរបស់រដ្ឋាភិបាលស្ងប់ស្ងាត់ទើបចេញមកវិញ។
លោកបន្តថា៖ «ដែលចាប់បានតែចង្វា(តូចៗ) នោះគឺអត់មានប្រសិទ្ធភាពទេ បើអាត្រីធំវានៅដដែល អាត្រីធំហ្នឹងហើយដែលអាចបង្កជាឧបសគ្គនៅពេលណាដែលយុទ្ធនាការនោះស្ងប់ស្ងាត់ទៅវិញ។ … ខ្ញុំនៅមិនមានជំនឿទេប្រសិនជាពួកឈ្មួញជួញដូរធំៗនោះមិនត្រូវបានចាប់ខ្លួន។ ពីព្រោះថាអ្នកដែលជួយដូរគ្រឿងញៀនយកបង្កវិនាសកម្មនៅក្នុងសង្គមជាក់ស្តែងនោះ គឺមិនជាពួកតូចតាចទេ ពួកហ្នឹងគឺគ្រាន់តែចែកចាយតិចតួច។ ប៉ុន្តែនៅមានអ្នកជួញដូរធំៗទៀតដែលហ្នឹងហើយត្រូវតែមានការចាត់វិធានការជាបន្ទាន់»។
លោកបន្ថែមថា ដើម្បីឲ្យមានប្រសិទ្ធភាពរដ្ឋាភិបាលគួរផ្តោតឲ្យចំណុចបញ្ហាសំខាន់និងហ៊ានចាប់មន្ត្រីខ្លួនណាដែលពាក់ព័ន្ធនឹងគ្រឿងញៀនធំៗឲ្យបាន យកមកដាក់ទោសដើម្បីបង្ហាញពីតម្លាភាពនិងប្រសិទ្ធភាព។
មាត្រា៣២.២ថ្មីនិងមាត្រា៣៣ នៃច្បាប់ស្តីពីការត្រួតពិនិត្យគ្រឿងញៀនមានខ្លឹមសារថា ជនណានាំចេញ នាំចូលសារធាតុញៀន ការលក់ ការទិញ ការដឹកជញ្ជូន ឬការប្រើប្រាស់ គ្រឿងញៀនបណ្តាលឲ្យគ្រោះថ្នាក់ធ្ងន់ធ្ងរនិងប្រព្រឹត្តបទល្មើសច្រើនដង ត្រូវផ្តន្ទាទោសចន្លោះពី២ទៅ១០ឆ្នាំនិងពិន័យជាប្រាក់ពី៤លានរៀលទៅ២០លានរៀល។
រដ្ឋាភិបាលបានចេញផែនការយុទ្ធសាស្ត្រប្រឆាំងគ្រឿងញៀនលើកទី១របស់ខ្លួន ចាប់ពីដើមឆ្នាំ២០១៧នេះ ដោយចាត់តាំងលោក ស ខេង និងលោក កែ គឹមយ៉ាន ជាអ្នកទទួលខុសត្រូវលើរឿងនេះ។ ផែនការនេះ ធ្វើឡើងស្របពេលប្រធានាធិបតីហ្វីលីពីន លោក ឌូទើតេ ដែលគេស្គាល់ថា ជាស្តេចប្រឆំាងបទល្មើសគ្រឿងញៀន បានមកធ្វើទស្សនកិច្ចនៅកម្ពុជានាពាក់កណ្តាលខែធ្នូឆ្នាំមុន។
តាមរបាយការណ៍រដ្ឋាភិបាល អ្នកញៀនគ្រឿងញៀននៅកម្ពុជា ក្នុងរយៈពេល១០ខែនៅឆ្នាំ២០១៦ មានជិត២ម៉ឺននាក់ (១៨ ៥៥៤ នាក់)កើនឡើងជិត៣០ភាគរយបើធៀបទៅនឹងឆ្នាំ២០១៥ ខណៈអ្នកប្រើប្រាស់មានអាយុចាប់ពី១៨ដល់៣៥ឆ្នាំ៕
