នាយកដ្ឋានជំងឺឆ្លងនៃក្រសួងសុខាភិបាលអំពាវនាវឲ្យប្រជាពលរដ្ឋមានការប្រុងប្រយ័ត្នការឆ្លងជំងឺផ្តាសាយបក្សនៅក្នុងឱកាសនៃបុណ្យចូលឆ្នាំខ្មែរខាងមុខ ព្រោះជាពេលដែលប្រជាពលរដ្ឋបរិភោគសាច់បក្សីច្រើនក្នុងពេលជួបជុំគ្នានោះ។
តាមសេចក្តីជូនដំណឹងរបស់នាយកដ្ឋានជំងឺឆ្លងបានឲ្យដឹងថា នៅថ្ងៃទី៣ ខែមីនា ឆ្នាំ២០១៧ នៅប្រទេសវៀតណាមមានការផ្ទុះឡើងវិញនៃជំងឺផ្តាសាយបក្សី ដែលបានសំលាប់និងដុតចោលសត្វបក្សីជាច្រើន តែពុំទាន់រកឃើញឆ្លងមកមនុស្សនៅឡើយទេ។ ដោយឡែកនៅដើមឆ្នាំ២០១៧នេះ ប្រទេសកម្ពុជា ក៏បានរកឃើញមានការរីករាលដាលឡើងវិញនៃជំងឹផ្តាសាយបក្សីលើសត្វបក្សីក្នុងខេត្តស្វាយរៀង តែពុំបានរកឃើញករណីជំងឺផ្តាសាយនៅលើមនុស្សនៅឡើយដែរ។
ក្រសួងអំពាវនាវឲ្យពលរដ្ឋមានការប្រុងប្រយ័ត្នខ្ពស់អំពីការចំលងជំងឺនេះ ពិសេសកុំយកមាន់ ទា ឬសត្វបក្សីឈឺឬងាប់ មករៀបចំជាអាហារឫលក់បន្ត ត្រូវអនុវត្តអនាម័យក្នុងការបោចរោមនិងចំអិនជាប់ជានិច្ច។
របាយការណ៍នាយកដ្ឋាននេះឲ្យដឹងថា ចាប់តាំងពីឆ្នាំ២០០៥ដល់២០១៤ កម្ពុជាធ្លាប់កើតមានជំងឺផ្តាសាយបក្សី ដែលបានឆ្លងពីសត្វបក្សីមកមនុស្សចំនួន៥៦ករណី ដែលក្នុងនោះ៣៧ករណីបានស្លាប់។
បុគ្គលដែលមានរោគសញ្ញាគ្រុនក្តៅលើសពី៣៨.៥អង្សារសេនិងមានរោគសញ្ញា ក្អក ឬឈឺក ឬដកដង្ហើមហត់ និងមានប្រវត្តិប៉ះពាល់ជាមួយបក្សីឈឺឬងាប់ក្នុងកំឡុងពេល៧ថ្ងៃមុនចេញរោគសញ្ញា ចាត់ទុកថាជាករណីសង្ស័យ ត្រូវបញ្ចូនអ្នកជំងឺទៅមណ្ឌល់សុខភាពឬមន្ទីរពេទ្យជិតបំផុតដើម្បីធ្វើការព្យាបាល៕